༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ནས་རང་རེའི་སྤྱི་ཚོགས་ནང་ན་གཞོན་བར་ལྡིང་ལས་འཕེར་ལས་མེད་རྣམས་ལ་ལས་རིགས་སྦྱོང་བརྡར་བརྒྱུད་རང་ཁ་རང་འཚོ་ཐུབ་རྒྱུར་སེམས་ཤུགས་དང་ནུས་སྟོབས་གོང་སྤེལ་གཏང་རྒྱུ་དང་། ལས་རིགས་སྦྱོང་བརྡར་ཐོན་རྗེས་སྤྱི་སྒེར་གཉིས་ཕན་གྱི་དམིགས་དཔེར་འོས་པའི་ལས་འཆར་སྤེལ་མཁན་ན་གཞོན་རྣམས་ལ་ཆེས་མཐོང་དང་ངོས་འཛིན་ཞུ་ཆེད། ལོ་ལྟར་དབུས་ས་གཉིས་ཀྱི་ན་གཞོན་གཟེངས་བསྟོད་ཚོགས་ཆུང་ནས་དམིགས་དཔེར་འོས་པའི་ན་གཞོན་གྲངས་ ༢ འདེམས་སྒྲུག་གིས་བོད་ལྗོངས་མང་གཙོ་དུས་ཆེན་གྱི་གཞུང་འབྲེལ་མཛད་སྒོའི་སྐབས་གཟེངས་བསྟོད་འབུལ་མུས་སུ་ཡོད་པ་ལྟར།  ཕྱི་ལོ་ ༢༠༢༢ ལོའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་ནུས་སྤེལ་གཟེངས་བསྟོད་བཞེས་མཁན་ཁོངས་དྷ་སར་གནས་སྡོད་བསྟན་འཛིན་དང་སྦེལ་ཀོབ་ལུགས་ཟུང་བསམ་གྲུབ་གླིང་གཞིས་ཁོངས་ཟླ་བ་སྒྲོལ་མ་རྣམ་གཉིས་འདེམས་སྒྲུག་གནང་ཡོད་པས་ཁོང་གཉིས་ལ་གཟེངས་བསྟོད་དུ་ཕྱག་འཁྱེར་དང་། མཇལ་དར། ལེགས་སྐྱེས་ཧིན་སྒོར་ ༣,༥༠༠ རེ་འབུལ་རྒྱུ། ཁོང་གཉིས་ཀྱི་ལོ་རྒྱུས་སྙིང་བསྡུས་གཤམ་གསལ།༡༽ བསྟན་འཛིན། (དྷ་ས།)

• དྷ་ས་གནས་སྡོད་བུ་མོ་བསྟན་འཛིན་ནི་བོད་དིང་རི་གླང་འཁོར་ནས་ཡིན་ཞིང་། ཕྱི་ལོ་ ༢༠༠༣ ལོར་རྒྱ་གར་དུ་འབྱོར་རྗེས་སུ་ཇ་བོད་ཁྱིམ་དུ་སློབ་ཞུགས་ཀྱིས་ཕྱི་ལོ་ ༢༠༡༣ ལོར་འཛིན་རིམ་ ༡༢ སློབ་མཐར་སོན། ཕྱི་ལོ་ ༢༠༡༧ ལོར་བོད་ཁྱིམ་ཁྱབ་ཁོངས་སེ་ལ་ཀུའི་བཟོ་རིག་སྒྱུ་རྩལ་སློབ་གཉེར་བསྟི་གནས་ཁང་ནས་ལོ་ ༢ ཙམ་རིང་བག་ཟན་དང་མངར་ཟས་བཟོ་ལས་ཀྱི་སྦྱོང་བརྡར་ཐོན་པ་དང་། ཇེ་སྤུར་རྟེན་གཞི་བྱས་པའི་ (Trident, 5 Star Hotel, Jaipur) སྐར་མ་ལྔ་ཅན་གྱི་མགྲོན་ཁང་ནང་ཟླ་དྲུག་རིང་ཉམས་གསོག་སྦྱོང་བརྡར་ལེགས་པར་ཐོན།
• ལོ་གཅིག་ཙམ་རིང་དྷ་ས་པདྨ་ཐང་མགྲོན་ཁང་དང་འོད་ཟེར་བག་ཟན་ཚོང་ཁང་བཅས་ཀྱི་ནང་ཕྱག་ལས་གནང་རྗེས་ཕྱི་ལོ་ ༢༠༡༨ ནས་དྷ་ས་མེག་གྷན་དུ་དོ་བདག་སྒེར་གྱིས་བག་ཟན་དང་མངར་ཟས་བཟོ་ཚོང་འགོ་འཛུགས་ཀྱིས་རང་སྐྱོང་གི་ཚོང་ལས་གཉེར་ཏེ་ད་བར་ལོ་བཞི་ལྷག་འགྲོ་མུས་དང་། ཁོ་མོའི་ཟ་ཁང་ནང་འཐུང་ཇ་རིགས་འདྲ་མིན་དང་། ལ་ཕིང་། དུས་གསུམ་གྱི་ཞལ་ལག་ཀྱང་ཚོང་སྒྱུར་གོ་སྒྲིག་ཞུ་བཞིན་ཡོད།
• ད་ལྟའི་ཆར་ཁོ་མོའི་ཟ་ཁང་ནང་བོད་རིགས་གཞོན་སྐྱེས་གསུམ་ལ་ལས་ཀའི་གོ་སྐབས་སྤྲད་དེ་ལས་ཀ་བྱེད་མུས་མ་ཟད། ཚོང་ལས་ཀྱི་ཞོར་དུ་དོ་དབྱིངས་ཡོད་པའི་ཕྱི་ནང་མི་རིགས་ཁག་གཅིག་ལ་རིན་མེད་ཐོག་བག་ཟན་དང་སྤྲི་སྒོར། པཱི་ཛ། དེ་བཞིན་ལ་ཕིང་བཟོ་སྟངས་ཀྱི་སློབ་འཁྲིད་བྱས་དང་བྱེད་མུས་ཡིན། མདོར་ན་དོ་བདག་སྒེར་འཚོ་བ་རང་རྐྱ་འཕེར་བ་ཙམ་མིན་པར་མི་གཞན་ལའང་སློབ་འཁྲིད་དང་ལས་འཚོལ་རམ་འདེམས་ཞུ་མཁན་གྱི་དམིགས་དཔེར་འོས་པའི་བོད་རིགས་ན་གཞོན་བུད་མེད་ཅིག་ཡིན།

༢༽ ཟླ་བ་སྒྲོལ་མ། (སྦེལ་ཀོབ་ལུགས་བསམ།)

• སྦེལ་ཀོབ་ལུགས་བསམ་གཞིས་ཁོངས་ཟླ་བ་སྒྲོལ་མ་ནི་བོད་ཀོང་པོ་ནས་ཡིན་ཞིང་། ཕྱི་ལོ་ ༡༩༩༢ ལོར་རྒྱ་གར་དུ་འབྱོར་རྗེས་ཏི་ཛུ་དར་རྒྱས་གླིང་དང་ཌལ་ཧོར་ཕུན་ཚོགས་གླིང་གཏན་སློབ་ནས་རིམ་བཞིན་འཛིན་གྲྭ་ ༡༠ བར་ཐོན། ཕྱི་ལོ་ ༢༠༠༧ ལོར་བོད་ཁྱིམ་ཁྱབ་ཁོངས་སེ་ལ་ཀུའི་བཟོ་རིག་སྒྱུ་རྩལ་སློབ་གཉེར་བསྟི་གནས་ཁང་ནས་ཟླ་གྲངས་ ༡༢ རིང་མཛེས་བཟོ་དང་སྐྲ་བཟོའི་ལས་རིགས་སྦྱོང་བརྡར་ཐོན།
• ཕྱི་ལོ་ ༢༠༠༧ ནས་ ༢༠༡༠ བར་ལོ་གསུམ་ཙམ་རིང་རྒྱར་ལྷོ་ཕྱོགས་གྷོ་བ་ (Goa) ནང་རྟེན་གཞི་བྱས་པའི་ (Shringar Ladies Beaty Parlour, Laffiness Ladies Beauty Parlour, Puja Beauty Parlour etc.) བཅས་སྐྲ་བཟོ་དང་མཛེས་བཟོ་ཁང་འདྲ་མིན་ནང་ཕྱག་ལས་གནང་། ཕྱི་ལོ་ ༢༠༡༠ ནས་ལོ་གཅིག་རིང་ཁྱིམ་སོ་སོའི་ནང་བསྐྱོད་དེ་སྐྲ་བཟོ་དང་མཛེས་བཟོའི་ཞབས་ཞུ་མཁོ་སྤྲོད་བྱས་མཐར། ཕྱི་ལོ་ ༢༠༡༢ ལོར་རྒྱ་གར་ལྷོ་ཕྱོགས་གྷོ་བ་ས་གནས་སུ་སྒེར་གྱི་མཛེས་བཟོ་དང་སྐྲ་བཟོ་ཁང་གསར་འཛུགས་ཀྱིས་རང་སྐྱོང་གི་ཚོང་ལས་གཉེར་ཏེ་ད་བར་ལོ་བཅུ་གཉིས་ཙམ་འགྲོ་མུས། 
• ད་ལྟའི་ཆར་བོད་ཁྱིམ་ཁྱབ་ཁོངས་སེ་ལ་ཀུའི་ལག་ཤེས་སྦྱོང་བརྡར་ཁང་ནས་ཐོན་པའི་བོད་རིགས་བུ་མོ་གྲངས་བཞི་དང་། རྒྱ་གར་ཡུལ་མི་བུ་མོ་གྲངས་ ༢ བཅས་ལ་ལས་ཀའི་གོ་སྐབས་སྤྲད་དེ་ལས་ཀ་བྱེད་མུས་མ་ཟད། ལས་མི་དེ་དག་ལ་སྡོད་ཁང་དང་ཟས་དོད། ཆུ་གློག་བཅས་ཀྱི་འགྲོ་གྲོན་དོ་བདག་སྒེར་ནས་མཐུན་སྦྱོར་ཞུ་མུས། གཞན་ཡང་ཁོ་མོས་ད་བར་བོད་རིགས་བུ་མོ་མང་དག་ཅིག་ལ་སྦྱོང་བརྡར་སྤྲད་པ་དང་། སེ་ལ་ཀུའི་སྦྱོང་བརྡར་ཁང་ནས་ཐོན་པའི་སྦྱོང་བརྡར་བ་རྣམས་ལ་ཁོ་མོའི་མཛེས་བཟོ་ཁང་དུ་ཟླ་དྲུག་རེའི་ཉམས་གསོག་སྦྱོང་བརྡར་བཅས་སྤྲོད་པ་མཉམ་ལས་འཚོལ་རམ་འདེགས་ཀྱང་ཞུ་བཞིན་ཡོད། མདོར་ན་དོ་བདག་སྒེར་རང་ཁ་རང་གསོ་ཐུབ་པ་ཙམ་མིན་པར་ཕྱི་ནང་གི་གཞོན་སྐྱེས་གཞན་ལའང་ཆེད་གཉེར་སྒྱུ་རྩལ་སློབ་འཁྲིད་དང་ལས་འཚོལ་རམ་འདེགས་ཞུ་མཁན་གྱི་དམིགས་དཔེར་འོས་པའི་བོད་རིགས་ན་གཞོན་བུ་མེད་ཅིག་ཆགས་ཀྱི་ཡོད།
• ད་ཐེངས་ཁོ་མོའི་ལས་ཡུལ་ས་གནས་ནས་འགྲུལ་བཞུད་སྐབས་གནམ་གྲུ་ཕྱིར་འཐེན་བྱུང་རྐྱེན་ས་གནས་མང་གཙོ་དུས་ཆེན་གྱི་མཛད་སྒོར་ངོ་བཅར་ཐུབ་མེད་སྟབས་ཁོ་མོའི་ཚབ་ཏུ་བཟའ་ཟླ་དང་བུ་མོ་གཉིས་ནས་གཟེངས་བསྟོད་བཞེས་གནང་ཡོད།།