༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༠༣ དང་ ༠༤ བཅས་ཉིན་གྲངས་གཉིས་རིང་ཕ་རཱན་སིའི་རྒྱལ་ས་པེ་རི་སིར་བོད་ཀྱི་དུས་སྟོན་ཐེངས་ཉེར་གཅིག་པ་ཚོགས་འདུག 

དེ་ཡང་དུས་སྟོན་གྱི་སྐུ་མགྲོན་དུ་པེ་རི་སི་གྲོང་སྡེའི་སྤྱི་ཁྱབ་ལྕམ་ཨི་མཱ་ནུལ་པེ་རི་ (Emanuelle Pierre Marie) ལགས་དང་། པེ་རི་སི་གྲོང་སྡེའི་གྲོས་ཚོགས་འཐུས་མི་ལྕམ་གྷ་རི་གོ་ (Geneviève Garrigos) ལགས། བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཆེད་ཕེབས་ཀྱིས་དུས་སྟོན་དབུ་འབྱེད་གནང་འདུག སྐབས་དེར་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་བུད་མེད་སྐུ་ཚབ་དོན་གཅོད་ཐོག་མ་གཡུ་ཐོག་ལགས་ཀྱིས་ཕྱི་ལོ་ ༢༠༠༠ ལོར་ཐོག་མར་བོད་དང་ཧི་མ་ལ་ཡའི་དུས་སྟོན་དབུ་འཛུགས་གནང་བར་རྗེས་དྲན་དང་ཆེ་བསྟོད་ཞུས་རྗེས་བོད་མི་རྣམས་ཀྱིས་ཕ་རཱན་སིའི་གཞུང་ལ་དཔལ་འབྱོར་གྱི་ཞབས་འདེགས་ཞུ་གི་ཡོད་པ་མ་ཟད། བོད་མི་རྣམས་ས་གནས་མི་མང་ལྷན་ཞི་བདེ་མཉམ་གནས་ངང་འཚོ་བཞིན་ཡོད་སྐོར་དྲན་གསོ་གནང་འདུག ཐེངས་འདིའི་དུས་སྟོན་གྱི་བརྗོད་སྙིང་བོད་ཀྱི་གཙང་པོ་ནི་ཆིག་སྒྲིལ་གྱི་ནུས་པ་ཡིན་ཞེས་པ་ཡིན་འདུག་ཅིང་། དུས་སྟོན་ནང་བོད་མིའི་རིག་གཞུང་དང་ཁ་ཟས་གོམས་སྲོལ་དང་འབྲེལ་བའི་ཚོང་རིགས། ནང་ཆོས་ངོ་སྤྲོད། གཞས་སྣ་འཁྲབ་སྟོན། འགྲེམས་སྟོན། གློག་བརྙན་གཟིགས་འབུལ། བགྲོ་གླེང་སོགས་ཚོགས་འདུག ད་ལྟའི་བོད་ནང་གི་གནས་སྟངས་ཞེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་འདུག་པའི་ནང་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། གསར་འགོད་པ་དང་ (AFP) ཞེས་པའི་གསར་ཁང་གི་སྤྱི་ཁྱབ་རྩོམ་སྒྲིག་པ་ཟུར་པ་སྐུ་ཞབས་པི་རི་ (Pierre Antoine Donnet) ལགས་མཉམ་ཞུགས་གནང་འདུག་ཅིང། སྐབས་དེར་སྐུ་ཞབས་པི་རི་ལགས་དང་ཁོང་གི་ཕྱག་རོགས་ཚོས་བརྩམས་པའི་དཔེ་དེབ་རྒྱ་ནག་གི་ཡིག་ཆ་ (Chinese files) ཞེས་པའང་བསྟན་འདུག 

དུས་སྟོན་ཐོག་ཁྱོན་མི་གྲངས་ ༥༠༠༠ ལྷག་ཚོགས་བཅར་གནང་འདུག་པ་དང་། དུས་སྟོན་གྱི་མཇུག་ཏུ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་དུས་སྟོན་གོ་སྒྲིག་ཆེད་རོགས་སྐྱོར་གནང་མཁན་དང་བླངས་པ་རྣམས་ལ་ཐུགས་རྗེ་ལེགས་འབུལ་ཞུས་རྗེས་ཕྱི་དྲོ་བཀྲ་ཤིས་སྒོར་གཞས་དང་བཅས་བོད་ཀྱི་དུས་སྟོན་ཐེངས་ཉེར་གཅིག་པ་ལེགས་པར་མཇུག་སྒྲིལ་འདུག  །