༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༠༣ ཉིན་ཨོསྟྲེ་ལི་ཡཱའི་ཝིག་ཀྲོ་རི་ཡའི་ས་གནས་སུ་བོད་ཀྱི་མང་གཙོའི་དུས་ཆེན་ཐེངས་ ༦༢ པ་སྲུང་བརྩི་ཞུས་འདུག

དེ་ཡང་མཛད་སྒོའི་ཐོག་མར་ཝིག་ཀྲོ་རི་ཡའི་བོད་རིགས་ཚོགས་པའི་ཚོགས་གཙོ་དཔལ་ལྡན་དོན་གྲུབ་ལགས་ཀྱིས་ཕེབས་བསུའི་གསུང་བཤད་དང་ལས་བསྡོམས་སྙིང་བསྡུས་སྒྲོགས་སྦྱང་གནང་རྗེས་དངུལ་གཉེར་རིག་འཛིན་དཔལ་མོ་ལགས་ཀྱིས་རྩིས་ཁྲ་སྒྲོགས་སྦྱང་གནང་འདུག མཛད་སྒོའི་སྐུ་མགྲོན་གཙོ་བོར་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་གདན་ཞུས་ལྟར་ཁོང་གིས་བོད་མིའི་སྒྲིག་འཛུགས་བཀའ་ཤག་གི་གསུང་འཕྲིན་སྒྲོགས་སྦྱང་གནང་བ་སྦྲགས། ཕྱི་རྒྱལ་ཁག་ཏུ་བོད་རིགས་ཚོགས་པའི་གལ་གནད་དང་། ཚོགས་པའི་ངོས་ནས་བོད་རིགས་བར་རྡོག་རྩ་ཆིག་སྒྲིལ་ཡོང་ཐབས་འབད་རྩོལ་ཞུ་རྒྱུ་གཙོས་བོད་ཀྱི་ངོ་བོ་ལྡན་པའི་བོད་རིགས་གཞོན་སྐྱེས་གསོ་སྐྱོང་གནང་གལ་ཆེ་ཚུལ་སོགས་ཀྱི་སྐོར་གསུངས། 

དམིགས་བསལ་སྐུ་མགྲོན་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་བ་མ་ཟད། བོད་ཀྱི་མང་གཙོའི་གལ་གནད་དང་། བོད་རིགས་གཞོན་སྐྱེས་རྣམས་བོད་ཀྱི་འཐབ་རྩོད་ནང་མཉམ་ཞུགས་གནང་རྒྱུ་གལ་ཆེན་པོ་ཡིན་སྐོར་གསུངས་འདུག གཞན་ཡང་མཛད་སྒོའི་སྐབས་༸རྒྱལ་བའི་སྐུ་ཕྱྭའི་ཆེད་ཞབས་རིམས་གསོག་སྒྲུབ་དང་། གཞས་སྣ་ཁག་གཅིག་ཀྱང་གཟིགས་འབུལ་ཞུས་འདུག་པའི་ཁར། མཐར་གཟའ་མཇུག་སློབ་གྲྭའི་ནང་དང་བླངས་གནང་མཁན་དགེ་རྒན་རྣམས་ལ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཐུགས་རྗེ་ལེགས་འབུལ་མཚོན་ཕྱིར་དཀར་གཙང་མཇལ་དར་རེ་སྒྲོན་འདུག་པ་དང་། ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་ཉེ་ཆར་རྒྱ་གར་ནས་གསར་དུ་འབྱོར་བའི་བོད་མི་རྣམས་ལ་ཕེབས་བསུའི་མཇལ་དར་སྒྲོན་འདུག ཕྱི་ཟླ་ ༠༩ ཚེས་ ༠༤ ཉིན་སྐུ་ཚབ་དོན་གཅོད་ཀརྨ་སེངྒེ་ལགས་དང་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་རྣམ་གཉིས་བྷན་ཊི་གོར་ཆགས་པའི་མཆོད་རྟེན་ཆེན་མོར་ཕེབས་ཏེ་མཆོད་རྟེན་ཆེན་མོའི་དབུ་འཛིན་ཨི་ཡན་གི་རིན་ (Ian Green) ལགས་དང་། ཨ་ཏི་ཤ་ཆོས་ཚོགས་ཀྱི་ངེས་སྟོན་པ་རྒྱལ་མཚན་དོན་གྲུབ་ལགས་ཀྱིས་ཕེབས་བསུ་སྣེ་ལེན་ཞུས་པ་མ་ཟད་མཆོད་རྟེན་ཆེན་མོའི་ནང་དུ་གཟིགས་སྐོར་ལ་འཁྲིད་གནང་འདུག དེ་བཞིན་ཁོང་གཉིས་ནས་ཉེ་འགྲམ་དུ་ཆགས་པའི་དགོན་པར་གནས་མཇལ་དུ་ཕེབས་སྐབས་དགེ་བཤེས་རབ་བརྟན་ལགས་ནས་ཕེབས་བསུ་ཞུས་འདུག 

སྤྱིར་ཕྱི་ལོ་ ༢༠༠༧ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བྷན་ཊི་གར་ཆིབས་སྒྱུར་བསྐྱངས་སྐབས་མཆོད་རྟེན་ཆེན་མོར་རབ་གནས་མཛད་ཡོད་ཅིང་། མཆོད་རྟེན་ཆེན་མོ་དེའི་མཐོ་ཚད་མི་ཊར་ ༥༠ ཡོད་པས་དེ་ཉིད་ནུབ་ཕྱོགས་རྒྱལ་ཁབ་ཁུལ་གྱི་མཆོད་རྟེན་ཆེ་ཤོས་སུ་གྱུར་ཡོད་པ་དང་། དེ་ཉིད་བོད་རྒྱང་རྩེར་ཡོད་པའི་དཔལ་འཁོར་ཆོས་སྡེའི་འདྲ་གཟུགས་རེད་འདུག་པ་བཅས།།