༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན།  ཐའེ་ཝན་གྱི་ཕྱི་སྲིད་ལས་ཁུངས་དང་མང་གཙོ་ཐེབས་རྩ། ཐའེ་ཝན་དུ་གནས་སྡོད་ཨ་རིའི་གཞུང་ཚབ་ཁང་ཐུན་མོང་ནས་གོ་སྒྲིག་གནང་བའི་རྒྱལ་སྤྱིའི་ཆོས་ལུགས་རང་དབང་གླེང་སྟེགས་སྐབས་གཉིས་པ་དེ་བཞིན་རྒྱལ་ས་ཐའེ་པེའི་མེ་ཧྥུ་གསོལ་མགྲོན་ཁང་དུ་བསྐོང་ཚོགས་གནང་ཡོད་ཅིང་། ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། ལྟ་གྲུབ་དགེ་རྒན་བསྟན་འཛིན་རྣམ་གྲོལ་རིན་པོ་ཆེ་རྣམ་གཉིས་ཚོགས་བཅར་ཞུས་ཏེ་རྒྱ་ནག་གཞུང་གིས་བོད་ཀྱི་ཆོས་ལུགས་རྩ་མེད་ཇི་ལྟར་བཏང་བའི་སྲིད་བྱུས་དང་ཛ་དྲག་གནས་སྟངས་ངོ་སྤྲོད་ཞུས་ཡོད་པ་རེད།དེ་ཡང་ཕྱི་ཚེས་ ༣༠ ཉིན་གྱི་སྔ་དྲོ་ཆུ་ཚོད་དགུ་པའི་ཐོག་ཚོགས་འདུ་དངོས་སུ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོར་སྐུ་མགྲོན་གཙོ་བོ་ཐའེ་ཝན་སྲིད་འཛིན་ལྕམ་ཚའེ་དབྱིང་ཝེན་མཆོག་དང་། གྲོས་ཚོགས་ཀྱི་ཚོགས་གཙོ་སྐུ་ཞབས་ཡུག་ཞི་ཁོན་མཆོག ཐའེ་ཝན་ཕྱི་སྲིད་བློན་ཆེན་སྐུ་ཞབས་ཝུ་ཀྲའོ་ཤེད་མཆོག ཐའེ་ཝན་མང་གཙོ་ཐེབས་རྩའི་ཚོགས་གཙོ་མཆོག ཨ་རིའི་རྒྱལ་སྤྱིའི་ཆོས་ལུགས་རང་དབང་ལྷན་ཚོགས་ཀྱི་ཚོགས་གཙོ་སྐུ་ཞབས་ནུ་རེ་ཊར་ཀེལ་ (Nury Turkel) མཆོག་བཅས་ནས་དབུ་འབྱེད་གསུང་བཤད་གནང་གྲུབ་རྗེས། སྐུ་མགྲོན་རྣམ་པ་དྲན་རྟེན་སྐུ་པར་མཉམ་སྒྲོན་གནང་སྟེ་ཕྱིར་ཐོན་ཡོད།གླེང་སྟེགས་དེའི་དམིགས་ཡུལ་གཙོ་བོ་ནི་ཞི་ཧིན་རྒྱ་མཚོའི་མངའ་ཁུལ་གྱི་རྒྱལ་ཁབ་དང་ལུང་པ་ཁག་ནང་དབང་ཆ་གཅིག་བསྡུས་རིང་ལུགས་ཀྱིས་ཆོས་ལུགས་ལ་དམ་དྲག་ཤུགས་ཆེ་རུ་འགྲོ་བའི་རྣམ་པ་ཞིག་ཐོན་བཞིན་པ་དང་། ས་ཁུལ་དེ་དག་ནང་ཆོས་ལུགས་རྡུང་རྡེག་འོག་བྲོས་བྱོལ་དུ་ཐར་བའི་གང་ཟག་དང་། ཆོས་ལུགས་རང་དབང་འཐབ་རྩོད་པ་རྣམས་ཕྱོགས་གཅིག་ཏུ་སྒྲིལ་ནས། དབང་ཆ་གཅིག་བསྡུས་བར་འཐབ་རྩོད་བྱ་ཕྱོགས་དང་། ཆོས་དད་རང་དབང་སྲུང་སྐྱོབ་བྱ་ཕྱོགས་ཐད་མཉམ་ལས་ཇི་ལྟར་བྱ་ཐབས་ཆེད་རེད་འདུགད་ཐེངས་ཀྱི་གླེང་སྟེགས་དེ་ནི་ཡོངས་གྲགས་མིན་པར་སྒོ་བརྒྱབ་ནང་མོལ་ཚོགས་འདུ་ཡིན་ཅིང་། རྒྱལ་ཁབ་འདྲ་མིན་ཁག་ནས་འབྲེལ་ཡོད་ཚོགས་མི་བརྒྱ་ལྷག་གདན་ཞུ་གནང་ཡོད་པའི་ཁོངས། ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། ལྟ་གྲུབ་དགེ་རྒན་བསྟན་འཛིན་རྣམ་གྲོལ་རིན་པོ་ཆེ་རྣམ་གཉིས་གདན་འདྲེན་ཞུས་ཏེ། ཉེ་ལམ་བོད་ནང་ཛ་དྲག་གནས་སྟངས་འབྱུང་བཞིན་པའི་དངོས་ཡོད་གནས་སྟངས་དཔེ་བརྗོད་དུ་བགྲངས་ནས། རྒྱ་ནག་གཞུང་གི་བོད་ནང་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས་དང་བཅས་པ་རྩ་མེད་བཏང་བའི་སྲིད་བྱུས་ལག་བསྟར་ཇི་ལྟར་བྱས་ལུགས་ཡིག་འབྲུ་དྲུག་སྟོང་ལྷག་གི་སྙན་ཐོ་རྒྱ་ཡིག་དང་ཨིན་ཡིག་སྐད་ཡིག་གཉིས་ཐོག་འབྲེལ་ཡོད་ཚོགས་བཅར་བ་ཚང་མར་འགྲེམ་སྤེལ་ཞུས་པ་མ་ཟད། རིན་པོ་ཆེ་མཆོག་ གིས་ཨིན་ཡིག་ཐོག་སྙན་ཐོ་སྒྲོགས་སྦྱང་དང་། དྲི་བ་དྲིས་ལན་སྐབས་སུ་སྐུ་ཚབ་དོན་གཅོད་ནས་བོད་པའི་འཐབ་རྩོད་གནང་སྟངས་དང་། བོད་ཀྱི་གནད་དོན་ཐག་གཅོད་གནང་ཕྱོགས་དབུ་མའི་ལམ་གྱི་སྲིད་བྱུས་བརྒྱུད་ནས་རྒྱ་ནག་དམར་པོའི་གཞུང་ལ་ཁ་གཏད་གནང་ཕྱོགས་སོགས་ཀྱི་སྐོར་འགྲེལ་བརྗོད་ཞུས་ཡོད།ད་ཐེངས་ཀྱི་ཚོགས་འདུར་ད་དུང་ཐའེ་བོད་འགྲོ་བ་མིའི་ཐོང་ཐང་ཚོགས་པའི་རྒྱུན་ལས་བཀྲ་ཤིས་ཚེ་རིང་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཐའེ་ཝན་འབྲེལ་མཐུད་པ་ལྕམ་ཀྲ་ཁྱུང་ཕང་བཅས་ཀྱང་གདན་ཞུ་གནང་ཡོད་པ་མ་ཟད། སྐུ་ཚབ་དོན་གཅོད་ཉིན་གཉིས་རིང་ཚོགས་འདུར་མཉམ་ཞུགས་གནང་སྟེ། ཚོགས་གསེང་དང་ཞལ་ལག་དུས་སྐབས་དང་སྟབས་བསྟུན་འབྲེལ་ཡོད་ཚོགས་བཅར་བ་ཚོ་དང་འབྲེལ་ལམ་དམ་ཟབ་བཙུགས་པ་དང་། དེ་སྔོན་ཐའེ་ཝན་སྲིད་འཛིན་ཁྲིན་ཁྲིན་ཧྲུན་མཆོག་གི་གསུང་བསྒྱུར་ལྕམ་ཀྲིན་ཁྲོན་དབྱེ་ལགས་དང་། ཐའེ་ཝན་དུ་རྒྱ་ཡིག་སློབ་སྦྱོང་བྱེད་བཞིན་པ་ཚེ་རིང་ཐར་ཕྱིན་ལགས་གཉིས་ནས་ཨིན་ཡིག་གསུང་བསྒྱུར་གྱི་ཕྱག་རོགས་གནང་ཡོད་པ་དང་བཅས། །