༄༅།    །འདི་གར་མོན་གྷོ་འདོད་རྒུ་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༩ ཚེས་ ༢ རེས་གཟའ་པ་སངས་ཉིན་མོན་གྷོ་འདོད་རྒུ་གླིང་སེར་སྐྱ་མི་མང་དང་སློབ་ཕྲུག་བཅས་ནས་བོད་མིའི་མང་གཙོ་དབུ་བརྙེས་ཏེ་མི་ལོ་ ༦༢ འཁོར་བའི་དུས་ཆེན་ཁྱད་པར་ཅན་སྲུང་བརྩི་ཞུས་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ པའི་ཐོག་གཞིས་སྤྱི་ནོར་བུ་རིར་བོད་མི་སེར་སྐྱ་མང་ཚོགས་ཚང་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་གནད་སྨིན་འབད་སྒྲུབ་ཞུས་རྗེས་ཀྭི་བསོ་ལྷ་རྒྱལ་འཐེན་རྗེས་ཆུ་ཚོད་ ༩།༢༠ ཐོག་གཞིས་སྤྱི་མི་མང་ཚོགས་ཁང་དུ་མཛད་སྒོ་དངོས་གཞི་དབུ་འཛུགས་ཀྱི་ཐོག་མར་ས་གནས་འགོ་འཛིན་ལྷག་པ་སྒྲོལ་མ་ལགས་ཀྱིས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་དང་། ས་འཐུས་ཚོགས་གཙོ་དགེ་བཤེས་བློ་བཟང་སྙན་གྲགས་ལགས་ཀྱིས་དཔལ་ལྡན་བོད་མི་མང་སྤྱི་འཐུས་ཀྱི་གསུང་འཕྲིན་སྒྲོགས་སྦྱང་ཞུས།དེ་ནས་མཛད་སྒོའི་སྐུ་མགྲོན་གཙོ་བོ་༸སྐྱབས་རྗེ་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་གིས་མང་ཚོགས་ལ་དུས་ཆེན་དང་འབྲེལ་བའི་བླང་དོར་བཀའ་སློབ་གནང་རྗེས་རང་ཁོངས་གཏན་འཇགས་ལས་བྱེད་ཞབས་ལོ་ ༢༥ ཧྲིལ་པོ་འཁོར་བ་རིན་ཆེན་ལགས་སུ་ནང་སྲིད་ལས་ཁུངས་ཀྱི་ཐུགས་རྗེ་ལེགས་འབུལ་གྱི་ཕྱག་རྟགས་དང་། ཕྱི་ལོ་ ༢༠༢༢ ལོའི་འཛིན་རིམ་བཅུ་པ་གྲུབ་འབྲས་བརྒྱ་ཆ་ ༩༥ ལྷག་སོན་མཁན་སློབ་མ་ཀུན་དགའ་བདེ་ཆེན་དང་ས་ཁང་འཐུས་མི་ཟུར་པ་རྣམ་པ་ཚོར་ས་འགོ་ལས་ཁུངས་ཀྱི་བསྔགས་བརྗོད་ཀྱི་ཕྱག་རྟགས་གསོལ་རས་གནང་རྗེས་མཉམ་འབྲེལ་ཚོགས་གཙོ་བསྟན་འཛིན་རྒྱལ་དབང་ལགས་ཀྱིས་ཐུགས་རྗེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །