༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༠༣ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་ཊི་སྦི་དང་སྐོར་བསྐྱོད་ལས་གཞིའི་ལོ་འཁོར་བསྐྱར་ཞིབ་ཚོགས་འདུ་དབུ་འཛུགས་གནང་ཡོད།

ཐེངས་འདིའི་ཚོགས་འདུའི་དམིགས་ཡུལ་གཙོ་བོ་ནི། ས་གནས་འཕྲོད་ལས་པ་རྣམས་ནས་ས་གནས་ས་ཐོག་ཏུ་ལས་གཞི་ལས་བསྟར་གནང་ཕྱོགས་དང་། དཀའ་ངལ་ཇི་ཡོད་སོགས་ཀྱི་སྐོར་བསམ་ཚུལ་བསྡུ་ལེན་གྱིས་སྔར་ཡོད་ལས་གཞི་ཚགས་ཚུད་དུ་གཏང་རྒྱུ་ཡིན་པ་རེད། ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཕེབས་ཡོད། སྐབས་དེར་འཕྲོད་བསྟེན་ཟུང་དྲུང་བསྟན་འཛིན་ཀུན་བཟང་ལགས་ཀྱིས་ཚོགས་བཅར་བ་རྣམས་ལ་བརྗོད་གཞི་ངོ་སྤྲོད་དང་། ཚོགས་ཐུན་རེའི་དམིགས་ཡུལ་སོགས་འགྲེལ་བརྗོད་གནང་རྗེས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་ནང་ཆོས་ཐོག་ནས་འཕྲོད་བསྟེན་ལ་ལྟ་སྟངས་དང་དྲན་པ་ཉེར་བཞག་སྐོར་གསུང་བཤད་གནང་ཡོད།

ཐེངས་འདིའི་ཚོགས་འདུའི་ཐོག་རྒྱ་བལ་གཉིས་ནས་འཕྲོད་ལས་པ་ ༤༦ མཉམ་ཞུགས་གནང་ཡོད་པ་བཅས།།