༄༅། །བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཕྱི་ལོ་ ༢༠༢༢ ཟླ་བ་ ༠༩ ཚེས་ ༢༢ ནས་ ༢༥ བར་ཉིན་གྲངས་བཞིའི་རིང་སྦིར་དང་ཅོན་ཏ་ར། གངས་སྐྱིད། སྨན་རྩིས་ཁང་། ཡོངས་གླིང་བཅས་ཀྱི་བྱིས་བཅོལ་ཁང་གི་མ་མ་དང་ལས་བྱེད་རྣམས་ལ་བྱིས་པ་ལྟ་སྐྱོང་དང་སློབ་གསོའི་ཟབ་སྦྱོང་ཞིག་ཕུལ་ཡོད། ཟབ་སྦྱོང་གི་སློབ་སྟོན་པར་བསྟན་འཛིན་བདེ་སྐྱིད་ལགས་ཕེབས་ཡོད་ཅིང་། ཁོང་མོས་བྱིས་པ་ཆུང་དུས་སྐབས་སུ་ཤེས་ཡོན་སྤྲོད་ཕྱོགས་དང་། ཕྲུ་གུར་ལྟ་རྟོག་བྱེད་མཁན་ལས་བྱེད་རྣམས་ཀྱི་ཀུན་སྤྱོད་ཁྱེར་གསོ། ཁོར་ཡུག་བཟང་པོ་སྐྲུན་སྟངས། ཕྲུ་གུའི་ཚོར་སྣང་ཡར་རྒྱས། སྐད་བརྡ། དཀལ་ངལ་སེལ་ཐབས། གྲངས་རྩིས། ལུས་རྩལ་སོགས་ཀྱི་གལ་གནད་སྐོར་ལམ་སྟོན་གནང་ཡོད་པ་རེད།
ཟབ་སྦྱོང་རྗེས་སུ་ཚོགས་བཅར་བ་འགའ་ཤས་ཀྱིས་ཟབ་སྦྱོང་འདི་བརྒྱུད་ཕྲུ་གུའི་ལོ་རིམ་གཞིར་བཟུང་ལྟ་སྐྱོང་བྱེད་ཕྱོགས་ཀྱི་ཐབས་ལམ་གསར་པ་མང་པོ་ཤེས་རྟོགས་བྱུང་སྐོར་བསམ་ཚུལ་བཏོན་གནང་ཡོད། ཐེངས་འདིའི་ཟབ་སྦྱོང་ནང་ཁྱོན་བསྡོམས་ཚོགས་བཅར་བ་ ༡༣ མཉམ་ཞུགས་གནང་ཡོད་པ་དང་། དེ་ཉིད་བསྟན་འཛིན་ཚེ་དགའ་ལགས་ཀྱི་འབྲེལ་མཐུད་དང་ཨ་རིའི་རོགས་ཚོགས་ཀྱི་མཐུན་འགྱུར་འོག་གོ་སྒྲིག་ཞུས་ཡོད་པ་བཅས།།
