༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༢༤ ཉིན་ཨོསྟྲེ་ལི་ཡཱའི་གྲོང་ཁྱེར་སིཊ་ནིར་རྒྱ་ནག་མང་གཙོའི་མཐུན་སྦྲེལ་ཞེས་པའི་ཚོགས་པས་གོ་སྒྲིག་ཞུས་པའི་མང་གཙོ་སྲུང་སྐྱོབ་ཆེད་རྒྱ་ནག་དམར་ཤོག་ཚོགས་པར་གདོང་ལེན་བྱེད་ཕྱོགས་སྐོར་གྱི་ཚོགས་འདུའི་དབུ་འབྱེད་མཛད་སྒོར་ཨོསྟྲི་ལི་ཡ་སྐུ་ཚབ་དོན་གཅོད་ཀརྨ་སེངྒེ་ལགས་མཉམ་ཞུགས་གནང་ཡོད། 

སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་དབུ་འབྱེད་གསུང་བཤད་ནང་རྒྱ་ནག་དམར་ཤོག་གཞུང་གིས་འཛམ་གླིང་སྤྱི་ལ་ཉེན་ཁ་བཟོ་བཞིན་ཡོད་ཅིང་། གལ་ཏེ་རྒྱ་ནག་གི་ཧམ་སེམས་ཆེ་བའི་རྒྱ་བསྐྱེད་བསམ་བློ་དང་དྲག་གནོན་ཆེ་བའི་སྲིད་བྱུས་ལ་གདོང་ལེན་མ་བྱས་ན་མང་གཙོ་དང་། གུ་ཡངས་རིང་ལུགས། འགྲོ་བ་མིའི་ཐོབ་ཐང་། ཁོར་ཡུག་ལ་ཉེན་ཡོད་སྐོར་དང་། དེ་བཞིན་ཆོས་ལ་ཡིད་ཆེས་མེད་པའི་རྒྱ་ནག་དམར་ཤོག་གཞུང་གིས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ལམ་སྲོལ་ལ་ཐེ་གཏོགས་བྱེད་བཞིན་པའི་སྐོར་འགྲེལ་བརྗོད་གནང་བ་མ་ཟད། རྒྱལ་སྤྱིའི་མི་མང་ནས་བོད་ཀྱི་གནད་དོན་དེ་རྒྱལ་སྤྱིའི་དཀའ་ངལ་ཞིག་ཏུ་ངོས་འཛིན་གནང་དགོས་པའི་འབོད་སྐུལ་ཞུས་གནང་ཡོད། 

ཚོགས་འདུའི་ཐོག་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། ཨོསྟྲེ་ལི་ཡཱ་བོད་རིགས་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས་ཀྱང་མཉམ་ཞུགས་གནང་ཡོད། སྐབས་དེར་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཡོང་འགྱུར་བོད་རྒྱ་གཉིས་ཀྱི་འབྲེལ་ལམ་སྐོར་དང་། སྐལ་བཟང་ཚེ་རིང་ལགས་ཀྱིས་ད་ལྟའི་བོད་ནང་གི་གནས་སྟངས་སྐོར་གསུང་བཤད་གནང་ཡོད། གཞན་ཡང་ཚོགས་འདུའི་ནང་རྒྱ་ནག་མང་གཙོ་དོན་གཉེར་བ་དང་། རྒྱ་ནག་སྐོར་གྱི་མཁས་དབང་། ཨོསྟྲེ་ལི་ཡཱ་དང་ནིའུ་ཛི་ལེནྜ་ནང་ཡོད་པའི་རྒྱ་ནག་དམར་ཤོག་ཚོགས་པའི་གཉའ་གནོན་མྱོང་མཁན་གྱི་མཐུན་ཕྱོགས་ཚོགས་པའི་སྐུ་ཚབ་སོགས་ཚོགས་བཅར་བ་ལྔ་བཅུ་ལྷག་མཉམ་ཞུགས་གནང་ཡོད་པ་བཅས།།