༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་འགྲེམས་སྟོན་ཁང་གིས་ཕྱི་ལོ་ ༢༠༢༢ ཟླ་ ༠༩ ཚེས་ ༡༥ ནས་ ༢༥ བར་ཉིན་གྲངས་བཅུའི་རིང་ལ་དྭགས་བསོད་ནམས་གླིང་བོད་མིའི་གཞིས་ཆགས་དང་ལ་དྭགས་བྱང་ཐང་ཁུལ་གྱི་འབྲོག་སྡེ་ཉོ་མ་དང་། ཧན་ལེ། སུམ་མདོ་བཅས་སུ་འགྲེམས་སྟོན་སྐོར་སྐྱོད་གནང་ཡོད།
ཕྱི་དྲིལ་བོད་ཀྱི་འགྲེམས་སྟོན་ཁང་གི་འབྲེལ་ཡོད་ལས་བྱེད་ཁག་གཅིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ན་ཕྲ་བའི་སྐབས་ནས་བཟུང་ད་བར་འཛམ་གླིང་སྤྱི་དང་། ཡང་སྒོས་བོད་དོན་དང་བོད་མིའི་ཆེད་དུ་སྐུ་ངལ་འཛེམས་མེད་ཀྱིས་མཛད་པ་འཕྲིན་ལས་བསྐྱངས་དང་སྐྱོང་བཞིན་པའི་མཛད་རྣམ་སྐོར་སྐུ་པར་གྱི་ལམ་ནས་འགྲེམས་སྟོན་གནང་ཡོད་པ་མ་ཟད། རྡ་སར་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་གསར་པའི་སྐོར་གོ་རྟོགས་སྤེལ་བ་དང་སྦྲགས་བོད་ཀྱི་འགྲེམས་སྟོན་ཁང་གསར་པ་ལེགས་གྲུབ་བྱུང་བར་གཙོ་བོ་སྦྱིན་བདག་དང་འབྲེལ་ཡོད་ཕྱག་ལས་གནང་མཁན་ཡོངས་ལ་ཐུགས་རྗེ་ཞུས་གནང་ཡོད།
དེ་ཡང་ལ་སྤྱི་དོན་གྲུབ་བཀྲ་ཤིས་ལགས་ཀྱིས་ལམ་སྟོན་དང་། ལ་སྤྱི་ལས་ཁུངས་ཀྱི་ལས་བྱེད་རྣམ་པ། དེ་བཞིན་ལ་དྭགས་བོད་ཁྱིམ་སློབ་གྲྭའི་འགན་འཛིན་དང་ལས་བྱེད་བཅས་ཀྱི་མཐུན་འགྱུར་འོག་བོད་ཀྱི་འགྲེམས་སྟོན་ཁང་གིས་ཕྱི་ལོ་ ༢༠༢༢ ཟླ་ ༠༩ ཚེས་ ༡༦ ཉིན་ལྕོག་ལམ་གསར་བོད་ཁྱིམ་སློབ་གྲྭའི་ཚོགས་ཁང་དུ་འགྲེམས་སྟོན་གནང་ཡོད། སྐབས་དེར་ཡིད་བཞིན་ནོར་བུའི་ཡང་སྲིད་འཚོལ་བ་ཞེས་པ་འགུལ་རིས་ཀྱི་ལམ་ནས་གཟིགས་འབུལ་ཞུས་ཡོད། ལྕོག་ལམ་གསར་བོད་ཁྱིམ་སློབ་གྲྭའི་སློབ་སྤྱི་ལྷུན་གྲུབ་རྣམ་རྒྱལ་ལགས་ཀྱིས་འགྲེམས་སྟོན་དབུ་འབྱེད་ཀྱི་གསུང་བཤད་གནང་རྗེས་བོད་ཀྱི་འགྲེམས་སྟོན་ཁང་གི་འབྲེལ་ཡོད་ལས་བྱེད་ཀྱིས་འགྲེམས་སྟོན་སྐོར་སྐྱོད་ཀྱི་ལས་གཞིའི་དགོས་དམིགས་སྐོར་ངོ་སྤྲོད་གནང་། འགྲེམས་སྟོན་དབུ་འབྱེད་ཀྱི་མཛད་སྒོར་ལྕོག་ལམ་གསར་བོད་ཁྱིམ་སློབ་གྲྭའི་དགེ་ལས་སློབ་ཕྲུག་སོགས་ ༡༠༠༠ ལྷག་མཉམ་ཞུགས་གནང་ཡོད།
ཕྱི་ཚེས་ ༡༧ ཉིན་བོད་ཀྱི་འགྲེམས་སྟོན་ཁང་གིས་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ཚོགས་ཁང་དུ་གོང་མཚུངས་ལྟར་འགྲེམས་སྟོན་གནང་སྐབས་ས་གནས་ཀྱི་བོད་མི་གྲངས་ ༥༠༠ ལྷག་མཉམ་ཞུགས་གནང་ཡོད་དང་། ལ་སྤྱི་དོན་གྲུབ་བཀྲ་ཤིས་ལགས་ཀྱིས་ཕེབས་བསུའི་གསུང་བཤད་གནང་། ཕྱི་ཚེས་ ༡༨ ཉིན་ཨག་གླིང་བོད་ཁྱིམ་སློབ་གྲྭའི་ཚོགས་ཁང་ནང་དགེ་ལས་དང་། འཛིན་རིམ་དང་པོ་དང་གཉིས་པའི་སློབ་ཕྲུག་རྣམས་ལ་འགྲེམས་སྟོན་དང་། ཕྱི་ཚེས་ ༢༡ ཉིན་བྱང་ཐང་ཉོ་མ་གཞིས་གྲོང་གི་བརྒྱ་དཔོན་ཨོ་རྒྱན་དོན་གྲུབ་ལགས་ཀྱིས་མཐུན་འགྱུར་འོག་མི་མང་ཚོགས་ཁང་དུ་ཉོ་མ་བོད་ཁྱིམ་སློབ་གྲྭའི་སློབ་ཕྲུག་གྲངས་ ༥༦ དང་དགེ་རྒན་རྣམས་ལ་འགྲེམས་སྟོན་གནང་ཡོད།
ཕྱོགས་མཚུངས་ཕྱི་ཚེས་ ༢༢ ཉིན་ཧན་ལེ་བོད་ཁྱིམ་སློབ་གྲྭའི་ཚོགས་ཁང་དུ་སློབ་ཕྲུག་ ༡༦༧ དང་ལས་བྱེད་ ༣༠། ས་གནས་མི་མང་ ༥༠ བཅས་ལ་འགྲེམས་སྟོན་གནང་ཡོད་པ་མ་ཟད། ཕྱི་ཚེས་ ༢༣ ཉིན་སུམ་མདོ་ས་གནས་བོད་མི་རྣམས་ལ་འགྲེམས་སྟོན་གནང་ཡོད་པ་དང་། སྐབས་དེར་སུམ་མདོ་བོད་ཁྱིམ་སློབ་གྲྭའི་འཛིན་རིམ་ ༡ ནས་ ༣ བར་གྱི་སློབ་ཕྲུག་དང་དགེ་རྒན་སོགས་ཕེབས་ཡོད་པ་བཅས།།
