༄༅། །ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་གྱི་གསར་འགོད་གསལ་བསྒྲགས་ཐོག་མཉམ་ཞུགས་གནང་ཡོད། སྲིད་འཛིན་ཞི་ཅིན་ཕིང་གི་འགོ་ཁྲིད་འོག་རྒྱ་ནག་གཞུང་གིས་དབང་བསྒྱུར་འོག་ཡོད་པའི་གྲངས་ཉུང་མི་རིགས་ཀྱི་ཆོས་དང་རིག་གཞུང་ངོ་བོ་བཅས་པ་རྩ་མེད་གཏང་རྒྱུའི་སྲིད་བྱུས་མཁྲེགས་སུ་བཏང་ཡོད་པ་དང། དེ་ལྟ་བུའི་རྒྱ་གཞུང་གི་མཁྲེགས་བཟུང་ཅན་གྱི་སྲིད་བྱུས་དང་གནའ་གནོན་ལ་བརྟེན་ས་ཁུལ་དེ་དག་གི་མི་མང་ཐུན་མོང་ནས་རྒྱལ་སྤྱིའི་མི་མང་གིས་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་སྐྱོན་བརྗོད་གནང་དགོས་པའི་འབོད་སྐུལ་ཞུ་གི་ཡོད། 

ཉི་ཧོང་ཡུ་གུར་ལྷན་ཚོགས་ཀྱིས་གོ་སྒྲིག་ཞུས་པའི་གསར་འགོད་གསལ་བསྒྲགས་ཐོག་ཡུ་གུར་དང་། བོད། ལྷོ་སོག་མི་མང་གི་སྐུ་ཚབ་དང་། དེ་བཞིན་རྒྱལ་སྤྱིའི་ཡུ་གུར་ལྷན་ཚོགས་ཀྱི་ཚོགས་གཙོ་སྐུ་ཞབས་གྲོལ་ཀུན་ཨི་ས་ (Dolkun Isa) ལགས། བཙོན་པའི་གསོག་སྒར་དུ་སྡུག་སྦྱོང་མྱངས་མྱོང་མཁན་ཁིལ་བྷི་ནུར་སི་དིཊ་ (Qelbinur Sidik) ལགས་མཉམ་ཞུགས་གནང་ཡོད། སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་དང་། ཤར་ཏུར་ཀིསྟན། ལྷོ་སོག་གི་གནད་དོན་ནི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་བཏང་བའི་གནད་དོན་ཙམ་མ་ཡིན་པར་རང་དབང་ཅན་གྱི་རྒྱལ་ཁབ་ཅིག་ལ་བཙན་འཛུལ་བྱས་པའང་ཆགས་ཡོད་ཅེས་དང་།དེ་འབྲེལ་རྒྱལ་སྤྱིའི་དབུ་ཁྲིད་རྣམ་པས་རྒྱལ་ཁབ་དེ་གསུམ་གྱི་གནད་དོན་དེ་ད་ལྟ་ཐག་ཆོད་མེད་པའི་གནད་དོན་ཞིག་ཏུ་ངོས་འཛིན་གནང་དགོས་པའི་འབོད་སྐུལ་ཞུས་པ་དང་སྦྲགས། རྒྱ་ནག་གིས་བོད་ས་བཙན་བཟུང་རྗེས་རྒྱ་གར་དང་། བལ་ཡུལ། འབྲུག་སོགས་ཀྱི་ས་མཚམས་ལ་དཀའ་ངལ་འཕྲད་ཀྱི་ཡོད་སྐོར་སོགས་ཀྱི་ཐད་གསུངས། དེ་རྗེས་སྐུ་ཞབས་གྲོལ་ཀུན་ཨི་ས་ལགས་ཀྱིས་ཡུ་གུར་མི་མང་གི་ཛ་དྲག་གནད་དོན་སྤྱི་དང་། སྒོས་སུ་བཙོན་པའི་གསོག་སྒར་ནང་དུ་བཀག་ཉར་བྱས་པའི་མི་མང་ཚོར་དཀའ་སྡུག་ཆེན་པོ་འཕྲད་བཞིན་པའི་སྐོར། དེ་བཞིན་ཉེ་ལམ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་བཏོན་པའི་སྙན་ཐོའི་ནང་གི་ཤར་ཏུར་ཀིསྟན་ནང་རྒྱ་གཞུང་གིས་མི་རིགས་རྩ་མེད་གཏོང་བཞིན་པའི་སྐོར་ཞིབ་ཕྲ་བཀོད་མེད་པར་བློ་འཚབ་ཡོད་སྐོར་གསུངས་ཡོད་པ་རེད། ལྕམ་ཁིལ་བྷི་ནུར་སི་དིཊ་ལགས་ཀྱིས་ཁོང་ཉིད་དགེ་རྒན་གྱི་ཆེད་ལས་གཉེར་བཞིན་པའི་སྐབས་རྒྱ་གཞུང་གིས་འཛིན་བཟུང་བྱས་ཏེ་བཙོན་པའི་གསོག་སྒར་དུ་དཀའ་སྡུག་མྱངས་པའི་ལོ་རྒྱུས་དྲན་གསོ་དང་དེ་འབྲེལ་ལོ་རྒྱུས་གསར་འགོད་པ་རྣམས་ལ་གསལ་བཤད་གནང་། 

ཕྱོགས་མཚུངས་ལྷོ་སོག་མཐུན་ཚོགས་ཀྱི་ཚོགས་གཞོན་ཨོལ་ཧོ་ནུད་དའི་ཆིན་ (Olhunud Daichin) ལགས་ཀྱིས་རྒྱ་ནག་དམར་ཤོག་ཚོགས་པས་ཇི་ལྟར་ལྷོ་སོག་ནང་བཙན་འཛུལ་བྱས་ཏེ་ས་ཁུལ་དེ་རྒྱ་ནག་ཅན་དུ་བསྒྱུར་ཚུལ་སྐོར་གསུངས་རྗེས་ཉི་ཧོང་གི་འགྲོ་བ་མིའི་ཐོབ་ཐང་ལྟ་ཞིབ་པའི་ངེས་སྟོན་པ་ལྕམ་ཀ་ནེ་དོ་ཧི་ (Kanae Doi) ལགས་ཀྱིས་ཉི་ཧོང་གིས་འགྲོ་བ་མིའི་ཐོབ་ཐང་གི་གནད་དོན་ལ་ལྟ་ཕྱོགས་ཇི་ཡོད་དང་རྒྱབ་སྐྱོར་ཡོད་པའི་གསལ་བཤད་གནང་ཡོད། 

ཐེངས་འདིའི་གསར་འགོད་གསལ་བསྒྲགས་དེ་བཞིན་ (Pan Orient News Corporation) ཞེས་པའི་ཚོགས་པའི་སྐུ་ཞབས་ཁལ་ཊོན་ཨ་ཛ་རི་ (Khaldon Azhari) ལགས་ཀྱིས་སྟངས་འཛིན་གནང་ཞིང་། གསར་ཁང་ ༣༠ ཙམ་གྱི་གསར་འགོད་པ་མཉམ་ཞུགས་གནང་ཡོད་པ་དང་། སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ “100 Atrocities of CCP in Tibet” ཞེས་པའི་དཔེ་དེབ་འགྲེམས་སྤེལ་གནང་ཡོད་པ་རེད། ཚོགས་འདུའི་ནང་སྐུ་ཚབ་དོན་གཅོད་དང་ལྷན་དུ་དོན་ཁང་གི་ལས་བྱེད་ཚེ་ལྷ་ལགས་བཅར་ཡོད་པ་བཅས།།