༄༅། །ཕྱི་ལོ་ ༢༠༢༢ ཟླ་ ༩ ཚེས་ ༢ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་མང་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་མི་ལོ་ ༦༢ འཁོར་བའི་གཞུང་འབྲེལ་དུས་ཆེན་སྲུང་བརྩིའི་མཛད་སྒོར་བོད་མིའི་སྒྲིག་འཛུགས་ཀྱི་དབུས་རང་ཁོངས་ལས་བྱེད་ཞབས་ལོ་ ༢༥ ཡན་གཅིག་ལ་ལེགས་གསོའི་ཕྱག་འཁྱེར་གནང་བའི་ལོ་རྒྱུས་སྙིང་བསྡུས།
བཀའ་ཡིག་ཁྱབ་ཁོངས་བར་བརྒལ་ལས་བཀོད་སྡེ་ཚན་གྱི་རང་ཁོངས་ལས་བྱེད་དྲུང་ལས་མིག་དམར་བཀྲིས་ལགས་ནི། ཕྱི་ལོ་ ༡༩༩༥ ལོར་དབུས་རང་ཁོངས་ལས་བྱེད་དུ་འཛུལ་ཞུགས་ཀྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཁྱབ་ཁོངས་བདེ་སྐྱིད་གླིང་སྨན་ཁང་གི་འབྲེལ་མཐུད་པའི་ལས་འགན་ཐོག་བསྐོ་གཞག་གནང་ཡོད་པ་དང་། ཕྱི་ལོ་ ༡༩༩༧ ལོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་སུ་ལས་དྲུང་གནས་རིམ་དུ་གནས་སྤོས་གནང་སྟེ་ཁྱབ་ཁོངས་སྨན་ཁང་ཁག་གི་འཛིན་སྐྱོང་ལས་གཞི་ཚན་པའི་ལས་རོགས་ཀྱི་ལས་འགན་དང་། ཕྱི་ལོ་ ༢༠༠༡ ལོར་ལས་དོའི་ཚད་མཉམ་གནས་རིམ་དུ་གནས་སྤར། ཕྱི་ལོ་ ༢༠༠༥ ལོར་ལོ་གཅིག་རིང་ཨ་རིར་ (Fullbright) སློབ་སྦྱོང་བྱེད་རྒྱུའི་གོ་སྐབས་ཐོབ། ཕྱི་ལོ་ ༢༠༠༦ ལོར་འཕྲོད་བསྟེན་ལས་ཁུངས་སུ་ཊི་བི་སྔོན་འགོག་ལས་གཞི་དང་། འཕྲོད་བསྟེན་སློབ་གསོ་དང་བརྒྱུད་ལམ་ལས་གཞི་ཚན་པའི་ལས་རོགས་ཀྱི་ལས་འགན་ཞུས།
ཕྱི་ལོ་ ༢༠༠༩ ལོར་སྡེ་འགན་ཚད་མཉམ་གནས་རིམ་ཐོག་གནས་སྤར་དང་། ཕྱི་ལོ་ ༢༠༡༠ ལོར་བདེ་སྐྱིད་གླིང་སྨན་ཁང་གི་འགན་འཛིན་དུ་གནས་སྤོས། ཕྱི་ལོ་ ༢༠༡༢ ལོར་འཕྲོད་བསྟེན་ལས་ཁུངས་ཀྱི་ཊི་བི་ནད་གཞི་སྔོན་འགོག་ལས་གཞི་ཚན་པའི་འགན་འཛིན་གྱི་ལས་འགན་ཐོག་གནས་སྤོས། ཕྱི་ལོ་ ༢༠༡༤ ལོར་སྦེལ་ཀོབ་འཚོ་བྱེད་སྨན་ཁང་གི་འགན་འཛིན་དུ་གནས་སྤོས་དང་། ཕྱི་ལོ་ ༢༠༡༦ ལོར་སླར་ཡང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་སུ་གནས་སྤོས་གནང་སྟེ་ཊི་བི་ནད་གཞི་སྔོན་འགོག་ལས་གཞི་ཚན་པའི་འགན་འཛིན་གྱི་ལས་འགན་མུ་མཐུད་གནང་བ་དང་། དེ་རྗེས་དྲུང་ལས་ཚད་མཉམ་གནས་རིམ་དུ་གནས་སྤར་གནང་།
ཕྱི་ལོ་ ༢༠༡༩ ལོར་མན་སྤར་ཕན་བདེ་གླིང་ས་གནས་འགོ་འཛིན་དུ་བསྐོ་གཞག་དང་ཕྱི་ལོ་ ༢༠༢༠ ལོར་སྦན་ད་ར་ནོར་རྒྱས་གླིང་ས་གནས་འགོ་འཛིན་དུ་བསྐོ་གཞག ཕྱི་ལོ་ ༢༠༢༡ ནས་ད་བར་བཀའ་ཡིག་ཁྱབ་ཁོངས་བར་བརྒལ་ལས་བཀོད་སྡེ་ཚན་གྱི་ཡིག་འཕེལ་བལྟ་ཀློག་གིས་དཀར་ཆག་བཟོ་རྒྱུ་དང། ཡིག་ཆ་རྣམས་བཤེར་འབེབས་ཞུ་རྒྱུའི་ལས་འགན་ཞུ་མུས་ཡིན་པ་བཅས་ད་བར་ཞབས་ལོ་ ༢༥ ཟིན་ཡོད་པ་བཅས། །
