༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་སུད་སི་སྐུ་ཚབ་དོན་ཁང་ཟུང་སྦྲེལ་ཐོག་གོ་སྒྲིག་ཞུས་པའི་རྒྱལ་ཚོགས་སུ་བོད་དོན་ཞུ་གཏུག་གནང་ཕྱོགས་སྐོར་གྱི་ཟབ་སྦྱོང་ཕྱི་ལོ་ ༢༠༢༢ ཟླ་བ་ ༠༩ ཚེས་ ༢༢ ཉིན་མཇུག་སྒྲིལ་ཡོད།
དེ་ཡང་ཟབ་སྦྱོང་གི་ཉིན་མཐའ་མར་བོད་དོན་ཞུ་གཏུག་ལས་འགུལ་གྱི་ཚོགས་མི་དང་ཚོགས་བཅར་བ་ཡོངས་ཀྱིས་མཚན་རྟགས་བཀོད་པའི་ཞུ་ཡིག་ཅིག་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ལས་བྱེད་ལ་ཕུལ་ཐུབ་པ་བྱུང་ཡོད་པ་དང་། ཞུ་ཡིག་ནང་དུ་གཙོ་བོ་དེང་སྐབས་ལྷ་ས་གཙོས་པའི་བོད་ཀྱི་ས་གནས་ཁག་ཏུ་ཏོག་དབྱིབས་གཉན་རིམས་ལ་ཁ་གཡར་ནས་རྒྱ་གཞུང་གིས་བོད་མིར་སྡུག་སྦྱོང་མནར་སྤྱོད་གཏོང་བཞིན་པ་སོགས་བོད་ནང་འགྲོ་བ་མིའི་ཐོབ་ཐང་རྡོག་རོལ་བཏང་བའི་གནས་ཚུལ་ཛ་དྲག་ཅན་ལྔ་ཆེད་འགོད་ཀྱིས་རྒྱལ་ཚོགས་ནས་དེ་དོན་དོ་སྣང་དང་ཐེ་བྱུས་གནང་དགོས་སྐོར་དང་། དེ་བཞིན་ཛ་དྲག་གནས་ཚུལ་དེ་རིགས་སེལ་ཐབས་ཀྱི་ཐབས་ལམ་ཇི་ཡོད་སྐོར་ཡང་ཞུ་སྐུལ་གནང་ཡོད།
ཉིན་མཐའ་མར་ཚོགས་བཅར་བ་རྣམས་ལ་རྒྱལ་ཚོགས་སུ་བོད་དོན་ཞུ་གཏུག་གནང་ཕྱོགས་སྐོར་ཟབ་ཁྲིད་གནང་བ་མ་ཟད། ཚོགས་བཅར་བ་རྣམས་དངོས་སུ་མཉམ་འབྲེལ་རྒྱལ་ཚོགས་སུ་ལྟ་སྐོར་ལ་ཁྲིད་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ པའི་རྒྱུན་ལྡན་གྱི་ཚོགས་ཐུན་དང་རྒྱལ་ཚོགས་ཀྱི་གཡས་གཡོན་ཁོར་ཡུག་ལ་ལྟ་ཞིབ་བྱ་རྒྱུའི་གོ་སྐབས་ཐོབ། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཀྱི་ཚོགས་འདུ་དང་ཟུར་ཚོགས་ཁག་ཚོགས་ལུགས་སྐོར་ངོ་སྤྲོད་གནང་བའི་ཁར། རང་ཉིད་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ་ཚོགས་འདུ་གོ་སྒྲིག་གནང་བའི་ཉམས་མྱོང་དང་དེ་འབྲེལ་ཚོགས་བཅར་བའི་དྲི་བར་ལན་འདེབས་གནང་ཡོད།
ཉིན་རྒྱབ་ཚོགས་བཅར་བ་ཁག་གཅིག་གིས་ཉིན་གསུམ་གྱི་ཟབ་སྦྱོང་གི་མྱོང་ཚོར་བརྗེ་སྤེལ་དང་ཟབ་སྦྱོང་སྐབས་གནས་ཚུལ་གསར་པ་ཇི་ཤེས་ངོ་སྤྲོད་དང་བོད་དོན་ཞུ་གཏུག་གི་གལ་གནད་སྐོར་བསམ་ཚུལ་བརྗེ་ལེན་བྱས། མཐའ་མཇུག་ཏུ་གོ་སྒྲིག་ཚོགས་ཆུང་ངོས་ནས་མཉམ་ཞུགས་པ་ཡོངས་ལ་ཐུགས་རྗེ་ལེགས་འབུལ་ཞུས་པ་དང་འབྲེལ་སླད་མར་རྒྱལ་ཚོགས་སུ་བོད་དོན་ཞུ་གཏུག་ཤུགས་ཆེར་གཏོང་དགོས་གལ་སྐོར་གསུངས་རྗེས་ཚོགས་བཅར་བ་རྣམས་སུད་སི་སྐུ་ཚབ་དོན་གཅོད་ཁད་དུ་ལྟ་སྐོར་དུ་བསྐྱོད་ཡོད་པ་བཅས།། 
