༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༢ ཟླ་ ༡༠ ཚེས་ ༢༥ ཉིན་ཨི་ཊ་ལིའི་སྲིད་བློན་གསར་པ་ལྕམ་སྐུ་ཇོར་ཇི་ཡ་མེ་ལོ་ནི་ (H.E Giorgia Meloni) མཆོག་ལ་འཚམས་འདྲིའི་གསུང་འཕྲིན་གནང་བའི་ནང་འཁོད་དོན། སྐུ་ཉིད་ཨི་ཊ་ལིའི་སྲིད་བློན་གསར་པ་ཆགས་པར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། ཕྲན་རང་ཉིད་ན་ནིང་ལོར་ཨི་ཊ་ལིར་རྗེས་དྲན་ཞུ་འོས་པའི་ཐེངས་དང་པོ་གཞུང་འབྲེལ་ཕྱོགས་བསྐྱོད་སྐབས་ཨི་ཊ་ལིས་སྣེ་ལེན་གཟབ་རྒྱས་གནང་སོང་བས་ཧ་ཅང་སེམས་འགུལ་ཐེབས་བྱུང་། ཨི་ཊ་ལིར་གནས་སྡོད་བྱེད་མཁན་མང་དུ་འགྲོ་བཞིན་པའི་བཙན་བྱོལ་བོད་མི་རྣམས་ལ་ཨི་ཊ་ལིའི་གཞུང་མང་གཉིས་ནས་ཐུགས་ཁུར་དང་རྒྱབ་སྐྱོར་གནང་བཞིན་ཡོད་སྟབས། བོད་མི་ཚོས་ཨི་ཊ་ལི་ནི། རང་གི་ཁྱིམ་གཞིས་གཉིས་པ་ལྟ་བུའི་འདུ་ཤེས་འཛིན་གྱི་ཡོད། ཅེས་དང་། 
འདས་པའི་ལོ་ངོ་བཅུ་ཕྲག་མང་པོའི་རིང་ཨི་ཊ་ལིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། ཨི་ཊ་ལིའི་མི་མང་གིས་མུ་མཐུད་བོད་དོན་དང་བོད་མི་རྣམས་ལ་རྒྱབ་སྐྱོར་གནང་བཞིན་ཡོད། སྐུ་ཉིད་ཀྱི་རྒྱལ་ཁབ་དང་མི་མང་གིས་དུས་ཡུན་རིང་པོའི་རིང་བོད་མི་རྣམས་ལ་རྒྱབ་སྐྱོར་གནང་གི་ཡོད་པར་བརྟེན། གོ་སྐབས་འདི་བརྒྱུད་ངས་ཐུགས་རྗེ་ཆེ་ཞུ་རྒྱུ་ཡིན། ངས་སྐུ་ཉིད་ཀྱི་དབུ་ཁྲིད་འོག་ཨི་ཊ་ལིའི་གཞུང་མང་གཉིས་ནས་མུ་མཐུད་བོད་མིར་མཛའ་བརྩེ་ལྡན་པའི་སྒོ་ནས་རྒྱབ་སྐྱོར་གནང་རྒྱུའི་རེ་ལྟོས་བྱེད་ཀྱི་ཡོད་ལ། སྐུ་ཉིད་ནས་གོ་བབ་མཐོ་བའི་ལས་ཁུངས་ཀྱི་ཐུགས་འགན་བཞེས་ཡོད་པས་ལས་དོན་རྣམས་ལམ་ལྷོངས་འབྱུང་བའི་སྨོན་འདུན་ཞུ་རྒྱུ་ཡིན། ཞེས་འཁོད་ཡོད་པ་བཅས།།