༄༅། །བ་རཱ་ཛིལ་སྲིད་གཞུང་གི་འཕྲོད་བསྟེན་ལྷན་ཁང་གི་སྨན་པ་ལྕམ་ཀྲཱྀས་ཊི་ནེ་མ་ཊོ་ (Christiane Matos) ལགས་ལྷོ་ཨ་རིའི་བོད་ཁང་དུ་ཕེབས་ཡོད། སྐབས་དེར་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་དཀར་གཙང་མཇལ་དར་དང་བཅས་ཕེབས་བསུ་ཞུས་རྗེས་བོད་ཀྱི་རིག་གཞུང་དང་འབྲེལ་བའི་གཟིགས་མོ་ཁག་གཅིག་གཟིགས་འབུལ་དང་བོད་ཁང་གི་དམིགས་ཡུལ་སོགས་ཀྱི་སྐོར་ངོ་སྤྲོད་གནང་ཡོད།

དེ་རྗེས་ཐང་ཀའི་སྒྱུ་རྩལ་བ་ངག་དབང་བློ་གྲོས་ལགས་ཀྱིས་ཁོང་ཕྱི་ལོ་ ༢༠༢༢ ཟླ་བ་ ༩ ཚེས་ ༧ ནས་ ༡༨ བར་འཚོག་བཞིན་པའི་བོད་ཀྱི་སྒྱུ་རྩལ་འགྲེམས་སྟོན་དུ་གཟིགས་སྐོར་ལ་འཁྲིད་གནང་ཡོད། ལྕམ་སྐུ་ཀྲཱྀས་ཊི་ནེ་མ་ཊོ་ལགས་དང་ལྷན་དུ་སྨན་པ་ཕར་ནན་ཊོ་བྷིག་ནར་ཊི་ (Fernando Bignardi) ལགས་ཕེབས་ཡོད་ཅིང་། སྐབས་དེར་བོད་ཀྱི་སྨན་རྩིས་ཁང་གི་སྨན་པ་ལྷུན་གྲུབ་རྡོ་རྗེ་ལགས་ཀྱིས་དྲ་ཐོག་བོད་ཀྱི་གསོ་བ་རིག་པའི་སྐོར་ངོ་སྤྲོད་གནང་བ་མ་ཟད་དྲི་བ་ཁག་ལ་ལན་འདེབས་གནང་ཡོད། སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་བོད་ཀྱི་གསོ་བ་རིག་པ་དེ་བཞིན་བ་རཱ་ཛིལ་སྲིད་གཞུང་གི་འཕྲོད་བསྟེན་ལྷན་ཁང་ (PICS) གིས་ཁྲིམས་མཐུན་ཐོག་ངོས་འཛིན་ཡོང་བའི་རེ་སྐུལ་གནང་ཡོད། ཕྱོགས་མཚུངས་བོད་ཁང་གིས་བོད་ཀྱི་ཐང་ཀའི་སྒྱུ་སྩལ་ཐོག་ཉིན་བཞིའི་ཟབ་སྦྱོང་ཞིག་ཀྱང་གོ་སྒྲིག་གནང་ཡོད་པ་བཅས།།