༄༅། །བོད་རྒྱལ་ལོ་ ༢༡༤༩ ཕྱི་ལོ་ ༢༠༢༢ ཟླ་ ༩ ཚེས་ ༢ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་།  བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམས་དང་། སྲི་ཞུ་བ།  གཞུང་ཁོངས་མིན་པའི་ཚོགས་སྐྱིད་ཁག་གི་འཐུས་མི་རྣམ་པ། སེར་སྐྱ་ཕོ་མོ། སློབ་ཕྲུག་སོགས་ཚང་འཛོམས་ཐོག  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་མང་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་མི་ལོ་ ༦༢ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་སྲུང་བརྩི་གཟབ་རྒྱས་ཞུས་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་རྡ་རམ་ས་ལའི་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤལ་ནེ་རི་ཡ་ (Shri Vishal Nehria) མཆོག་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་ཞབས་སོར་འཁོད་མཚམས་མཛད་སྒོ་དབུ་འཛུགས་ཀྱི་ཐོག་མར་ཚང་མ་སྐུ་བཞེངས་ཐོག་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་བོད་ཀྱི་ཟློས་གར་ཚོགས་པ་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར།དེ་ནས་བོད་ཀྱི་ཟློས་གར་ཚོགས་པས་མང་གཙོའི་གསར་གཞས་འབུལ་ལམ་ཞུས་གྲུབ་མཚམས་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བཀའ་ཤག་གི་གསུང་བཤད་གནང་བ་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་རྗེས་སྐུ་མགྲོན་གཙོ་བོ་སྐུ་ཞབས་ཝི་ཤལ་ནེ་རི་ཡ་མཆོག་གིས་གསུང་བཤད་གནང་།དེ་རྗེས་དཔེ་སྟོན་སློབ་གྲྭ་ནས་དགུང་གི་ཉིན་ཟླ་ཞེས་པ་དང་། བོད་ཀྱི་ཟློས་གར་ཚོགས་པ་ནས་མདོ་སྨད་བསང་ཆུ་སྔོ་སྨོན་འགྱུར་ཁུག་ཅེས་པ་དང་མདོ་སྟོད་འབྲི་རུའི་འབྲོག་གཞས། ཡོངས་གླིང་སློབ་གྲྭ་ནས་ཨར་གཞས་ཞེས་པ། རྡ་སྟེང་བོད་ཁྱིམ་ནས་ནང་མ་བསྟོད་གཞས་ཨེ་མ་ཧོ་ཞེས་པ་གཟིགས་འབུལ་ཞུས།དེ་ནས་སྐུ་མགྲོན་གཙོ་བོ་རྡ་རམ་ས་ལའི་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤལ་ནེ་རི་ཡ་མཆོག་གིས་སྲིད་སྐྱོང་གཟེངས་བསྟོད་བཞེས་མཁན་རིགས་གཅིག་རྐང་འཛིན་སློབ་མར་ཕྱག་འཁྱེར་དང་ལེགས་གསོལ་གནང་བ་དང་། དཔལ་ལྡན་སྲིད་ཚབ་མཆོག་གིས་འདི་ལོའི་སྲིད་སྐྱོང་སློབ་ཡོན་བཞེས་མཁན་སློབ་ཕྲུག་གཉིས་དང་། དགའ་ལྡན་ཕོ་བྲང་ལེགས་གསོལ་བྱ་དགའ་བཞེས་མཁན་སློབ་ཕྲུག་བཅུ་ལ་ཕྱག་འཁྱེར་དང་བྱ་དགའ་གནང་བ་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་མིའི་སྒྲིག་འཛུགས་ཀྱི་དབུས་རང་ཁོངས་ལས་བྱེད་ཞབས་ལོ་ ༢༥ ཡན་འཁོར་མཁན་དྲུང་ལས་མིག་དམར་བཀྲ་ཤིས་ལགས་ལ་ལེགས་གསོའི་ཕྱག་འཁྱེར་དང་། དེ་བཞིན་ཕྱི་ལོ་ ༢༠༢༢ ལོའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་ནུས་སྤེལ་ལས་གཞིའི་གཟེངས་བསྟོད་བཞེས་མཁན་ཁོངས་སྦེལ་ཀོབ་ལུགས་བསམ་གཞིས་ཁོངས་ཟླ་བ་སྒྲོལ་མ་ལགས་དང་། རྡ་ས་གནས་སྡོད་བསྟན་འཛིན་ལགས་རྣམ་གཉིས་འདེམས་སྒྲུག་གནང་ཡོད་པ་དང་། རྡ་ས་གནས་སྡོད་བསྟན་འཛིན་ལགས་ལ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་ལེགས་གསོལ་ཕྱག་འཁྱེར་གནང་།མཐར་དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གིས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བརྩམས་པའི་དཔེ་དེབ་ (Harnessing the Dragon’s fume) ཞེས་པ་ཕྱི་དྲིལ་རྩོམ་སྒྱུར་དང་ཡིག་སྒྱུར་ཚན་པས་བོད་སྒྱུར་ཞུས་པ་འབྲུག་གི་དུག་རླང་ལ་ཁ་གཏད་ཅེས་པ་དབུ་འབྱེད་གནང་སྟེ་ཐེངས་འདིའི་མང་གཙོའི་དུས་ཆེན་ཐེངས་ ༦༢ གཟབ་རྒྱས་ངང་སྲུང་བརྩི་ཞུས་ཡོད་པ་བཅས། །