༄༅། །འཕགས་བོད་ཚོགས་པས་ཨུཏྟར་པྲདེཤ་མངའ་སྡེའི་གྲོང་ཁྱེར་ནོ་ཧི་ཊ་ཆེ་བའི་ནང་ཉིན་གཉིས་ཀྱི་རྒྱལ་ཡོངས་ཚོགས་འདུ་ཞིག་བསྐོང་ཚོགས་གནང་འདུག

དེ་ཡང་ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་ཟུར་པ་དང་འཕགས་བོད་ཚོགས་པའི་ཚོགས་གཙོ་ཁྲིམས་དཔོན་ཛྙཱན་སུ་དྷཱ་མིཤྲཱ་ལགས་ཕེབས་འདུག མཛད་སྒོའི་ཐོག་མར་འཕགས་བོད་ཚོགས་པའི་ཚོགས་མི་རྣམས་ངོ་སྤྲོད་དང་འབྲེལ་འཚམས་འདྲིའི་མགུལ་དར་སྒྲོན་པ་དང་། དེ་བཞིན་འཕགས་བོད་དང་འབྲེལ་བའི་དཔེ་དེབ་དང་དེབ་ཆུང་རེ་ཕུལ་རྗེས་ཚོགས་འདུ་དངོས་གཞི་དབུ་འཛུགས་གནང་འདུག

ཚོགས་འདུའི་གཙོ་སྐྱོང་ཚོགས་གཙོ་ཛྙཱན་སུ་དྷཱ་མིཤྲཱ་ལགས་ཀྱིས་གནང་འདུག་པ་དང་ཚོགས་འདུའི་ནང་རྒྱ་གར་གྱི་དམག་དཔོན་ཟུར་པ་ནི་ལིནྡྲ་ཀུ་མཱར་ལགས་དང་། སྤྱི་ཁྱབ་འགོ་དཔོན་ (IG) ཟུར་པ་སྐུ་ཞབས་ཨཱ་ནནྡ་བརྡྷན་ཤུཀླ་ལགས། བོད་མི་མང་སྤྱི་འཐུས་ཚོགས་གཞོན་ཟུར་པ་ཨ་ཅཱརྱ་ཡེ་ཤེས་ཕུན་ཚོགས་མཆོག ཇམ་མུ་ཀཤྨཱིར་ཞིབ་འཇུག་བསྟི་གནས་ཁང་གི་ངེས་སྟོན་པ་འབུམ་རམས་པ་ཨཱཤུ་ཏོཥ་བྷཊ་ནཱ་གར་ལགས། འཕགས་བོད་འབྲེལ་མཐུད་ལས་ཁུངས་ཀྱི་བཀྲ་ཤིས་བདེ་སྐྱིད་ལགས་སོགས་མཉམ་ཞུགས་གནང་འདུགཁྲིམས་དཔོན་ཛྙཱན་སུ་དྷཱ་མིཤྲཱ་ལགས་ཀྱིས་གངས་ཏི་སི་རྒྱ་ནག་གི་བཙན་དབང་འོག་ནས་ཐར་སྐྲོད་གཏང་རྒྱུའི་དམིགས་ཡུལ་དང་། བོད་དང་གངས་ཏི་སི། མ་ཕམ་གཡུ་མཚོ་ནི་གདོད་མའི་དུས་ནས་ཆོས་ཕྱོགས་ཐོག་ནས་རྒྱ་གར་འཕགས་པའི་ཡུལ་དང་འབྲེལ་བ་ཡོད་པས་རྒྱ་གར་མི་མང་རྣམས་བོད་དང་གངས་ཏི་སི་ཐར་སྐྲོད་གཏང་རྒྱུའི་ལས་འགུལ་ནང་མཉམ་ཞུགས་གནང་དགོས་པའི་འབོད་སྐུལ་གནང་། དེ་བཞིན་དམག་དཔོན་ནི་ལིནྡྲ་ཀུ་མཱར་ལགས་ཀྱིས་བོད་ལ་རང་དབང་འཐོབ་རྒྱུ་ནི་རྒྱ་གར་གྱི་བདེ་འཇགས་ཆེད་ངེས་པར་དུ་དགོས་པ་ཤིག་དང་། ཐབས་བྱུས་ཐོག་ནས་གང་མགྱོགས་བོད་ལ་རང་དབང་ཐོབ་དགོས་པ་ཡིན་ཞེས་གསུངས་རྗེས་འཕགས་བོད་ཚོགས་པའི་ཚོགས་གཞོན་ཨཱ་ནནྡ་བརྡྷན་ཤུཀླ་ལགས་ཀྱིས་རྒྱལ་སྤྱིའི་སྟེང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་ཤོས་བོད་ནང་རྒྱ་གཞུང་གིས་གཏོང་གི་ཡོད་པས་དེར་རིག་གནས་ལྡན་པའི་སྤྱི་ཚོགས་ཤིག་གིས་སྣང་མེད་གཏོང་མི་རུང་བ་སོགས་ཀྱི་ཐད་བཀའ་མོལ་གནང་འདུག

ཕྱོགས་མཚུངས་ཚོགས་འདུའི་སྟེང་བོད་མི་མང་སྤྱིི་འཐུས་ཚོགས་གཞོན་ཟུར་པ་ཨཱཅཱརྱ་ཡེ་ཤེས་ཕུན་ཚོགས་མཆོག་དང་འཕགས་བོད་འབྲེལ་མཐུད་ལས་ཁུངས་ཀྱི་བཀྲ་ཤིས་བདེ་སྐྱིད་ལགས་ཀྱིས་འཕགས་བོད་ཀྱི་འབྲེལ་ལམ་དང་རྒྱ་གར་བོད་དོན་རྒྱབ་སྐྱོར་བ་ཚོགས་སྒེར་ཡོངས་ནས་བོད་དོན་ལ་རྒྱབ་སྐྱོར་གནང་བར་བསྔགས་བརྗོད་དང་ཐུགས་རྗེ་ལེགས་འབུལ་ཞུས་འདུག

ཇམ་མུ་ཀཤྨཱིར་ཞིབ་འཇུག་བསྟི་གནས་ཁང་གི་ངེས་སྟོན་པ་ཨཱཤུ་ཏོཥ་བྷཊ་ནཱ་གར་ལགས་ཀྱིས་ལོ་རྒྱུས་ཐོག་རྒྱ་དཀར་ནག་བར་ས་མཚམས་ཀྱི་འབྲེལ་བ་མེད་པའི་སྐོར་དང་། རྒྱ་ནག་གཞུང་གིས་ཁྲིམས་འགལ་ཐོག་ནས་བོད་ཀྱིས་གཙོས་ས་ཁུལ་མང་དག་བཙན་འཕྲོག་བྱས་ཡོད་ཚུལ་སོགས་ཀྱི་སྐོར་ཞིབ་ཕྲ་འགྲེལ་བརྗོད་གནང་འདུག

ཐེངས་འདིའི་ཚོགས་འདུའི་ནང་རྒྱ་གར་གྱི་ས་གནས་མང་དག་ཅིག་ནས་ས་གནས་ཀྱི་སྐུ་ཚབ་དང་གནད་ཡོད་མི་སྣ་མཉམ་ཞུགས་གནང་འདུག་པ་བཅས།།