༄༅།། ཨུ་རུ་སུའི་དབུ་ཁྲིད་ཟུར་པ་སྐུ་ཞབས་མི་ཁལ་གོར་བྷ་ཆབ་མཆོག་ཕྱི་ལོ་ ༢༠༢༢ ཟླ་བ་ ༠༨ ཚེས་ ༣༠ ཉིན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་མ་ཐག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་གསོའི་གསུང་འཕྲིན་ཞིག་སྩལ་འདུག 

དེ་ཡང་ཐུགས་གསོའི་གསུང་འཕྲིན་ནང་མགོན་པོ་མཆོག་གིས། ངོས་ཀྱི་ཆོས་གྲོགས་ལ་བསྔོ་སྨོན་ཞུ་རྒྱུ་དང་ཁོང་གི་སྲས་མོ་ཨི་རི་ན་ཝིར་གྷན་ས་ཀ་ཡ་ (Irina Virganskaya) ལགས་དང་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན། ཁོང་གིས་རྒྱལ་ཁབ་ནང་གུ་ཡངས་དང་གསར་བརྗེ་གནང་རྒྱུའི་མཚོན་རྡུལ་ཕྲན་མཚོན་ཆར་དགག་པ་གནང་བར་ངོས་ཀྱིས་ཁོང་དང་ཁོང་གི་མཛད་རྗེས་ལ་གུས་བརྩི་ཞུ་གི་ཡོད། ཁོང་གིས་འཛམ་གླིང་ནང་རྡུལ་ཕྲན་མཚོན་ཆའི་གྲངས་ཉུང་དུ་གཏང་རྒྱུར་ཕྱག་ལས་ཧུར་ཐག་གནང་ཡོད། 

འདས་པའི་ལོ་ཟླའི་ནང་ངོས་གཉིས་འཛམ་གླིང་ས་ཕྱོགས་གང་སར་ཞི་བདེའི་འདུ་འཛོམས་འདྲ་མིན་ནང་མཉམ་ཞུགས་སྐབས་ངོས་ཀྱིས་ཁོང་ལན་མང་མཇལ་མྱོང་བ་མ་ཟད། ངོས་གཉིས་བར་འབྲེལ་བ་བཟང་པོ་ཡོད། མི་ཁལ་གོར་བྷ་ཆབ་མཆོག་ནི་འཆར་སྣང་ལྡན་ཞིང་མིག་དཔེར་འོས་པའི་དབུ་ཁྲིད་ཅིག་རེད། ཁོང་བགྲེས་ཡོལ་ལ་ཕེབས་ཟིན་པའི་རྗེས་སུའང་འཛམ་གླིང་ནང་ཞི་བདེ་དར་སྤེལ་དང་བར་སྡུམ་འགྲིགས་འཇགས་མུ་མཐུད་གནང་སྟེ་བཞུགས་ཡོད། ཁོང་གིས་དབུ་འཛུགས་གནང་བའི་འཛམ་གླིང་ནོ་ཝེལ་གཟེངས་རྟགས་འཐོབ་མཁན་མི་སྣའི་ལྷན་ཚོགས་བརྒྱུད་ནོ་ཝེལ་གཟེངས་རྟགས་འཐོབ་མཁན་མི་སྣ་དང་འབྲེལ་ཡོད་ཚོགས་པ་རྣམས་མཉམ་འཛོམས་ཀྱིས་སྔར་ལས་ཞི་བདེ་ལྡན་པའི་འཛམ་གླིང་སྐྲུན་ཐབས་སུ་ཐུན་མོང་གི་བསམ་ཚུལ་འདོན་གྱི་ཡོད་པ་རེད། ཅེས་དང་། 

མཐར་མགོན་པོ་གང་ཉིད་མཆོག་གིས། ཁོང་གིས་མི་ཚེ་དོན་དང་ལྡན་པ་བསྐྱལ་ཡོད། ཁོང་གིས་སེམས་སྐུལ་གནང་བ་ལྟར་ང་ཚོས་རང་དབང་ལྡན་ཞིང་དམག་འཁྲུགས་མེད་པའི་འཛམ་གླིང་ཞིག་བསྐྲུན་པའི་ཐོག་ནས་ཁོང་གི་སྙིང་སྟོབས་གསོན་པོར་འཇོག་དགོས་པ་ཡིན། ཞེས་གསུང་འཕྲིན་སྩལ་ཡོད་པ་བཅས།།