༄༅། །འདི་གར་ཐའེ་ཝན་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་ ༡༠ ཚེས་ ༣ ཉིན་ཐའེ་ཝན་ (Howard Plaza) མགྲོན་ཁང་དུ་ཇར་མི་ནི་གཞུང་ཚབ་ཁང་གི་གོ་སྒྲིག་ཞུས་པའི་ཇར་མི་ནི་རྒྱལ་ཁབ་ཉིན་མོ་སྲུང་བརྩིའི་མཛད་སྒོར་མགྲོན་འབོད་གནང་དོན་ལྟར། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་མི་འགྱུར་གཡུ་སྒྲོན་ལགས་ཇར་མི་ནི་རྒྱལ་ཁབ་ཀྱི་དུས་ཆེན་མཛད་སྒོར་མཉམ་ཞུགས་ཀྱིས་ཇར་མི་ནི་རྒྱལ་ཁབ་དང་མི་མང་ལ་བོད་མིའི་སྒྲིག་འཛུགས་དང་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་དང་ཇར་མི་ནི་རྒྱལ་ཁབ་ནས་བོད་དང་བོད་མིའི་གནད་དོན་ཐད་མུ་མཐུད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད།

ཇར་མི་ནི་གཞུང་ཚབ་ (Dr. Jorg Polster) ལགས་ཀྱི་གསུང་བཤད་ནང་རྒྱལ་ཁབ་ཚང་མས་ཕན་ཚུན་གཅིག་ཕན་གཅིག་གྲོགས་ཀྱིས་འཛམ་གླིང་ཞི་བདེར་བསྐྲུན་ཐབས་ཀྱི་ནུས་པ་གོང་འཕེལ་བཏང་བའི་ཐོག་ནས་གོམ་པ་མདུན་བསྐྱོད་བྱ་རྒྱུ་གལ་ཆེ་ཡིན་སྐོར་གསུངས་གནང་སོང་། མཛད་སྒོར་སྐུ་མགྲོན་དུ་ཐའེ་ཝན་དུ་ཡོད་པའི་རྒྱལ་ཁབ་ཁག་གི་གཞུང་ཚབ་རྣམ་པ་དང་འབྲེལ་ཡོད་བཅས་ཕེབས་གནང་ཡོད་པ་བཅས། །