༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༡༨ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་པའི་འོག་ཡོད་པའི་བོད་མིའི་གཟའ་མཇུག་སློབ་གྲྭའི་ཚོགས་འདུ་ཐེངས་ལྔ་པ་བསྐོང་ཚོགས་གནང་ཡོད། ཚོགས་འདུའི་ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། དོན་ཁང་གི་རྩིས་པ་བསྟན་འཛིན་ཆོས་བཟང་ལགས། སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་གཙོ་ཀརྨ་ཆོས་སྐྱིད་ལགས་དང་ཚོགས་གཞོན་བསྟན་འཛིན་དབང་འདུས་ལགས། དེ་བཞིན་གཟའ་མཇུག་སློབ་གྲྭ་ཁག་ ༡༩ འགོ་འཛིན་བཅས་ཚོགས་བཅར་ཞུས་ཡོད་ཅིང་། ཚོགས་འདུའི་གཙོ་སྐྱོང་བོད་མིའི་གཟའ་མཇུག་སློབ་གྲྭའི་ངེས་སྟོན་པ་ཚེ་དབང་མུན་སེལ་ལགས་ཀྱིས་གནང་ཡོད་པ་རེད།
སྐབས་དེར་ངེས་སྟོན་པ་ཚེ་དབང་མུན་སེལ་ལགས་ཀྱིས་གཟའ་མཇུག་སློབ་གྲྭའི་སྤྱི་ཡོངས་ཀྱི་གནས་བབ་དང་ལས་གཞི་ཁག་གི་སྐོར་ངོ་སྤྲོད་གནང་རྗེས་གཟའ་མཇུག་སློབ་གྲྭའི་འགན་འཛིན་རྣམས་ནས་སློབ་གྲྭ་སོ་སོའི་གྲུབ་འབྲས་དང་། དཀའ་ངལ། མ་འོངས་ལས་འཆར་སོགས་ཀྱི་ཐད་གྲོས་བསྡུར་གནང་ཡོད་པ་མ་ཟད། སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་གཙོ་དང་ཚོགས་གཞོན་གཉིས་ནས་བོད་མིའི་གཟའ་མཇུག་སློབ་གྲྭའི་ཁྲིམས་སྒྲིག་ཁག་གི་སྐོར་ངོ་སྤྲོད་དང་དེ་དོན་འབྲེལ་ཡོད་རྣམས་ཀྱིས་ལག་བསྟར་གནང་དགོས་པའི་ལམ་སྟོན་གནང་ཡོད།
སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་འབྲེལ་ཡོད་གཟའ་མཇུག་སློབ་གྲྭ་སོ་སོས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་བཞིན་པར་བསྔགས་བརྗོད་དང་ཐུགས་རྗེ་ལེགས་འབུལ་ཞུས་པ་དང་སྦྲགས། སྤྱི་ཚོགས་ཞབས་ཞུ་འདི་བརྒྱུད་མ་འོངས་བོད་ཀྱི་སོན་རྩ་རྣམས་ལ་བོད་ཀྱི་ཆོས་དང་རིག་གཞུང་གི་གཞི་རྩ་འདིང་བཞིན་ཡོད་པ་དང་། ལས་དོན་སྐབས་མཚམས་རེ་དཀའ་ངལ་རིགས་འཕྲད་སྲིད་ནའང་སེམས་ཤུགས་མ་ཆགས་པར་བོད་སྤྱི་པའི་དོན་ལ་འབད་འབུངས་སྔར་ལྷག་གནང་དགོས་པའི་གཞེན་སྐུལ་གནང་།
ཕྱོགས་མཚུངས་ཟླ་འདིའི་ཕྱི་ཚེས་ ༡༧ ཉིན་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་རྩིས་པ་བསྟན་འཛིན་ཆོས་བཟང་ལགས་གཉིས་སུད་སི་དང་ལིག་ཏེན་སིཊཡན་བོད་རིགས་མི་མང་གིས་གོ་སྒྲིག་ཞུས་པའི་བོད་ཀྱི་ཉིན་མོ་ཞེས་པའི་དུས་སྟོན་ལ་མཉམ་ཞུགས་གནང་། དུས་སྟོན་ཐོག་གཟའ་མཇུག་སློབ་གྲྭའི་སློབ་ཕྲུག་དང་ས་གནས་རིག་གཞུང་ཚོགས་པས་གཞས་སྣ་འཁྲབ་སྟོན་དང་སྙན་ངག་གྱེར་འདོན་སོགས་རིག་གཞུང་དང་འབྲེལ་བའི་བྱེད་སྒོ་སྤེལ་ཡོད་པ་དང། དེ་རྗེས་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་མང་ཚོགས་ལ་གསུང་བཤད་དང་དྲི་བ་ཁག་ལ་ལན་འདེབས་གསལ་བཤད་གནང་ཡོད་པ་བཅས།།
