༄༅། །འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཆོས་རིག་ལས་ཁུངས་ནས་ཕྱི་ལོ་ ༢༠༢༢ ཟླ་ ༡༠ ཚེས་ ༢༤ ནས་ཟླ ༡༡ ཚེས་ ༥ བར་དྷ་ས་བོད་ཀྱི་དཔེ་མཛོད་ཁང་དུ་དགེ་འདུན་པའི་ཚན་རིག་ངོ་སྤྲོད་ཟབ་སྦྱོང་ཐེངས་བདུན་པ་གོ་སྒྲིག་གནང་ཡོད།
དེ་ཡང་ཕྱི་ལོ་ ༢༠༡༡ ལོར་ཆོས་ཚོགས་ཐེངས་བཅུ་གཅིག་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལུང་རྟོགས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གནང་ཕྱོགས་ཟབ་གསལ་ལམ་སྟོན་ཇི་སྙེད་ཕེབས་པ་དང་། ཆོས་རིག་ལས་ཁུངས་ནས་ཕྱི་ལོ་ ༢༠༡༣ ལོར་ཆོས་བརྒྱུད་རིས་མེད་དགོན་སྡེ་ཆེ་གྲས་ལྔ་བཅུའི་སྐོར་གྱི་སྐུ་ཚབ་གདན་ཞུས་ཀྱིས་བཤད་སྒྲུབ་བསྟན་པ་གོང་འཕེལ་ལྷན་ཚོགས་ཞེས་པ་བསྐོངས་ཚོགས་བགྱིས་ཏེ་བཀའ་བསྡུར་ཞིབ་ལྷུག་གནང་སྐབས་ཐག་གཅོད་གྲོས་ཆོད་གཏན་འབེབས་བྱུང་བ་བཞིན་ཚན་རིག་འཛིན་གྲྭ་མེད་པའི་ཆོས་སྡེ་ཁག་ལ་དམིགས་ཏེ་དེང་དུས་ཀྱི་ཚན་རིག་ངོ་སྤྲོད་ཟབ་སྦྱོང་ཞེས་བོད་ཀྱི་དཔེ་མཛོད་ཁང་དང་ཟུང་འབྲེལ་གྱིས་ལག་བསྟར་ཞུས་དང་ཞུ་མུས་ལྟར། དྷ་ས་བོད་ཀྱི་དཔེ་མཛོད་ཁང་དུ་ཕྱི་ལོ་ ༢༠༢༢ ཟླ་ ༡༠ ཚེས་ ༢༤ ནས་ཟླ་ ༡༡ ཚེས་ ༥ བར་བདུན་ཕྲག་གཉིས་རིང་ཚན་རིག་འཛིན་གྲྭ་མེད་པའི་དགོན་སྡེ་ཁག་ནས་དགེ་བཙུན་གྲངས་ཉེར་བདུན་གདན་ཞུས་ཀྱིས་དེང་དུས་ཚན་རིག་གི་ཟབ་སྦྱོང་ཐེངས་བདུན་པ་གོ་སྒྲིག་ཞུས།
ཕྱི་ལོ་ ༢༠༢༢ ཟླ་ ༡༠ ཚེས་ ༢༤ ཉིན་གྱི་སྔ་དྲོ་ཆུ་ཚོད་ ༡༠ ཐོག་དབུ་འབྱེད་མཛད་སྒོ་གནང་བ་དང་། དེར་སྐུ་མགྲོན་གཙོ་བོ་ཆོས་རིག་ལས་ཁུངས་ཀྱི་དྲུང་ཆེ་འཆི་མེད་ཚེ་དབྱངས་ལགས་ཕེབས་པ་དང་ལམ་སྟོན་གསུང་བཤད་ཀྱང་གནང་། ཟབ་སྦྱོང་འདིར་སློབ་ཁྲིད་གནང་མཁན་བོད་ཀྱི་དཔེ་མཛོད་ཁང་གི་ཚན་རིག་སྡེ་ཚན་གྱི་དགེ་རྒན་ལྔ་ཡོད། ཐེངས་འདིའི་ཟབ་སྦྱོང་ནང་མཉམ་ཞུགས་གནང་མཁན་ནི། འབིར་དཔལ་ཡུལ་ཆོས་འཁོར་གླིང་ནས་དགེ་འདུན་པ་ ༣ དང་། བཙུན་དགོན་ཤུག་གསེབ་ཨོ་རྒྱན་རྫོང་ནས་བཙུན་མ་ ༡། དཔལ་སྤུངས་ཤེས་རབ་གླིང་ནས་དགེ་འདུན་པ་ ༡། འབྲི་གུང་བྱང་ཆུབ་གླིང་ནས་དགེ་འདུན་པ་ ༢། བཀའ་བརྒྱུད་ནང་བསྟན་མཐོ་སློབ་ནས་དགེ་འདུན་པ་ ༢། བཀའ་བརྒྱུད་ཐེག་ཆེན་གླིང་ནས་དགེ་འདུན་པ་ ༢། བཙུན་དགོན་དོན་བརྒྱུད་དགའ་ཚལ་གླིང་ནས་བཙུན་མ་ ༢། རྫོང་དཀར་ཆོས་སྡེ་ནས་དགེ་འདུན་པ་ ༢། སཱ་ལུ་ག་ར་སྲད་རྒྱུད་གྲྭ་ཚང་ནས་དགེ་འདུན་པ་ ༤། དཔལ་གཤེན་བསྟན་སྨན་རིའི་གླིང་ནས་དགེ་འདུན་པ་ ༢། བཙུན་དགོན་རཏྣ་སྨན་གླིང་ནས་བཙུན་མ་ ༢། དྷ་ས་རིགས་ལམ་སློབ་གཉེར་ཁང་ནས་དགེ་འདུན་པ་ ༤ བཅས་ཁྱོན་དགེ་བཙུན་ ༢༧ བྱུང་ཡོད། །
