༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༡༦ ཉིན་འཕགས་བོད་འབྲེལ་མཐུད་ལས་ཁུངས་དང་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཁུངས་ཟུང་སྦྲེལ་གྱིས་རྒྱ་གར་གྱི་ཨུཏྟར་པྲདེཤ་ཡི་ནོ་ཧི་ཊ་ཆེ་བའི་ནང་ཡོད་པའི་བྷེ་ནེ་ཊི་གཙུག་ལག་སློབ་ཁང་ (Bennett University) གི་སློབ་ཕྲུག་ཁག་ཅིག་དང་ལྷན་བོད་དོན་སྐོར་གོ་རྟོགས་གླེང་མོལ་ལས་རིམ་ཞིག་གོ་སྒྲིག་ཞུས་འདུག

སྐབས་དེར་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་གཞོན་པ་བཀྲ་ཤིས་བདེ་སྐྱིད་ལགས་ཀྱིས་བོད་མིའི་སྒྲིག་འཛུགས་ཐེ་བའི་ཚོགས་སྐྱིད་སོགས་ཀྱི་བྱུང་རིམ་ངོ་སྤྲོད་གནང་རྗེས་བྷེ་ནེ་ཊི་གཙུག་ལག་སློབ་གཉེར་ཁང་གི་ཉེ་བའི་གཙུག་ལག་སློབ་དཔོན་སྐུ་ཞབས་ཀོ་ཡལ་ཝརྨཱ་ལགས་ཀྱིས་ཐེངས་འདིའི་གླེང་མོལ་གྱི་དགོས་དམིགས་གཙོ་བོ་རྒྱ་གར་གྱི་སློབ་ཕྲུག་རྣམས་ལ་བོད་མིའི་སྤྱི་ཚོགས་ངོ་སྤྲོད་བྱ་རྒྱུ་ཡིན་སྐོར་འགྲེལ་བརྗོད་གནང་ཡོད།  གླེང་མོལ་སྐབས་ས་གནས་རང་བདེན་ཚོགས་ཆུང་དང་། བོད་ཀྱི་གཞུང་ཁོངས་མིན་པའི་ཚོགས་པ་ས་གནས་བདེ་དོན་ཚོགས་པ་དང་།  ས་གནས་བུད་མེད་ཚོགས་པ། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་རྗེས་འབྱོར་ཚོགས་པ། བསམ་ཡས་གླིང་ཚོང་པའི་ཚོགས་པ་བཅས་ལྷན་ཞུགས་ཀྱིས་ཚོགས་པ་སོ་སོའི་ལས་དོན་བྱེད་ཕྱོགས་དང་དམིགས་ཡུལ་སོགས་ངོ་སྤྲོད་གནང་། དེ་བཞིན་སློབ་གཉེར་བ་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག བཙན་བྱོལ་ནང་གི་བོད་མིའི་གནས་སྟངས་སོགས་ཀྱི་ཐད་ངོ་སྤྲོད་གནང་བ་དང་འབྲེལ་སློབ་གཉེར་བ་རྣམས་ཀྱི་དོགས་དྲི་ཁག་ལ་ལན་འདེབས་གསལ་བཤད་གནང་འདུག གླེང་མོལ་སྐབས་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཁུངས་ཀྱི་ལས་དྲུང་འཇིགས་མེད་ཚེ་བརྟན་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་ལས་བྱེད་ཆོས་ཉིད་ཚེ་རིང་ལགས་ཀྱང་མཉམ་ཞུགས་གནང་ཡོད་པ་བཅས།།