༄༅། །ཕྱི་ལོ་ ༢༠༢༢ ཟླ་ ༩ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྕམ་སྐུ་ལི་ཛི་ཊི་ར་སི་ (Liz Truss) མཆོག་ཨིན་ཡུལ་གྱི་སྲིད་བློན་དུ་བདམས་ཐོན་བྱུང་བར་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན། ལོ་རྒྱུས་ཀྱི་ཐོག་ནས་ང་ཚོ་བོད་དང་ཨིན་ཡུལ་དབར་ཡུན་རིང་ནས་ཐུན་མོང་མ་ཡིན་པའི་འབྲེལ་བ་བྱུང་ཡོད་པ་མ་ཟད། དུས་ད་ལྟ་ཡིན་ནའང་ང་ཚོས་ཕྱི་ལོ་ ༡༩༥༩ གོང་ཨིན་ཡུལ་གཞུང་གིས་བོད་དུ་བསྐོ་བཞག་བྱས་པའི་ལས་བྱེད་རྣམས་ཀྱི་ནང་མི་ཚོ་དང་ལྷན་མུ་མཐུད་འབྲེལ་བ་བྱེད་བཞིན་ཡོད།

ངོས་ཀྱིས་ཨིན་ཡུལ་གྱི་གྲོགས་པོ་ཚོས་བོད་མིའི་མངོན་འདོད་རང་དབང་དང་ཆེ་མཐོང་ལ་ཐུགས་སྣང་དང་རྒྱབ་སྐྱོར་གནང་བཞིན་པར་རྗེས་སུ་ཡི་རང་ཞུ་ཡི་ཡོད། ངོས་ཀྱིས་ཨིན་ཡུལ་མུ་མཐུད་འཕེལ་རྒྱས་སུ་འགྲོ་བ་དང་། ཨིན་ཡུལ་གྱི་ངོས་ནས་སྔར་ལས་ལྷག་གཅིག་ལ་གཅིག་བརྟེན་པའི་འཛམ་གླིང་ཧྲིལ་པོ་འདི་ཉིད་ཞི་བདེ་དང་སྲ་བརྟན་ཡོང་སླད་ཞབས་འདེགས་རླབས་ཆེན་བསྒྲུབ་ཐུབ་པའི་རེ་བ་རྒྱག་གི་ཡོད། ཅེས་འཁོད་ཡོད།།

                                        གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།