༄༅། །ཕྱི་ལོ་ ༢༠༢༢ ཟླ་ ༩ ཚེས་ ༢༢ དགོང་མོ་ཆུ་ཚོད་ ༩།༤༥ ཙམ་ལ་བོད་ཀྱི་ཆབ་སྲིད་བཙོན་ཟུར་ཕུན་ཚོགས་དར་རྒྱས་སམ་ལོ་ཡག་ལགས་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག
ཚེ་འདས་ཆབ་སྲིད་བཙོན་ཟུར་ཕུན་ཚོགས་དར་རྒྱས་སམ་ལོ་ཡག་ལགས་ནི། ཕྱི་ལོ་ ༡༩༦༣ ལོར་མལ་གྲོ་སྡོང་པོ་སྒང་དུ་ཕ་རྨི་རྨི་དང་། མ་སྒྲོལ་མ་གཉིས་སུ་འཁྲུངས་པ་དང་། དམངས་བཙུགས་སློབ་གྲྭར་ལོ་བཞིའི་རིང་སློབ་གཉེར་གནང་ཡོད་འདུག ཕྱི་ལོ་ ༡༩༨༣ ལོར་རང་ལོ་ ༢༠ ལ་སོན་དུས་བྲག་ལྷ་ཀླུ་སྒུག་དགོན་དུ་ཆོས་ཞུགས་གནང་། དགོན་པར་སྡོད་རིང་ཕྱི་ལོ་ ༡༩༨༨ དང་ ༡༩༨༩ ལོར་ལྷ་སའི་ཞི་རྒོལ་ནང་མཉམ་ཞུགས་དང་དེ་རྗེས་རྩེ་ཕོ་བྲང་པོ་ཏཱ་ལའི་རྒྱབ་ངོས་སུ་ཆབ་སྲིད་ཀྱི་ཡིག་ཆ་སྦྱར་འགྲེམས་བྱས་ཡོད་འདུག ཡིག་ཆ་སྦྱར་འགྲེམས་བྱས་པའི་གནས་ཚུལ་དེ་ཉིད་ཕྱི་ལོ་ ༡༩༩༠ ལོའི་ཟླ་ ༣ པའི་ནང་རྒྱ་གཞུང་གིས་ཤེས་རྟོགས་བྱུང་ནས་འཛིན་བཟུང་གིས་ལོ་གཉིས་རིང་དུས་བཀག་བཙོན་བཅུག་བྱས་ཡོད་འདུག
དེ་ཡང་ཐོག་མར་གསང་ཡིབ་བཙོན་ཁང་དང་དེ་རྗེས་སྟོད་ལུང་ཁྲི་ཟམ་ཉེ་འཁྲིས་ཀྱི་བཙོན་ཁང་དུ་ཕྱི་ལོ་ ༡༩༩༠ ཟླ་ ༤ ཚེས་ ༤ ནས་ཕྱི་ལོ་ ༡༩༩༢ ཟླ་ ༤ ཚེས་ ༢ བར་བཙོན་བཅུག་བྱས་རྗེས་གློད་བཀྲོལ་བཏང་ནས་ཡུན་རིང་མ་སོང་བར་བཙན་བྱོལ་དུ་བྲོས་བྱོལ་གྱིས་ཕྱི་ལོ་ ༡༩༩༢ ཟླ་ ༥ ཚེས་ ༧ ཉིན་བཞུགས་སྒར་རྡ་སར་འབྱོར་ནས་རྒྱ་གར་ལྷོ་ཕྱོགས་དགའ་ལྡན་ཤར་རྩེ་ལྷོ་པ་ཁང་ཚན་དུ་ཆོས་ཞུགས་གནང་བ་དང་། དགོན་པར་སྡོད་རིང་དགོན་སྡེའི་ཞུ་སྒོ་མཐའ་དག་དང་། དགེ་རྒན་གྱི་ཕྱག་ལས་རྣམས་ལྷག་བསམ་རྣམ་དག་གིས་བསྒྲུབས་ཡོད་འདུག་ཅིང་། སྟབས་མ་ལེགས་པར་ལོ་ཤས་གོང་ནས་ཁོང་ཕོ་བ་སྙུང་ནས་སྨན་ཁང་དུ་བསྟེན་གཏུགས་ཀྱིས་སྨན་བཅོས་ཡུན་རིང་གནང་རུང་དྲག་བསྐྱེད་མ་བྱུང་བར་མཐར་ཕྱི་ལོ་ ༢༠༢༢ ཟླ་ ༩ ཚེས་ ༢༢ དགོང་མོ་ཆུ་ཚོད་ ༩།༤༥ ཙམ་ལ་རང་ཉིད་ཀྱི་གཟིམས་ཤག་ཏུ་སྐུ་ཚེ་མ་ཟིན་པའི་གནས་ཚུལ་ཐོན་འདུག་ལ་ད་ཆ་ཁོང་ཐུགས་དམ་དུ་བཞུགས་ཡོད་འདུག་པ་བཅས། །
