༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨིན་ཡུལ་གྱི་བདམས་ཐོན་སྲིད་བློན་ལྕམ་སྐུ་ལི་ཛི་ཊི་ར་སི་ (Liz Truss) མཆོག་ལ་དགའ་བསུའི་འཚམས་འདྲི་གནང་འདུག

དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། སྐུ་ཉིད་ཨིན་ཡུལ་གྱི་སྲིད་བློན་དུ་བདམས་ཐོན་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཕྱི་ལོ་ ༡༩༦༠ ལོའི་མགོ་སྟོད་ཙམ་ནས་བཟུང་ཨིན་ཡུལ་གཞུང་གིས་བོད་མི་རྣམས་ལ་གནས་ཚང་གཡར་གནང་བ་དང་། དེ་བཞིན་ཨིན་ཡུལ་གཞུང་དང་། གྲོས་ཚོགས། ཚོགས་པ་ཁག མི་སྒེར་སོགས་ནས་སྙིང་རྗེ་དང་གཏོང་ཕོད་ཆེན་པོའི་སྒོ་ནས་བོད་དོན་དང་བོད་མིའི་རང་དབང་འཐབ་རྩོད་ལ་མུ་མཐུད་རྒྱབ་སྐྱོར་གནང་དང་གནང་བཞིན་པར་ང་ཚོས་ཐུགས་རྗེ་ཆེ་ཞུ་རྒྱུ་ཡིན།

ཨིན་ཡུལ་གཞུང་ནས་ཕྱི་ལོ་ ༢༠༢༠ ལོར་འགྲོ་བ་མིའི་ཐོབ་ཐང་རྡོག་རོལ་བཏང་བར་དམ་བསྒྲགས་བཀའ་ཆད་ཀྱི་ཁྲིམས་འཆར་ (UK Global Human Right Sanctions Regime in 2020) ཞེས་པ་གཏན་འབེབས་གནང་རྒྱུ་མཚོན་གོ་ལ་སྤྱི་ཡོངས་སུ་འགྲོ་བ་མིའི་ཐོབ་ཐང་གོང་སྤེལ་གཏོང་བཞིན་པར་བསྔགས་བརྗོད་དང་སྦྲགས། སྐུ་ཉིད་ཀྱི་དབུ་ཁྲིད་འོག་ཨིན་ཡུལ་གཞུང་གིས་འགྲོ་བ་མིའི་ཐོབ་ཐང་གི་གནད་དོན་ཐད་མུ་མཐུད་གོང་འཕེལ་བཏང་སྟེ་དེ་ཉིད་ཨིན་ཡུལ་གཞུང་གི་སྲིད་བྱུས་དང་ཕྱི་འབྲེལ་ཐོག་མངོན་ཐུབ་པའི་རེ་བ་ཞུ་གི་ཡོད། ཅེས་དང་།

མཐར་དཔལ་ལྡན་སྲིད་སྐྱོང་མཆོག་གིས། སླར་ཡང་འཚམས་འདྲི་དང་སྦྲགས་སྲིད་བློན་མཆོག་གི་སླད་ཀྱི་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུས་འདུག་པ་བཅས།།