༄༅། །མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༥༡ འཚོགས་བཞིན་པ་དང་བསྟུན། སུད་སི་དང་ལིག་ཏེན་སིཊ་ཡན་བོད་རིགས་མི་མང་གིས་ཕྱི་ལོ་ ༢༠༢༢ ཟླ་ ༠༩ ཚེས་ ༢༣ ཉིན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོའི་ལས་ཁུངས་ཀྱི་མདུན་དུ་རྒྱ་ནག་གཞུང་གིས་མུ་མཐུད་བོད་ནང་དྲག་གནོན་བྱས་དང་བྱེད་བཞིན་པར་ཞི་བའི་སྐད་འབོད་ཤུགས་ཆེ་གནང་ཡོད།
སུད་སི་དང་ལིག་ཏེན་སིཊ་ཡན་བོད་རིགས་མི་མང་གིས་ལག་ཏུ་བོད་ཀྱི་རྒྱལ་དར་བཟུང་ནས་རྒྱ་ནག་གཞུང་གིས་བོད་ནང་མི་རིགས་དང་རིག་གཞུང་རྩ་གཏོར་གྱི་སྲིད་བྱུས་སྤེལ་བཞིན་པ་མཚམས་འཇོག་དགོས་པའི་སྐད་འབོད་ཤུགས་ཆེ་གནང་ཡོད་པ་མ་ཟད། ཉེ་ཆར་གསར་དུ་བསྐོ་བཞག་བྱས་པའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་སྐུ་ཞབས་ཝོལ་ཀར་ཊར་ཀི་ (Volker Turk) མཆོག་ལ་བོད་མིའི་སྐད་འབོད་ལ་ཐུགས་སྣང་གནང་དགོས་པའི་ཞུ་ཡིག་ཕུལ་ཡོད།
དེ་ཡང་སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་འདུ་འཛོམས་ཐོག་རྒྱ་ནག་དམར་ཤོག་གཞུང་གི་དྲག་གནོན་འོག་ཡོད་པའི་བོད་ནང་གི་བོད་མི་རྣམས་ཀྱི་ཆེད་དུ་སྐད་འབོད་རྒྱག་དགོས་པའི་གལ་གནད་དང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ཟུར་པ་ལྕམ་སྐུ་མི་ཤེལི་བྷ་ཤེ་ལེཌི་མཆོག་གིས་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་གནང་མེད་པ་མ་ཟད། རྒྱལ་སྤྱི་ཡོངས་དང་ལྷག་པར་བོད་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་ཀྱི་འགན་འཁུར་གནང་མེད་པ་སོགས་ཀྱི་གསུང་བཤདང་གནང་ཡོད།
ཞི་བའི་སྐད་འབོད་ནང་སུད་སི་བོད་ཀྱི་བུད་མེད་ཚོགས་པའི་ཚོགས་གཞོན་པ་སངས་སྒྲོལ་མ་ལགས་དང་། ཡུ་རོབ་གཞོན་ནུ་མཐུན་ཚོགས་ཀྱི་ཚོགས་གཙོ་དགྲ་ལྷ་ལགས། སུད་བོད་མཛའ་འབྲེལ་ཚོགས་པའི་སྐུ་ཚབ་བསྟན་འཛིན་དབང་མོ་ལགས་དང་ཨུ་ཝེ་མེ་ཡ་ (Uwe Meya) ལགས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་དབང་ལྡན་སྐྱབས་ལགས། དེ་བཞིན་སུད་སི་དང་ལིག་ཏེན་སིཊ་ཡན་བོད་རིགས་མི་མང་སོགས་མཉམ་ཞུགས་གནང་ཡོད།
སུད་སི་དང་ལིག་ཏེན་སིཊ་ཡན་བོད་རིགས་མི་མང་གི་ཚོགས་གཙོ་ཀརྨ་ཆོས་སྐྱིད་ལགས་དང་སུད་སི་བོད་ཀྱི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གི་ལས་ཁུངས་སུ་ཞུ་ཡིག་ཕུལ་ཏེ་སྐུ་ཞབས་ཝོལ་ཀར་ཊར་ཀི་ (Volker Turk) མཆོག་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོར་བསྐོ་བཞག་བྱུང་བར་འཚམས་འདྲི་དང་བོད་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་བོད་མིའི་སྐད་འབོད་ལ་ཐུགས་སྣང་གནང་དགོས་པའི་འབོད་སྐུལ་ཞུས་ཡོད།
སུད་སི་དང་ལིག་ཏེན་སིཊ་ཡན་བོད་རིགས་མི་མང་གིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ལ་ཕུལ་བའི་ཞུ་ཡིག་དེའི་ནང་གཙོ་བོ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཉིན་རེ་བཞིན་ཇེ་སྡུག་དང་ཇེ་ཞན་དུ་འགྲོ་བཞིན་ཡོད་པ་མ་ཟད། རྒྱ་ནག་གཞུང་གིས་བོད་ནང་ཏོག་དབྱིབས་གཉན་རིམས་ལ་ཁ་གཡར་ནས་བོད་མདོ་དབུས་ཁམས་གསུམ་གྱི་ས་ཁུལ་ཡོངས་རྫོགས་སུ་འགྲོ་འདུག་གི་རང་དབང་ལ་དམ་བསྒྲགས་དང་། ལྷག་པར་བོད་མི་ཏོག་དབྱིབས་གཉན་རིམས་འགོས་ཡོད་མཁན་དང་མེད་མཁན་ཚང་མ་མཉམ་དུ་འགོག་དབྱེ་ཟུར་འཇོག་ཁང་དུ་བཙན་དབང་གིས་བཅུག་སྟེ་གཞི་རྩའི་སྨན་བཅོས་མཐུན་རྐྱེན་དང་ཞལ་ལག་འདང་ངེས་སྤྲོད་ཀྱི་མེད་སྟབས། བོད་མི་རྣམས་ལ་འགོག་དབྱེ་ཟུར་འཇོག་ཁང་དུ་ལུས་སེམས་དང་ལྟོགས་སྐོམ་གྱི་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་པ། དེ་བཞིན་རྒྱ་ནག་གཞུང་གིས་བོད་ཀྱི་ངོ་བོ་རྩ་བརླག་ཏུ་གཏང་རྒྱུའི་སྲིད་བྱུས་ཟིན་ཏེ་བོད་མིའི་ཆོས་དང་རིག་གཞུང་། སྐད་ཡིག་བཅས་རྒྱ་ནག་ཅན་དུ་བསྒྱུར་དང་སྒྱུར་བཞིན་པ་སོགས་ཀྱི་སྐོར་བོད་མི་ཚོས་ཐུགས་འཚབ་ཧ་ཅང་ཆེན་པོ་གནང་གི་ཡོད་པའི་སྐོར་འཁོད་ཡོད། །
