༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་དཀོན་མཆོག་ཡར་འཕེལ་ལགས། སྤྱི་འཐུས་དབྲ་ཙ་བསོད་ནམས་ནོར་བུ་ལགས། སྤྱི་འཐུས་དངོས་གྲུབ་རྡོ་རྗེ་ལགས། སྤྱི་འཐུས་ཚེ་རིང་དབྱངས་ཅན་ལགས། དེ་བཞིན་དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༢ ཟླ་ ༡༠ ཚེས་ ༩ ནས་ ༡༢ བར་ཡུ་རོབ་རྒྱལ་ཁབ་འཇར་མན་གྲོང་ཁྱེར་མུ་ནིག་དང་། རྒྱལ་ས་བྷར་ལིན། གྲོང་ཁྱེར་ཧྥ་རིན་ཀི་ཧྥོར་ཊི་བཅས་ཀྱི་ནང་འཇར་མན་གྲོས་ཚོགས་འཐུས་མི་དང་། གནད་ཡོད་མི་སྣ་སོགས་མཇལ་འཕྲད་ཀྱིས་འཇར་མན་ནང་གི་ལས་རིམ་ཁག་ལེགས་པར་གྲུབ་རྗེས་ཕྱི་ཚེས་ ༡༣ ཉིན་གྱི་སྔ་དྲོ་ཡུ་རོབ་རྒྱལ་ཁབ་སྦེལ་ཇམ་ལ་ཕེབས་ཐོན་གནང་ཡོད།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་སྦེལ་ཇམ་གྱི་རྒྱལ་ས་སྦར་སེལ་དུ་ཕེབས་འབྱོར་སྐབས་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་དོན་ཁང་གི་ལས་བྱེད་རྣམ་པ། སྦེལ་ཇམ་བོད་རིགས་ཚོགས་པའི་ཚོགས་མི་རྣམ་པ། ས་གནས་བོད་མིའི་སྐྱིད་སྡུག་ཚོགས་པ་ཁག་གི་སྐུ་ཚབ། དེ་བཞིན་བོད་མི་བརྒྱ་ཕྲག་བརྒལ་བས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།སྦེལ་ཇམ་གྱི་རྒྱལ་ས་སྦར་སེལ་དུ་རྟེན་གཞི་བྱས་པའི་ཧྥི་རེ་ཌིག་ནོ་མཱན་རང་དབང་ཐེབས་རྩ་ (Friedrich Naumann Foundation for Freedom) ཁང་གི་ངོས་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ལ་ཕེབས་བསུའི་ཉིན་གུང་གསོལ་ཚིགས་འདེགས་འབུལ་ཞུས་གནང་ཡོད་པ་དང་། སྐབས་དེར་ཡུ་རོབ་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་དང་། ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་ཚོགས་མི། དེ་བཞིན་ཡུ་རོབ་སྤྱི་མཐུན་ཚོགས་པར་རྒྱབ་སྐྱོར་གནང་མཁན་ཡུ་རོབ་བསྐྱར་ཞིབ་ཅེས་པའི་ཚོགས་པའི་འགན་འཛིན་གཞོན་པ་ལྕམ་སྐུ་ཀ་ཊ་ལེན་ (Dr Katilin Cseh) ལགས་དང་། ཡུ་རོབ་སྲིད་བྱུས་ཉམས་ཞིབ་བསྟི་གནས་ཁང་གི་སློབ་དཔོན་སྐུ་ཞབས་ཇེམ་སི་མོ་རན་ (James Moran) ལགས། དེ་བཞིན་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་སོགས་མཉམ་ཞུགས་གནང་ཡོད།

དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་དཀོན་མཆོག་ཡར་འཕེལ་ལགས། སྤྱི་འཐུས་དབྲ་ཙ་བསོད་ནམས་ནོར་བུ་ལགས། སྤྱི་འཐུས་དངོས་གྲུབ་རྡོ་རྗེ་ལགས། སྤྱི་འཐུས་ཚེ་རིང་དབྱངས་ཅན་ལགས།  དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས། སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་བཅས་ནས་ཡུ་རོབ་གྲོས་ཚོགས་སུ་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཀུ་ལ་སི་པེག་ས་ (Hon. Mikulas Peksa) མཆོག་དང་། ཚོགས་མི་ལྕམ་སྐུ་ཨོ་སཱ་རཱ་མལ་ཌེ་ཀིན་ (MEP Ausra Maldeikiene) མཆོག ཚོགས་མི་སྐུ་ཞབས་ཕེ་ཊ་ར་སཱ་ཨོ་སཱ་ཊེ་རེ་ཝི་ཤ་ས་ (MEP Petras Austrevicius) མཆོག ཚོགས་མི་ཨི་ས་སྦེལ་སན་ཊོ་སི་ (Isabel Santos) མཆོག ཡུ་རོབ་གྲོས་ཚོགས་འཐུས་མིའི་ཕྱག་རོགས་རྣམ་པ།  དེ་བཞིན་སྦེལ་ཇམ་གྱི་རྒྱལ་ས་སྦར་སེལ་དུ་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ (Vincent Metten) ལགས་དང་ལས་བྱེད་ལྕམ་སྐུ་མི་ལ་ནི་ཡ་བྷོ་ལོན་ཌེ་ལེ་ (Melanie Blondelle) ལགས་སོགས་དང་མཇལ་འཕྲད་གནང་ཡོད།ཕྱི་ཚེས་ ༡༣ ཉིན་གྱི་དགོང་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་། ཕྱི་དྲིལ་བཀའ་བློན་མཆོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་སྤྱི་འཐུས་ཁག་གཅིག དཔལ་འབྱོར་ལས་ཁུངས་ཀྱི་དྲུང་ཚབ་བཅས་ལས་གྲུབ་པའི་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ནས་ཡུ་རོབ་གྲོས་ཚོགས་ཀྱི་ཚོགས་གཙོ་མཆོག་གི་འཛིན་སྐྱོང་ལས་ཁུངས་ཀྱི་འགན་འཛིན་སྐུ་ཞབས་ཨེ་ལེ་སན་ཌོ་རོ་ཆིའོ་ཆི་ཊི་ (Alessandro Chiocchetti) མཆོག་གིས་གཙོས་ཁོང་གི་སློབ་སྟོན་པ་དང་ཕྱག་རོགས་རྣམ་པ་བཅས་དང་མཇལ་འཕྲད་གནང་ཡོད། གཞན་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་བཅས་ནས་མང་གཙོ་དང་འགྲོ་བ་མིའི་ཐོབ་ཐང་ཚོགས་པའི་འགན་འཛིན་གཞོན་པ་ལྕམ་སྐུ་ཧེ་ཌི་ཧེའུ་ཊ་ལ་ (Heidi Heutala) ལགས་དང་མཇལ་འཕྲད་གནང་ཡོད།

ཕྱོགས་མཚུངས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་། ཕྱི་དྲིལ་བཀའ་བློན་མཆོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་སྤྱི་འཐུས་ཁག་གཅིག དཔལ་འབྱོར་ལས་ཁུངས་ཀྱི་དྲུང་ཚབ་བཅས་ལས་གྲུབ་པའི་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ནས་སྦེལ་ཇམ་སྐུ་ཚབ་དོན་གཅོད་ཁང་དུ་གཟིགས་སྐོར་དང་། ནི་དར་ལེནྜའི་བོད་རིགས་ཚོགས་པའི་ཚོགས་གཙོ་དང་ཚོགས་མི་རྣམས་ཐུག་འཕྲད་གནང་ཡོད་པ་མ་ཟད། ས་གནས་ཀྱི་ཚོགས་པ་ཁག་གི་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་ཡོད་པ་བཅས།།