༄༅། །ཕྱི་ལོ་ ༢༠༢༢ ཟླ་ ༠༩ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་སྤྱིའི་སྟེང་བོད་དོན་ཇི་ལྟར་གལ་གནད་ཆེ་ཚུལ་སྐོར་ཉི་ཧོང་གི་རེ་ཏ་ཀུ་གཙུག་ལག་སློབ་གཉེར་ཁང་ (Reitaku University) དང་། ཆི་བྷ་འཕྲུལ་རིག་སློབ་གཉེར་བསྟི་གནས་ཁང་ (Chiba Institute of Technology) གི་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རེ་ཏ་ཀུ་གཙུག་ལག་སློབ་གཉེར་ཁང་དུ་ཕེབས་འབྱོར་སྐབས་རེ་ཏ་ཀུ་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་རྣམས་ཀྱིས་ལག་ཏུ་བོད་དང་ཉི་ཧོང་གི་རྒྱལ་དར་བཟུང་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དེ་ཡང་དཔལ་ལྡན་སྲིད་སྐྱོང་མཆོག་གིས་བོད་མཐོ་སྒང་གི་ས་ཁམས་དང་ཁོར་ཡུག་གི་སྐོར་གསུང་བཤད་གནང་སྐབས་ཨེ་ཤི་ཡའི་མི་འབོར་ཐེར་འབུམ་ ༡.༨ ལྷག་གིས་བོད་མཐོ་སྒང་ནས་གཞུར་བཞིན་པའི་གཙང་པོ་གཙོ་བོ་བཅུ་ལ་བརྟེན་ནས་འཚོ་བཞིན་ཡོད་སྟབས་བོད་མཐོ་སྒང་གི་ཁོར་ཡུག་ལ་སྲུང་སྐྱོབ་བྱེད་དགོས་པའི་གལ་གནད་དང་། བོད་མཐོ་སྒང་གི་གནམ་གཤིས་འགྱུར་ལྡོག་ལ་བརྟེན་ནས་བོད་ཀྱི་ཆུ་བོ་ཆེན་པོ་འབྲི་ཆུ་སྐམ་བཞིན་ཡོད་པ་མ་ཟད། བོད་མཐོ་སྒང་གི་གནམ་གཤིས་འགྱུར་ལྡོག་གིས་བོད་ཀྱི་ཁྱིམ་མཚེས་རྒྱལ་ཁབ་ཁག་ལའང་ཤུགས་རྐྱེན་ཚབས་ཆེན་ཐེབས་ངེས་ཡིན་པའི་སྐོར་གསུངས་ཡོད།གཞན་ཡང་དཔལ་ལྡན་སྲིད་སྐྱོང་མཆོག་གིས་རྒྱ་ནག་དམར་ཤོག་གཞུང་གིས་ཕྱི་ལོ་ ༡༩༤༩ ལོར་བོད་ལ་དབང་བསྒྱུར་མ་བྱས་གོང་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་ཞིང་། རྒྱལ་སྤྱིའི་ཁྲིམས་ལུགས་མཁས་དབང་སྐུ་ཞབས་མཱ་ཡི་ཀེལ་ཝན་ཝལ་ཊི་ (Michael Van Walt) ལགས་དང་རྒྱ་རིགས་མཁས་དབང་སྐུ་ཞབས་ལིག་ཧན་ཁྲིན་ (Hon-Shiang Lau) ལགས་ཀྱིས་བོད་དོན་སྐོར་ཞིབ་འཇུག་བྱས་པའི་གྲུབ་དོན་དུ་ལོ་རྒྱུས་ཐོག་བོད་ནི་རྒྱ་ནག་གི་ཆ་ཤས་སུ་ཆགས་མྱོང་མེད་པའི་དཔང་རྟགས་ཁུངས་སྐྱེལ་ར་སྤྲོད་གནང་ཡོད་པ། རྒྱལ་སྤྱིའི་གཞུང་ཁག་གིས་རྒྱ་ནག་གི་བཀོད་འདོམས་ལྟར་བོད་རྒྱ་ནག་གི་ཆ་ཤས་རེད་ཅེས་རྗོད་བཞིན་ཡོད་པ་དེ་ནི་རྒྱལ་སྤྱིའི་ཁྲིམས་དང་འགལ་གྱི་ཡོད་པ།ཉི་ཧོང་བ་ཚོས་རྒྱ་ནག་དང་ལྷན་འབྲེལ་བ་གནང་སྐབས་གང་གཟབ་མ་གནང་ན་མ་འོངས་པར་མང་གཙོ་དང་རང་དབང་ལ་དོ་ཕོག་འགྲོ་ངེས་ཡིན་པ། རྒྱ་ནག་གཞུང་གིས་མང་གཙོ་དང་། རང་དབང་། ཁྲིམས་ཀྱི་དབང་བསྒྱུར་བཅས་ལ་བརྩི་བཀུར་བྱེད་ཀྱི་མེད་པར་བརྟེན་ཉི་ཧོང་གི་སྲིད་བློན་སྐུ་ཞབས་ཧྥུ་མིའོ་ཀི་ཞི་དཱ་ (Fumio Kishida) མཆོག་གིས་རྒྱལ་སྤྱིའི་གུ་ཡངས་དང་མང་གཙོའི་སྒྲིག་འཛུགས་ལ་ཐུགས་རེ་གནང་གི་ཡོད་པ་དེ་འཇའ་ཚོན་བཞིན་ཡལ་བཞིན་ཡོད་སྟབས་རྒྱ་ནག་གི་བྱེད་སྟངས་སྐོར་ཤེས་རྟོགས་བྱེད་རྒྱུ་གལ་ཆེན་པོ་ཡིན་པ། ཉི་ཧོང་དང་བསྡུར་ན་རྒྱ་ནག་ལ་ཉི་ཧོང་གི་འཕྲུལ་རིག་དང་ཚོང་འབྲེལ་མང་བ་དགོས་ཀྱི་ཡོད་པས་ཉི་ཧོང་བ་ཚོས་རྒྱ་ནག་དང་མཉམ་ཚོང་འབྲེལ་བྱེད་སྐབས་ཉི་ཧོང་གཅིག་པུར་ཚོང་གི་གྱོང་རག་གི་ཡོད་པ་བསམ་རྒྱུ་མེད་པ། ཉི་ཧོང་ཚུད་པའི་རྒྱལ་སྤྱིའི་ཚོགས་སྡེ་ཁག་ནས་རྒྱ་ནག་དང་མཉམ་དུ་འབྲེལ་བ་གནང་སྐབས་འཇིགས་ཞུམ་མེད་པའི་སྒོ་ནས་འབྲེལ་བ་གནང་དགོས་པ་སོགས་ཀྱི་སྐོར་གསུངས་ཡོད།ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་གི་དྲི་བར་ལན་འདེབས་གནང་སྐབས་བོད་ཀྱི་རིག་གཞུང་གི་རྩ་བ་བོད་བརྒྱུད་ནང་བསྟན་ནས་གསུང་བའི་བྱམས་བརྩེ་དང་། བཟོད་བསྲན། དགོངས་ཡངས་སོགས་ཡིན་སྐོར་གསུངས་པ་དང་། ད་ལྟའི་ཆར་ཆི་བྷ་འཕྲུལ་རིག་སློབ་གཉེར་བསྟི་གནས་ཁང་དུ་བོད་པའི་སློབ་ཕྲུག་དྲུག་གིས་གཙུག་ལག་རབ་འབྱམས་པའི་སློབ་གཉེར་གནང་བཞིན་པ་དང་། དེ་བཞིན་ཉི་ཧོང་གི་རེ་ཏ་ཀུ་གཙུག་ལག་སློབ་གཉེར་ཁང་དུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གཅིག་གིས་ཉི་ཧོང་གི་སྐད་ཡིག་དང་རིག་གཞུང་ཐོག་སློབ་སྦྱོང་གནང་ཡོད་པས་ཉི་ཧོང་གི་གཙུག་ལག་སློབ་གཉེར་ཁང་གིས་བོད་པའི་སློབ་ཕྲུག་རྣམས་སློབ་སྦྱོང་གི་གོ་སྐབས་གནང་བར་ཐུགས་རྗེ་ཆེ་ཞུས་གནང་ཡོད།དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་པའི་སློབ་ཕྲུག་ཚོར་བོད་ནང་རྒྱ་ནག་གི་དབང་བསྒྱུར་འོག་དཀའ་སྡུག་མྱོང་བཞིན་པའི་གཞིས་ལུས་བོད་རིགས་སྤུན་ཟླ་རྣམས་ལ་ལྟ་རྟོག་བྱེད་རྒྱུའི་ལས་འགན་འཕར་མ་ཡོད་པ་མ་ཟད། ཉི་ཧོང་གི་གཙུག་ལག་སློབ་གཉེར་ཁང་གྲངས་ཅན་ཁག་ཏུ་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་ཚོས་གོ་སྐབས་རྩ་ཆེན་དེ་དག་ཆུད་ཟོས་སུ་མ་གཏང་བར་སློབ་སྦྱོང་ཧུར་ཐག་བྱས་ནས་བོད་དོན་སླད་དུ་ཕྱག་ལས་གནང་དགོས་པ། ཉི་ཧོང་བ་དང་བོད་མི་རྣམས་ནང་པའི་རྗེས་འབྲང་པ་གཅིག་པ་ཡིན་པའི་ཆ་ནས་བོད་པའི་དགེ་འདུན་པས་ཉི་ཧོང་དུ་སློབ་སྦྱོང་གནང་ཐུབ་ན་ཉི་ཧོང་དང་བོད་དབར་འབྲེལ་བ་གོང་འཕེལ་ཡོང་ཐུབ་པའི་རེ་བ་ཡོད། ཅེས་གསུངས། ཆི་བྷ་འཕྲུལ་རིག་སློབ་གཉེར་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་སེ་ཏོ་ཀུ་མ་ཨོ་སཱ་མུ་ (Setokuma Osamu) ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཆི་བྷ་འཕྲུལ་རིག་སློབ་གཉེར་བསྟི་གནས་ཁང་དུ་ཕེབས་པར་དགའ་བསུ་ཞུས་གནང་བ་དང་འབྲེལ་བོད་པའི་སློབ་ཕྲུག་རྣམས་ཀྱིས་ཧུར་བརྩོན་གནང་གི་ཡོད་པས་ཆི་བྷ་འཕྲུལ་རིག་སློབ་གཉེར་བསྟི་གནས་ཁང་གི་ངོས་ནས་མུ་མཐུད་བོད་པའི་སློབ་ཕྲུག་ཚོའི་སློབ་སྦྱོང་སླད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།

གསུང་བཤད་ཀྱི་ལས་རིམ་གྲུབ་རྗེས་དཔལ་ལྡན་སྲིད་སྐྱོང་མཆོག་ལ་ཆི་བྷ་འཕྲུལ་རིག་སློབ་གཉེར་བསྟི་གནས་ཁང་གི་འཕྲུལ་མི་བཟོ་ལས་སྡེ་ཚན་གྱིས་གསར་དུ་བཟོས་པའི་འཕྲུལ་མི་ཁག་གཅིག་གཟིགས་འབུལ་ཞུས་གནང་ཡོད་པ་བཅས།།