༄༅། །སུད་སིའི་གྲོང་ཁྱེར་ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༥༡ འཚོགས་བཞིན་པ་དང་བསྟུན། ཨ་རི་དང་། ཌེན་མཱརྐ། ཇར་མ་ནཱི། སྭི་ཌན། སུད་སི། ལི་ཐུ་ནི་ཡཱ། ཡུ་རོབ་སྤྱི་མཐུན་ཚོགས་པ་བཅས་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་དང་དམ་བསྒྲགས་ཚད་ལས་བརྒལ་བ་བཏང་དང་གཏོང་བཞིན་པའི་སྐོར་ཧ་ཅང་ཐུགས་འཚབ་དང་གླེང་སློང་ཤུགས་ཆེ་གནང་འདུག
དེ་ཡང་ཅེག་སྤྱི་མཐུན་རྒྱལ་ཁབ་ཀྱིས་ཡུ་རོབ་སྤྱི་མཐུན་ཚོགས་པའི་ཚོགས་མི་རྒྱལ་ཁབ་གྲངས་ ༢༧ གྱི་ཚབ་ཞུས་ཏེ་བསྒྲགས་གཏམ་སྤེལ་སྐབས་རྒྱ་ནག་གཞུང་གིས་བོད་ཚུད་པའི་རྒྱ་ནག་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་ནི་ཛ་དྲག་ཡིན་པའི་སྐོར་དང་། རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ཁག་ལ་བརྩི་སྲུང་ཞུས་ཏེ་བོད་ཚུད་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་དགོས་པའི་འབོད་སྐུལ་ཤུགས་ཆེ་གནང་ཡོད།
དེ་བཞིན་ཨ་རི་དང་། ཌེན་མཱརྐ། ཇར་མ་ནཱི། ལི་ཐུ་ནི་ཡཱ། སྭི་ཌན་བཅས་ནས་རྒྱ་ནག་གཞུང་གིས་བོད་ཚུད་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པར་ཧ་ཅང་ཐུགས་འཚབ་དང་རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ཁག་ལ་བརྩི་སྲུང་ཞུས་ཏེ་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་བརྩི་བཀུར་ཞུ་དགོས་པའི་འབོད་སྐུལ་གནང་ཡོད།
ཉེ་ཆར་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་མཁས་པ་ཊོ་མོ་ཡཱ་ཨོ་བྷོ་ཀ་ཊ་ (Tomoya Obokata) ལགས་ཀྱིས་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་ལྟར། བོད་ནང་དུའང་བོད་མི་རྣམས་ལ་བཙན་དབང་གིས་བྲན་གཡོག་ལྟ་བུའི་ངལ་རྩོལ་བྱེད་དུ་བཅུག་ཡོད་པའི་སྙན་ཐོ་བཏོན་ཡོད་པ་དང་། སུད་སི་རྒྱལ་ཁབ་ཀྱི་ངོས་ནས་སྙན་ཐོ་དེ་དྲན་གསོ་དང་སྦྲགས་རྒྱ་ནག་གཞུང་གིས་བཙན་དབང་གིས་བོད་དུ་གཞི་རྒྱ་ཆེ་བའི་སྒོ་ནས་ངལ་རྩོལ་བསྒྱུར་བཀོད་ཁང་གི་ལས་གཞི་སྤེལ་དང་སྤེལ་བཞིན་པར་ཐུགས་འཚབ་གནང་གི་ཡོད་སྐོར་དང་། མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་མཁས་པ་ཊོ་མོ་ཡཱ་ཨོ་བྷོ་ཀ་ཊ་ལགས་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ཟུར་པ་ལྕམ་སྐུ་མི་ཤེལི་བྷ་ཤེ་ལེཌི་མཆོག་གིས་ཡུ་གུར་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་སྙན་ཐོ་བཏོན་པའི་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིད་མེད་རྡོག་རོལ་བཏང་བ་དེ་ནི་ནག་ཉེས་ཡིན་པ་བསྟན་ཡོད། ཅེས་གསུངས་ཡོད།
ཕྱོགས་མཚུངས་ཉི་ཧོང་དང་། ཨིན་ཡུལ། ཨཱ་ཨིས་ལེནྜ། ཕིན་ལེནྜ། ནི་དར་ལེནྜ། ལཀ་ཛམ་བརྒ་བཅས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིད་མེད་རྡོག་རོལ་གཏོང་བཞིན་པར་ཐུགས་འཚབ་ཆེན་པོ་གནང་གི་ཡོད་སྐོར་གསུངས།།
