༄༅། །བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཕྱི་ལོ་ ༢༠༢༢ ཟླ་ ༩ ཚེས་ ༡༩ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་ཁོངས་གཏོགས་ཀྱི་དྲུང་ལས་ནས་ཟུང་དྲུང་གནས་རིམ་བར་གྱི་སྲི་ཞུའི་ལས་བྱེད་གྲངས་ ༢༠ ལ་ཉེར་མཁོའི་བོད་ཡིག་ཟབ་སྦྱོང་གི་དབུ་འབྱེད་མཛད་སྒོ་ཚོགས་ཡོད་པ་དང་། བོད་ཡིག་ཟབ་སྦྱོང་དེ་བཞིན་ཕྱི་ལོ་ ༢༠༢༢ ཟླ་ ༩ ཚེས་ ༡༩ ཉིན་འགོ་བཙུགས་ཀྱིས་ཕྱི་ཚེས་༣༠ བར་འཚོག་གི་ཡོད། མཛད་སྒོར་སྐུ་མགྲོན་གཙོ་བོ་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་དྲུང་ཆེ་ཚེ་རིང་དབྱངས་སྐྱིད་ལགས། དཔལ་འབྱོར་ལས་ཁུངས་ཀྱི་ཟུང་སྦྲེལ་དྲུང་ཆེ་བློ་བཟང་བསྟན་འཛིན་ལགས། དེ་བཞིན་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་དང་འབྲེལ་ཡོད་དགེ་རྒན་རྣམ་པ། དྲུང་ལས་ནས་ཟུང་དྲུང་གནས་རིམ་བར་གྱི་སྲི་ཞུའི་ལས་བྱེད་ཁག་གཅིག་བཅས་ཕེབས་ཡོད།
དེ་ཡང་མཛད་སྒོའི་ཐོག་མར་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སྐོར་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ཀྱིས་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་རྗེས་སུ་དྲན་དགོས་པ་དང་། མགོན་པོ་གང་ཉིད་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་ང་ཚོ་ཚང་མར་གོ་སྐབས་བཟང་པོ་ཐོབ་ཡོད། ལས་བྱེད་འདེམས་བསྐོ་ལྷན་ཁང་གིས་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་ཁོངས་གཏོགས་ཀྱི་སྲི་ཞུའི་ལས་བྱེད་ཁག་གཅིག་ལ་བོད་ཀྱི་སྐད་ཡིག་མི་ཉམས་རྒྱུན་འཛིན་སླད་ཟབ་སྦྱོང་གོ་སྒྲིག་གནང་བ་དེ་ལོ་རྒྱུས་ནང་ཆེས་ཐོག་མ་དང་གལ་ཆེན་པོ་ཆགས་ཡོད་ལ། ང་ཚོ་ངོས་ནས་ཟབ་སྦྱོང་དེ་ཧ་ཅང་གལ་ཆེན་པོ་རྩི་ཡི་ཡོད། ཅེས་དང་། བོད་ནང་རྒྱ་ནག་གཞུང་གིས་སྔོན་འགྲོའི་སློབ་གྲྭ་ནས་བཟུང་བོད་ཀྱི་སྐད་ཡིག་རྩ་བརླག་ཏུ་གཏོང་རྒྱུའི་སྲིད་བྱུས་ལག་བསྟར་བྱས་དང་བྱེད་བཞིན་ཡོད། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམ་པས་ཉིན་ལྟར་ལས་དོན་ཁག་སྒྲུབ་སྐབས་བོད་ཀྱི་སྐད་ཡིག་གི་རྨང་གཞི་བརྟན་པོ་དགོས་པ་ཧ་ཅང་གལ་ཆེན་པོ་ཆགས་ཡོད། དེར་བརྟེན་ལས་བྱེད་འདེམས་བསྐོ་ལྷན་ཁང་གིས་བོད་ཡིག་ཟབ་སྦྱོང་གོ་སྒྲིག་གནང་ཡོད། ཅེས་གསུངས།
གཞན་ཡང་དཔེ་ཟུར་དབང་འདུས་ཚེ་རིང་ལགས་ཀྱིས། རྣམ་པ་ཚོས་མཁྱེན་གསལ་རེད། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དུས་ཐོག་གསལ་བཤད་གནང་ཡོད། ལས་བྱེད་འདེམས་བསྐོ་ལྷན་ཁང་གི་ངོས་ནས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ཀྱི་བོད་ཡིག་གི་ཆུ་ཚད་ཧྲ་ཏག་ཏག་ཡོང་བར་འབད་བརྩོན་ཞུ་རྒྱུ་ཡིན། གཙོ་བོ་སྲི་ཞུའི་ལས་བྱེད་རྣམ་པས་དུས་ཚོད་ཆུད་ཟོས་སུ་མ་གཏང་བར་བོད་ཀྱི་སྐད་ཡིག་སྦྱང་བརྩོན་གནང་དགོས་པ། དེ་སྔའི་གཞུང་ཡིག་གི་ལམ་སྲོལ་འགྲོ་སྟངས་རིགས་ཉམས་ཆག་འགྲོ་བཞིན་པ་སོགས་ཀྱི་སྐོར་གསུང་བཤད་གནང་ཡོད།
ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་བོད་ཀྱི་རྩ་དོན་ཆེད་དུ་ཕྱག་ལས་གནང་མཁན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམ་པ་ཚོར་བོད་ཡིག་གི་ཆུ་ཚད་ཡག་པོ་དགོས་པ་ཧ་ཅང་གལ་ཆེན་པོ་ཆགས་ཡོད་པ་དང་། འབྱུང་འགྱུར་ཕྱི་ཟླ་ ༡༡ ནང་ལས་བྱེད་འདེམས་བསྐོ་ལྷན་ཁང་གིས་བོད་མིའི་སྒྲིག་འཛུགས་ཀྱི་ལས་བྱའི་སྡེ་ཚན་ཁོངས་སུ་ཡོད་པའི་སྲི་ཞུའི་ལས་བྱེད་རྣམས་ལའང་བོད་ཡིག་ཟབ་སྦྱོང་གོ་སྒྲིག་གནང་རྒྱུ་ཡིན་པ་སོགས་ཀྱི་སྐོར་གསུངས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལྟ་གྲུབ་དགེ་རྒན་དགེ་བཤེས་བསྟན་འཛིན་དམ་ཆོས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
