༄༅། །རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གིས་ལོ་འཁོར་རྒྱ་ཁྱབ་ལས་འཆར་གྱི་ཆ་ཤས་སུ་ཕྱི་ལོ་ ༢༠༢༢ ཟླ་ ༡༠ ཚེས་ ༡༩ ནས་ ༢༡ བར་གསར་འགོད་ལས་རིགས་སློབ་སྦྱོང་གནང་བཞིན་པའི་རྒྱ་གར་གྱི་སློབ་ཕྲུག་རྣམས་ལ་བོད་དོན་སྐོར་གོ་རྟོགས་མཐོ་རུ་གཏོང་ཐབས་སུ་ལྟ་སྐོར་ལས་རིམ་ཞིག་གོ་སྒྲིག་གནང་ཡོད།
དེ་ཡང་འཕགས་བོད་འབྲེལ་མཐུད་ལས་ཁང་གི་འགན་འཛིན་ལས་ཚབ་བཀྲ་ཤིས་བདེ་སྐྱིད་ལགས་དང་ལས་འཆར་ཚན་པའི་འབྲེལ་ཡོད་ལས་བྱེད་ཆོས་ཉིད་ཚེ་རིང་ལགས་ཀྱིས་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་ལྡི་ལི་གསར་འགོད་ལས་རིགས་སློབ་གཉེར་ཁང་དུ་གསར་འགོད་ལས་རིགས་སློབ་སྦྱོང་གནང་བཞིན་པའི་སློབ་ཕྲུག་གྲངས་ ༢༦ དང་དགེ་རྒན་གྱི་སྐུ་ཚབ་གྲངས་གཉིས་བཅས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་དང་རྡ་སྟེང་བོད་ཁྱིམ་སློབ་གྲྭ་སོགས་ལ་ལྟ་སྐོར་དུ་ཁྲིད་གནང་ཡོད།
ཐོག་མར་ལྡི་ལི་གསར་འགོད་ལས་རིགས་སློབ་གཉེར་ཁང་དུ་གསར་འགོད་ལས་རིགས་སློབ་སྦྱོང་གནང་བཞིན་པའི་སློབ་ཕྲུག་རྣམས་ཀྱིས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་མཇལ་འཕྲད་ཞུས་ཡོད་པ་དང་། སྐབས་དེར་ཕྱི་དྲིལ་བཀའ་བློན་མཆོག་གིས་བོད་དོན་དང་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་ཀྱི་སྐོར་ངོ་སྤྲོད་གསུང་བཤད་གནང་གྲུབ་མཚམས་སློབ་ཕྲུག་རྣམས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་མཇལ་འཕྲད་ཞུས་ཡོད་པ་མ་ཟད། ཕྱི་དྲིལ་བོད་ཀྱི་འགྲེམས་སྟོན་ཁང་དུ་ལྟ་སྐོར་གྱིས་བོད་དོན་སྐོར་རྒྱུས་ལོན་གནང་ཡོད། གཞང་ཡང་གསར་འགོད་ལས་རིགས་སློབ་སྦྱོང་གནང་བཞིན་པའི་སློབ་ཕྲུག་རྣམས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་མཇལ་འཕྲད་ཞུས་ཡོད་པ་དང་། དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་གནས་སྟངས་དང་འཕགས་བོད་གཉིས་ཀྱི་འབྲེལ་བ་སོགས་ཀྱི་སྐོར་ངོ་སྤྲོད་གསུང་བཤད་དང་སློབ་ཕྲུག་གི་དྲི་བ་ཁག་ལ་ལན་འདེབས་གནང་ཡོད། དེ་ནས་སློབ་ཕྲུག་རྣམས་རྡ་སྟེང་བོད་ཕྲུག་ཁྱིམ་སྡེ་ལ་ལྟ་སྐོར་དང་གཙུག་ལག་ཁང་དུ་བཅར་ཡོད།
ལྟ་སྐོར་གྱི་ཉིན་གཉིས་པའི་སྐབས་སློབ་ཕྲུག་རྣམས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་། བོད་མི་མང་སྤྱི་འཐུས་ལྷན་ཚོགས། བོད་ཀྱི་དཔེ་མཛོད་ཁང་བཅས་ལ་ལྟ་སྐོར་དང་། ཉིན་རྒྱབ་རྡ་ས་ས་གནས་འགོ་འཛིན་ལས་ཁུངས་ཀྱི་མཐུན་འགྱུར་འོག་རྡ་སར་རྟེན་གཞི་བྱས་པའི་གཞུང་ཁོངས་མིན་པའི་ཚོགས་པ་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་ཀྱི་ཟློས་གར་ཚོགས་པ་སོགས་ལ་ལྟ་སྐོར་གནང་སྟེ་བོད་དོན་སྐོར་རྒྱུས་ལོན་གནང་ཡོད།
ལྟ་སྐོར་གྱི་ཉིན་གསུམ་པའི་སྐབས་སློབ་ཕྲུག་རྣམས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་ཡོད་པ་དང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་སྩལ་ཡོད། དགོང་དྲོ་འཕགས་བོད་འབྲེལ་མཐུད་ལས་ཁང་གི་འགན་འཛིན་ལས་ཚབ་བཀྲ་ཤིས་བདེ་སྐྱིད་ལགས་ཀྱིས་བོད་དོན་སྐོར་གོ་རྟོགས་མཐོ་རུ་གཏོང་ཐབས་སུ་ལྟ་སྐོར་ལས་རིམ་མཇུག་སྡོམ་གསུང་བཤད་གནང་སྐབས་གསར་འགོད་ལས་རིགས་སློབ་སྦྱོང་གནང་བཞིན་པའི་སློབ་ཕྲུག་དང་དགེ་རྒན་གྱི་སྐུ་ཚབ་བཅས་ནས་བོད་དོན་སྐོར་གོ་རྟོགས་ཀྱི་ལས་རིམ་གོ་སྒྲིག་གནང་བར་ཐུགས་རྗེ་ཆེ་ཞེས་དང་། ཐེངས་འདིའི་ལྟ་སྐོར་སྐབས་བོད་དོན་སྐོར་གོ་རྟོགས་ལེགས་པོ་བྱུང་ཡོད་པ་མ་ཟད། མ་འོངས་པར་བོད་དོན་སྐོར་རྒྱ་གར་མང་ཚོགས་ལ་གོ་རྟོགས་སྤེལ་རྒྱུ་ཡིན་ཞེས་གསུངས་ཡོད་པ་བཅས།།
