༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་ ༩ ཚེས་ ༢ ཉིན་ཐའེ་ཝན་སྐུ་ཚབ་དོན་གཅོད་ལས་ཁུངས་དང་། ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ། ཐའེ་སྡོད་བོད་རིགས་ཚོགས་པ་བཅས་མཉམ་རུབ་ཀྱི་གོ་སྒྲིག་འོག་ཐའེ་ཝན་གནས་སྡོད་བོད་བརྒྱུད་ནང་བསྟན་གྱི་དགེ་འདུན་པ་དང་། དེ་བཞིན་བོད་མི་དང་སྐུ་མགྲོན་བཅས་ཁྱོན་མི་གྲངས་བརྒྱ་ལྷག་ཐའེ་ཝན་གྲོས་ཚོགས་ཀྱི་ཚོགས་ཁང་ནང་ཆེད་འཛོམས་ཀྱིས་དུས་ཆེན་སྲུང་བརྩི་ཟབ་རྒྱས་ངང་ཞུས་ཡོད།མཛད་སྒོ་དེ་བཞིན་ཐའེ་ཝན་སྐུ་ཚབ་དོན་ཁང་གི་དྲུང་ཆེ་མི་འགྱུར་གཡུ་སྒྲོན་ལགས་དང་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཧུང་ཧྲིན་ཧང་ལགས་ཀྱི་ལས་རོགས་ (Ying Chun Liu) གཉིས་ནས་གཙོ་སྐྱོང་ཞུས་ཡོད། མཛད་སྒོའི་སྐུ་མགྲོན་དུ་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ (Freddy Lim) ལགས་ཀྱིས་གཙོས་ཐའེ་ཝན་གྲོས་ཚོགས་ཀྱི་ཚོགས་མི་ (Hung Sun-Han) ལགས་དང་ (Chiu Hsien, Lin Chiu-Yin) ལགས།  གཞན་ཡང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་དྲུང་ཆེ་སྐུ་ཞབས་ (Shih Yi Hsiang) ལགས་དང་ཐའེ་ཝན་གྲོས་ཚོགས་འགྲོ་བ་མིའི་ཐོབ་ཐང་གི་དྲུང་ཆེ་ (Wuer Kaixi) ལགས།  ཝན་ཤང་སློབ་ཆེན་གྱི་འཆར་འགོད་འགན་འཛིན་ (Lee Ming -Che) ལགས།  ཧོང་ཀོང་གཞོན་ནུའི་དྲུང་ཆེ་ (Sky Fung) ལགས་བཅས་གདན་ཞུ་ལྟར་ཆེད་ཕེབས་ཀྱིས་མང་གཙོ་དུས་ཆེན་དང་འབྲེལ་བའི་གསུང་བཤད་གནང་ཡོད།བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དྲ་རྒྱ་བརྒྱུད་མཛད་སྒོའི་སྐུ་མགྲོན་རྣམ་པར་དམིགས་བསལ་འཚམས་འདྲིའི་གསུང་བཤད་གནང་ཡོད། ཐའེ་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ཀྱིས་དུས་ཆེན་དང་འབྲེལ་བའི་གསུང་བཤད་གནང་རྗེས། ཐའེ་སྡོད་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་དང་ཐའེ་ཝན་ས་གནས་གཞོན་ནུ་ཚོགས་པའི་ཚོགས་གཙོ་དཀོན་མཆོག་ལྷག་པ་ལགས་ནས་ཀྱང་དུས་ཆེན་དང་འབྲེལ་བའི་གསུང་བཤད་གནང་ཡོད། དེ་རིང་གི་མཛད་སྒོ་དེ་བཞིན་ཐའེ་ཝན་གྲོས་ཚོགས་ཀྱི་ཚོགས་ཁང་ནང་འཚོོགས་ཡོད་པ་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ལམ་བརྒྱུད་ཐའེ་ཝན་གྱི་སྲིད་དོན་མི་སྣར་གསུང་བཤད་གནང་བ་ཐེངས་དང་པོ་ཆགས་ཀྱི་ཡོད་སྟབས། ཐའེ་ཝན་དང་རྒྱ་གར་སོགས་གསར་འགྱུར་བརྒྱུད་ལམ་མང་པོས་དོ་སྣང་ཆེན་པོ་གནང་སྟེ་བོད་དོན་ཁྱབ་སྤེལ་ཆེན་པོ་བྱུང་ཡོད་པ་དང་། སྐུ་མགྲོན་རྣམ་པར་བོད་ཇ་དང་ཁ་ཟས་བཅས་འདེགས་འབུལ་ཞུས་པའི་ཐོག་མང་གཙོའི་གསར་གཞས་གཙོས་པའི་སྲོལ་རྒྱུན་གྱི་གཞས་དང་ཞབས་བྲོ་འབུལ་ལམ་ཞུས་ཏེ་དགའ་དགའ་སྤྲོ་སྤྲོའི་ངང་མཛད་སྒོ་ལེགས་གྲུབ་བྱུང་ཡོད། །