༄༅། །ཕྱི་ལོ་ ༢༠༢༢ ཟླ་བ་ ༠༨ ཚེས་ ༣༠ ཉིན་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ལ་དྭགས་ཡན་ལག་དང་། ལ་དྭགས་ནང་པའི་ཚོགས་འདུ། ནང་ཚོགས་ཀྱི་གཞོན་ནུ་ཚོགས་པ། ས་གནས་བོད་ཀྱི་གཞོན་ནུ་ལྷན་ཚོགས་བཅས་ཀྱིས་ལ་དྭགས་ཀྱི་རྒྱལ་ས་གླེ་རུ་དཔའ་བོ་བསྟན་འཛིན་ཉི་མ་རྗེས་དྲན་དང་བསྟུན་རྒྱ་གར་དམག་མི་ཀུན་ལ་ལུས་སེམས་ཆིག་ཏུ་སྒྲིལ་བའི་བང་རྒྱུགས་ཞེས་པ་ཞིག་གོ་སྒྲིག་ཞུས་འདུག 

འདུ་འཛོམས་ཐོག་ལ་དྭགས་སློབ་གྲྭ་འདྲ་མིན་གྱི་སློབ་ཕྲུག་གྲངས་ ༡༥༠ ཙམ་དང་། དེ་བཞིན་བོད་དོན་རྒྱབ་སྐྱོར་བ། ས་གནས་ལ་དྭགས་དང་བོད་རིགས་མི་མང་བཅས་མཉམ་ཞུགས་གནང་འདུག མཛད་སྒོའི་སྐུ་མགྲོན་དུ་ཉེན་རྟོགས་དཔོན་ (SSP) ལྕམ་ནི་ཏི་ཡ་ (P. D. Nitya) ལགས་གདན་ཞུ་གནང་བ་ལྟར་ཁོང་མོས་སྔ་དྲོའི་ཆུ་ཚོད་ ༠༧ ཐོག་བང་རྒྱུགས་དབུ་འབྱེད་དང་འབྲེལ་བང་རྒྱུགས་པ་རྣམས་ནས་ཁྱོན་ཀི་ལོ་མི་ཊར་ ༡༠ ཙམ་རྒྱུགས་པའི་མཐར་ཞི་བའི་ཚལ་གྱི་དཔའ་བོ་ཉི་མ་བསྟན་འཛིན་གྱི་འདྲ་གཟུགས་མདུན་དུ་མཇུག་བསྡུས་འདུག སྐབས་དེར་སྐུ་མགྲོན་རྣམས་ཀྱིས་དཔའ་བོ་ཉི་མ་བསྟན་འཛིན་གྱི་འདྲ་གཟུགས་ལ་མཇལ་དར་དང་མེ་ཏོག་སྒྲོན་འབུལ་དང་སྦྲགས་ལ་དྭགས་ནང་ཚོགས་ཀྱི་ཚོགས་གཙོ་ཐུབ་བསྟན་ཚེ་དབང་ལགས་ཀྱིས་རྒྱ་གར་གྱི་རྒྱལ་སྲུང་ཆེད་ལ་དྭགས་མི་མང་ནས་ཕྱར་གྲུ་མཉམ་འདེགས་གནང་གལ་ཆེ་བའི་སྐོར་དང་། དུས་དྲན་འདི་བརྒྱུད་དཔའ་བོ་ཉི་མ་བསྟན་འཛིན་གྱི་བློས་གཏོང་ཆུད་ཟོས་སུ་ཕྱིན་མེད་པའི་སྐོར་སོགས་འགྲེལ་བརྗོད་གནང་། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་པའི་ལ་དྭགས་ཡན་ལག་གི་འབྲེལ་མཐུད་པ་ཕུན་ཚོགས་ལ་དྭགས་པས་ལ་དྭགས་ནང་ཚོགས་ནས་དུས་དྲན་འདི་བཞིན་ཟུང་སྦྲེལ་ཐོག་གོ་སྒྲིག་གནང་བ་མ་ཟད། བོད་དོན་ལ་རྒྱབ་སྐྱོར་གནང་བར་བསྔགས་བརྗོད་དང་ཐུགས་རྗེ་ཆེ་ཞུས་པ་དང་། ལྷག་པར་ཐུབ་བསྟན་ཚེ་དབང་ལགས་ཀྱིས་བོད་དོན་གླེང་སློང་དང་འཛམ་གླིང་ནང་བོད་ཀྱི་གནད་དོན་ནི་ཛ་དྲག་ཅན་ཞིག་ཡིན་པའི་བརྡ་ལན་སྤྲད་པར་ཐུགས་རྗེ་ལེགས་འབུལ་ཞུས་འདུག སྐུ་མགྲོན་གཙོ་བོ་ལྕམ་ནི་ཏི་ཡ་ལགས་ཀྱིས་གཞོན་སྐྱེས་རྣམས་ལ་སེམས་སྐུལ་ཐེབས་ཆེད་འདི་ལྟ་བུའི་དུས་དྲན་རྒྱུན་ལྡན་ནས་གོ་སྒྲིག་ཞུ་དགོས་པ་དང་། ལས་འགུལ་འདི་རིགས་རྒྱལ་ཁབ་འཛུགས་སྐུན་གྱི་ལས་གཞི་རེད་ཅེས་གསུངས། 

མཐར་འདུ་འཛོམས་ཐོག་བོད་དང་རྒྱ་གར་གྱི་རྒྱལ་གླུ་བླངས་རྗེས་འདས་པོའི་ནང་མི་རྣམས་ལ་ཆེ་བསྟོད་གནང་ཡོད་པ་བཅས།།