༄༅། །སུད་སིའི་གྲོང་ཁྱེར་ཇི་ནི་ཝར་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་གནང་ཕྱོགས་ཀྱི་ཟབ་སྦྱོང་མཇུག་སྒྲིལ་རྗེས་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་རྣམས་ཡུ་རོབ་རྒྱལ་ཁབ་གཞན་ཁག་ཏུ་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་ཐུག་འཕྲད་དང་ཚོགས་འདུའི་ཆེད་ཕེབས་ཡོད། བོད་དོན་ཞུ་གཏུག་ཚན་པའི་ལས་བྱེད་ཁོངས་ནས་འགན་འཛིན་འབྲུག་བསྟན་སྐྱིད་ལགས་དང་ལས་བྱེད་ཚེ་བརྟན་སྒྲོལ་མ་ལགས་གཉིས་ཇར་མ་ནཱི་དང་། ལས་བྱེད་བསྟན་འཛིན་དཔལ་མོ་ལགས་དང་རིན་ཆེན་ལགས་གཉིས་སུད་སིར་ཕེབས་ཡོད་པ་རེད།
ཕྱི་ཚེས་ ༢༢ ཉིན་བསྟན་འཛིན་དཔལ་མོ་ལགས་དང་རིན་ཆེན་ལགས་རྣམ་གཉིས་ཀྱིས་ཛུ་རིག་ཏུ་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་ཀྱིས་ཆུ་ཚོད་གཉིས་ཙམ་རིང་བོད་དོན་ཞུ་གཏུག་ལས་འགུལ་དང་འབྲེལ་བའི་སྐོར་གྲོས་བསྡུར་གནང་རྗེས་ཕྱི་ཉིན་སྔ་དྲོ་ཕ་རཱན་སིར་ཕེབས་ཏེ་ཁུལ་དེའི་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་གནང་ཡོད།
ཕྱི་ཚེས་ ༢༣ ཉིན་པེ་རི་སིའི་འབྲེལ་མཐུད་ལས་ཁུངས་སུ་དང་བླངས་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་བོད་རིགས་ཚོགས་པའི་ཚོགས་མི་རྣམས་དང་ཐུག་འཕྲད་ཀྱིས་ཐེངས་འདིའི་ཕྱོགས་བསྐྱོད་ཀྱི་དགོས་དམིགས་དང་། དང་བླངས་བོད་དོན་ཞུ་གཏུག་ལས་འགུལ་དེ་བཞིན་བོད་དོན་འཐབ་རྩོད་ཆེད་ལས་འགུལ་རྩོམ་འདོད་ཡོད་རིགས་ལ་འོས་ཤིང་འཚམས་པའི་སྡིངས་ཆ་ཞིག་ཡིན་སྐོར་འགྲེལ་བརྗོད་གནང་ཡོད།
དེ་བཞིན་ཕྱི་ཚེས་ ༢༣ ཉིན་འབྲུག་བསྟན་སྐྱིད་ལགས་དང་། ཚེ་བརྟན་སྒྲོལ་མ་ལགས་རྣམ་གཉིས་ཇར་མ་ནཱིའི་ཧྤེ་རེང་ཕོག་ཏུ་ཕེབས་ཏེ་སྔ་དྲོ་དང་བླང་བོད་དོན་ཞུ་གཏུག་ལས་འགུལ་གྱི་དང་བླངས་པ་རྣམས་དང་ཐུག་འཕྲད་གནང་བ་དང་། ཉིན་རྒྱབ་དང་བླངས་བོད་དོན་ཞུ་གཏུག་ལས་འགུལ་ནང་མཉམ་ཞུགས་གནང་འདོད་ཡོད་པའི་བོད་མི་ཁག་གཅིག་དང་ཐུག་འཕྲད་གནང་ཡོད། སྐབས་དེར་བོད་དོན་ཞུ་གཏུག་ཚན་པའི་ལས་བྱེད་རྣམས་ནས་ས་གནས་སུ་བོད་དོན་ཞུ་གཏུག་གནང་ཕྱོགས་ཀྱི་ཐབས་བྱུས་དང་། ལས་འགུལ་སྤེལ་ཕྱོགས་སོགས་ཀྱི་སྐོར་ལམ་སྟོན་གནང་ཡོད་ཅིང་། དེ་རྗེས་ཁོང་གཉིས་ཨམ་ཊར་ཊམ་ལ་ཕེབས་རྒྱུ་ཡིན་པ་རེད།
ཚོགས་འདུ་དེ་དག་སུད་སི་དང་བེལ་ཇམ་སྐུ་ཚབ་དོན་ཁང་སོ་སོ་ནས་འབྲེལ་མཐུད་དང་ས་གནས་བོད་རིགས་ཚོགས་པས་གོ་སྒྲིག་མཐུན་སྦྱོར་གནང་ཡོད་པ་བཅས།།
