༄༅། །ཕྱི་ལོ་ ༢༠༢༢ ཟླ་བ་ ༠༨ ཚེས་ ༣༡ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་ཞུས་པའི་གསོ་བ་རིག་པའི་སྨན་པ་རྣམས་ལ་དེང་རབས་སྨན་ལུགས་ངོ་སྤྲོད་ཟབ་འཁྲིད་ལེགས་པར་མཇུག་སྒྲིལ་ཡོད།

ཟབ་འཁྲིད་དེ་བཞིན་བོད་ཀྱི་སྨན་པའི་ལྷན་ཚོགས་ཀྱི་འགན་འཛིན་སྨན་པ་ཚེ་རིང་མཚམས་གཅོད་ལགས་ཀྱིས་འབྲེལ་མཐུད་གནང་ཡོད་པ་དང་ཟབ་ཁྲིད་ནང་བོད་ཀྱི་སྨན་རྩིས་ཁང་དང་། ལྕགས་པོ་རི་སྨན་རྩིས་ཁང་། ཝཱ་ཎ་གཙུག་ལག་སློབ་ཁང་གི་གསོ་བ་རིག་པའི་སྡེ་ཚན། དཔལ་སྤུངས་ཤེས་རབ་གླིང་། སྨན་རིའི་གསོ་རིག་འབུམ་བཞིའི་མཐོ་སློབ། སྒེར་གཉེར་སྨན་པ་བཅས་ཚོགས་བཅར་བ་སུམ་ཅུ་མཉམ་ཞུགས་གནང་ཡོད། མཇུག་སྡོམ་མཛད་སྒོའི་སྐུ་མགྲོན་དུ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། སྐུའི་བླ་ས་འདུ་ཚང་སྨན་ཚེ་བརྟན་རྡོ་རྗེ་ལགས། སྐུའི་བླ་སྨན་ཚེ་དབང་རྟ་མགྲིན་ལགས་ཆེད་ཕེབས་གནང་ཡོད། སྐབས་དེར་ཚོགས་བཅར་བ་བཞིས་ཟབ་ཁྲིད་སྐབས་ཀྱི་མྱོང་ཚོར་གསུངས་རྗེས་སྐུའི་བླ་སྨན་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་འཕྲོད་བསྟེན་ལས་ཁུངས་ངོས་ནས་འདི་ལྟ་བུའི་ཟབ་ཁྲིད་གོ་སྒྲིག་གནང་བར་བསྔགས་བརྗོད་གནང་ཞིང་། དེ་རྗེས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སྐུའི་བླ་སྨན་པ་གཉིས་ཀྱིས་ལམ་སྟོན་གནང་བར་བསྔགས་བརྗོད་དང་བཅས་ཟབ་ཁྲིད་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་སྩལ་དོན་ལྟར། ལག་ལེན་དུ་བསྟར་རྒྱུའི་དམིགས་ཡུལ་དུ་བཟུང་སྟེ་གོ་སྒྲིག་གནང་བ་ཡིན་སྐོར་ངོ་སྤྲོད་དང་འབྲེལ་ཚོགས་བཅར་བ་ཡོངས་ནས་དེ་ལྟར་གནང་སྐྱོང་ཡོང་བའི་རེ་སྐུལ་གནང་ཡོད་པ་བཅས།།