༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༢༤ ཉིན་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་རྣམས་ནས་ནི་དར་ལེནྜ་དང་བེལ་ཇམ་ཁུལ་གྱི་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་གནང་ཡོད། 

དེ་ཡང་ནི་དར་ལེནྜའི་རྒྱལ་ས་ཨམ་སི་ཊར་ཌམ་ (Amsterdam) དུ་འབྲུག་བསྟན་སྐྱིད་ལགས་དང་ཚེ་བརྟན་སྒྲོལ་མ་ལགས་རྣམ་གཉིས་དང་ལྷན་བེལ་ཇམ་དོན་ཁང་གི་རྩིས་པ་བསྟན་འཛིན་ནོར་ལྡན་ལགས་ཀྱིས་ཁུལ་དེའི་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་ཀྱིས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་གནང་ཡོད་པ་དང་། ཚོགས་འདུའི་ནང་ནི་དར་ལེནྜ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཚེ་རིང་བྱམས་པ་ལགས་དང་། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ཆོས་འཛོམས་ལགས། ས་གནས་བོད་རིགས་ཚོགས་པའི་ཚོགས་གཙོ་ཟླ་བ་ཚེ་རིང་ལགས་དང་ཚོགས་མི་བཅས་མཉམ་ཞུགས་གནང་ཡོད་པ་རེད། སྐབས་དེར་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ཚོགས་བཅར་བ་རྣམས་ལ་བོད་དོན་ཞུ་གཏུག་ལས་འགུལ་གྱི་དམིགས་ཡུལ་དང་། ལས་དོན་བྱེད་ཕྱོགས། ཐབས་བྱུས་འདིང་སྟངས། ལས་འགུལ་ནང་ཚོགས་ཞུགས་བྱ་ཕྱོགས་སོགས་ཀྱི་སྐོར་གསལ་བཤད་གནང་རྗེས་དང་བླངས་པ་རྣམས་ཀྱི་དོགས་དྲི་ཁག་ལ་ལན་འདེབས་གནང་ཡོད། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཟུར་པ་ཚེ་རིང་བྱམས་པ་ལགས་ཀྱིས་བོད་དོན་འཐབ་རྩོད་ཆེད་ད་ལྟའི་དུས་འདི་འོས་ཤིང་འཚམས་པ་དང་། བོད་ཀྱི་གནད་དོན་ཐད་ཞུ་གཏུག་གནང་གལ་ཆེ་བ་སོགས་ཀྱི་སྐོར་གསུངས་རྗེས་བེལ་ཇམ་དོན་ཁང་གི་རྩིས་པ་བསྟན་འཛིན་ནོར་ལྡན་ལགས་ཀྱིས་ཚོགས་མིའི་གྲངས་མང་དུ་གཏང་རྒྱུ་གལ་གནད་ཆེན་པོ་ཡིན་པ་མ་ཟད། དེ་ལས་གལ་ཆེ་བ་ལས་དོན་ཚགས་ཚུད་དགོས་རྒྱུར་ནན་བརྗོད་གནང་ཡོད། ཕྱོགས་མཚུངས་བོད་དོན་ཞུ་གཏུག་ཚན་པའི་ལས་བྱེད་བསྟན་འཛིན་དཔལ་མོ་ལགས་དང་རིན་ཆེན་ལགས་གཉིས་དང་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས། དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་བཅས་ནས་བེལ་ཇམ་ཁུལ་གྱི་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་ཀྱིས་ཐོག་མར་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྤྱི་མཐུན་ཚོགས་པའི་ཆབ་སྲིད་ངེས་སྟོན་པ་ཝིན་སེན་མེ་ཊན་ལགས་དང་མཇལ་འཕྲད་ཀྱིས་དང་བླངས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་གནང་། དེ་རྗེས་དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་རྣམས་དང་ཐུག་འཕྲད་ཀྱིས་དང་བླངས་བོད་དོན་ཞུ་གཏུག་ལས་འགུལ་སྐོར་འགྲེལ་བརྗོད་དང་ཚོགས་མི་ནང་ཁུལ་བསམ་ཚུལ་བརྗེ་ལེན་ཡང་གནང་ཡོད་པ་བཅས།།