༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༢༠ ཉིན་གྱི་སྔ་དྲོ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་ཀམ་པུ་ཊར་སྡེ་ཚན་དང་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩ་གཉིས་ཀྱི་གོ་སྒྲིག་འོག་བཀའ་ཤག་ཚོགས་ཁང་དུ་བརྡ་འཕྲིན་ཐབས་བྱུས་གོང་སྤེལ་ཚོགས་འདུ་ཐེངས་དང་པོའི་དབུ་འབྱེད་མཛད་སྒོ་ཚོགས་ཡོད་པ་དང་། ཚོགས་འདུ་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་མི་མང་སྤྱི་འཐུས་བློ་བཟང་རྒྱ་མཚོ་སྲི་ཐར་ལགས། སྨོན་ལམ་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས། དེ་བཞིན་ཕྱི་དྲིལ་ལས་ཁུངས་ཀྱི་ཁྱབ་ཁོངས་ཀམ་པུ་ཊར་སྡེ་ཚན་གྱི་འགན་འཛིན་རྣམ་རྒྱལ་ལེགས་བཤད་ལགས་དང་འབྲེལ་ཡོད་ལས་བྱེད་རྣམ་པ། ཕྱི་རྒྱལ་དང་རྒྱ་གར་ནང་གི་ཚོགས་པ་ཁག་གི་བརྡ་འཕྲིན་ཆེད་མཁས་པ་ཁག་གཅིག གཞན་ཡང་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་སྐུ་ཚབ་སྲི་ཞུའི་ལས་བྱེད་བཅས་ཕེབས་ཡོད།
དེ་ཡང་མཛད་སྒོའི་ཐོག་མར་ཕྱི་དྲིལ་ཀམ་པུ་ཊར་སྡེ་ཚན་གྱི་འགན་འཛིན་རྣམ་རྒྱལ་ལེགས་བཤད་ལགས་ཀྱིས་ཚོགས་བཅར་བ་ཡོངས་ལ་ཕེབས་བསུའི་གསུང་བཤད་གནང་གྲུབ་མཚམས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མཛད་སྒོ་དབུ་འབྱེད་ཀྱི་གསུང་བཤད་གནང་སྐབས་གཙོ་བོ་བོད་མིའི་སྒྲིག་འཛུགས་ཀྱི་འབྱུང་འགྱུར་ལོ་གསུམ་བཞིའི་ལས་དོན་རྣམས་ཀྱི་ཆེད་བཀོལ་སྤྱོད་མཉེན་ཆས་ཁག་གསར་བཟོ་གནང་དགོས་སྟབས། ཆེད་མཁས་པ་གདན་འདྲེན་ཞུས་ཏེ་གོ་བསྡུར་གནང་དགོས་པའི་གལ་གནད་དང་། ཕྱི་དྲིལ་ཀམ་པུ་ཊར་སྡེ་ཚན་གྱི་ལས་བྱེད་རྣམ་པས་སྤྱན་བསྟར་གནང་སྐབས་ཆེད་མཁས་པ་རྣམ་པས་ལེགས་སྤེལ་ཉེས་འགོག་གི་དགོངས་ཚུལ་གསུང་དགོས་པ། བརྡ་འཕྲིན་ཐབས་བྱུས་གོང་སྤེལ་གཏོང་བར་ཕྱི་དྲིལ་ཀམ་པུ་ཊར་སྡེ་ཚན་གྱི་ལས་བྱེད་དང་ཀམ་པུ་ཊར་ཐོག་སློབ་ཐོན་བོད་པའི་གཞོན་སྐྱེས་རྣམས་མཉམ་རུབ་ཀྱིས་ཕྱག་ལས་གནང་དགོས་པའི་གལ་གནད་སོགས་ཀྱི་སྐོར་གསུངས་རྗེས་དབུ་འབྱེད་མཛད་སྒོ་གྲོལ་ཡོད་པ་དང་། བརྡ་འཕྲིན་ཐབས་བྱུས་གོང་སྤེལ་ཚོགས་འདུ་དེ་བཞིན་ཕྱི་ལོ་ ༢༠༢༢ ཟླ་ ༡༠ ཚེས་ ༢༠ ཉིན་འགོ་བཙུགས་ཀྱིས་ཕྱི་ཚེས་ ༢༡ བར་ཉིན་གྲངས་གཉིས་རིང་འཚོག་གནང་གི་ཡོད་པ་བཅས།།
དཔལ་ལྡན་སྲིད་སྐྱོང་མཆོག་གིས་བརྡ་འཕྲིན་ཐབས་བྱུས་གོང་སྤེལ་ཚོགས་འདུ་ཐེངས་དང་པོའི་དབུ་འབྱེད་མཛད་སྒོར་གསུང་བཤད་གནང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)