༄༅། །འདི་གར་ས་ཊོན་ཁམས་ཀཿཐོག་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༩ ཚེས་ ༡ ཉིན་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ས་ཊོན་ཁམས་ཀཿཐོག་བོད་མིའི་གཞིས་སྒར་དུ་ཕེབས་འབྱོར་སྐབས་ས་ཊོན་ཁམས་ཀཿ་ཐོག་བོད་མིའི་གཞིས་སྒར་གྱི་ས་གནས་འགོ་འཛིན་བསོད་ནམས་དབང་འདུས་ལགས་དང་། ས་འཐུས་ཚོགས་གཞོན་ཀུན་དགའ་ཚེ་དཔལ་ལགས། ས་གནས་རང་བདེན་ཚོགས་ཆུང་གི་ཚོགས་གཙོ་བསྟན་འཛིན་བསོད་ནམས་ལགས། དེ་བཞིན་གཞིས་སྒར་གྱི་སེར་སྐྱ་མི་མང་ཡོངས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྐབས་དེར་ནང་སྲིད་འཛིན་གཞིས་ཚན་པའི་དྲུང་ལས་བསྟན་འཛིན་མཆོག་ལྡན་ལགས་ཀྱང་ལྷན་བཅར་ཞུས་ཡོད།
ཕྱི་ཚེས་ ༢ ཉིན་གྱི་སྔ་དྲོ་ཆུ་ཚོད་ ༡༠ ཐོག་ཀུམ་རའོ་སྒ་པ་དང་། སྤོན་ཊ་ཆོས་གསུམ། ས་སྐྱ་སྤུ་རུ་ཝ་ལ། ཧར་པ་སྤུར་འདོད་རྒུ་གཡུ་རྒྱལ་གླིང་གཞིས་སྒར་བཅས་ཀྱི་ས་གནས་འགོ་འཛིན་རྣམ་པ་དང་། ས་འཐུས་ཚོགས་གཙོ། ས་གནས་རང་བདེན་ཚོགས་ཆུང་གི་ཚོགས་གཙོ། ཚོགས་པའི་ཚོགས་གཙོ་དང་དྲུང་ཆེ། གཞན་ཡང་ས་ཊོན་གཞིས་སྒར་གྱི་སེར་སྐྱ་མི་མང་ཡོངས་མཉམ་འཛོམས་ཐོག་ནང་སྲིང་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་གཞིས་སྒར་གྱི་རྒྱལ་སྒོ་གཙོས་པའི་ལས་གཞི་གསར་པ་ཁག་མཇུག་སྒྲིལ་ལེགས་གྲུབ་ཟིན་པ་ཁག་དབུ་འབྱེད་གནང་ཡོད།
དེ་རྗེས་བཙན་བྱོལ་བོད་མིའི་མང་གཙོའི་གཞུང་དབུ་བརྙེས་ཏེ་ལོ་ངོ་ ༦༢ འཁོར་བའི་དུས་ཆེན་སྲུང་བརྩི་ཞུས་ཡོད་པ་དང་། མཛད་སྒོ་དབུ་འཛུགས་ཀྱི་ཐོག་མར་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་སྤོས་སྣེས་སྔོན་བསུས་ཏེ་མཛད་སྒོའི་བཞུགས་ཁྲི་སྟེང་གདན་ཞུས་དང་། ས་འཐུས་ཚོགས་གཞོན་གྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་དང་། ས་གནས་འགོ་འཛིན་གྱིས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་ཞུས། དེ་ནས་སྐུ་མགྲོན་གཙོ་བོ་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་ས་ཊོན་ཁམས་ཀཿཐོག་བོད་མིའི་གཞིས་སྒར་གྱི་མི་རབས་རྒན་པ་རྣམས་ཀྱི་སྐུ་ལས་བསྐྱོན་པའི་རྒྱབ་ལྗོངས་ལོ་རྒྱུས་དང་། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་ལས་གཞི་ཁག་ལ་མཐུན་འགྱུར་གནང་བ་སོགས་ཀྱི་གསུང་བཤད་གནང་།
མཛད་སྒོ་ལེགས་གྲུབ་ཟིན་མཚམས་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་གཞིས་སྒར་གྱི་གཡས་གཡོན་དུ་འཚམས་གཟིགས་གནང་ཡོད་པ་བཅས། །
