༄༅། །ཇི་ནི་ཝར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་ཞུས་པའི་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་གནང་ཕྱོགས་ཀྱི་སྦྱོང་བརྡར་ཉིན་གཉིས་པའི་ཐོག་མར་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་འབྲེལ་ལམ་དང་ཐབས་བྱུས་སྐོར་གསུང་བཤད་གནང་ཡོད། སྐབས་དེར་འཕྲིན་ལས་ཆོས་སྐྱིད་ལགས་ཀྱིས་ཞུ་གཏུག་གི་སྙན་ཞུར་ཚང་དགོས་པའི་ཆ་རྐྱེན་དང་དེ་ཉིད་གྲུབ་འབྲས་ལྡན་པ་ཞིག་ཏུ་ཇི་ལྟར་འགྱུར་ཐབས་ཐད་གསུང་བཤད་གནང་ཡོད།

དེ་རྗེས་ནང་ཁུལ་གྲོས་མོལ་དང་བཞུགས་མོལ་བགྲོ་གླེང་སོགས་ཀྱི་ལས་རིམ་ཡོད་པ་ལྟར་བགྲོ་གླེང་པའིི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་ཞུ་གཏུག་འབྲེལ་མཐུད་པ་རྒན་པ་ཧྤོ་རི་ན་ནེ་ (Florinane Borel) ལགས་དང་། ཇི་ནི་ཝའི་འགྲོ་བ་ཐོབ་ཐང་ཚོགས་པའི་ཚོགས་གཙོ་ཨ་ཊི་རིན་ཛོ་ལར་ (Adrien Zoller) ལགས། ངོས་འཛིན་མ་ཐོབ་པའི་རྒྱལ་ཁབ་ཁག་གི་ཚོགས་པའི་ངེས་སྟོན་པ་མར་སི་མོན་ཇི་ (Merce Monje) ལགས། དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་མཐོ་རིམ་ལས་བྱེད་སོགས་ཕེབས་ཡོད།

ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ཚོགས་ཞུགས་པ་རྣམས་ལ་བོད་དོན་ཞུ་གཏུག་དེ་བཞིན་གྲུབ་འབྲས་ལྡན་པ་ཡོང་ཐབས་དང་། ས་གནས་སོ་སོར་ཡོད་པའི་དང་བླངས་བོད་དོན་ཞུ་གཏུག་ལས་གཞིའི་དང་བླངས་པ་རྣམས་གལ་གནད་ཆེ་ཚུལ་སྐོར་འགྲེལ་བརྗོད་གནང་ཡོད་པ་བཅས།།