༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༠༢ ཉིན་ཉི་ཧོང་དང་ལྷོ་ཀོ་རི་ཡར་བོད་ཀྱི་མང་གཙོའི་དུས་ཆེན་ཐེངས་ ༦༢ སྲུང་བརྩི་ཞུས་འདུག

དེ་ཡང་དུས་ཆེན་སྲུང་བརྩི་སྐབས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བཀའ་ཤག་གི་གསུང་འཕྲིན་སྒྲོགས་སྦྱང་གནང་བ་དང་སྦྲགས་མང་གཙོའི་གལ་གནད་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་འོག་བཙན་བྱོལ་ནང་དུ་མང་གཙོའི་ལམ་སྲོལ་དར་འཕེལ་སྐོར་ངོ་སྤྲོད་གནང་། དེ་རྗེས་ལྷོ་ཀོ་རི་ཡའི་ནང་ཡོད་པའི་དགེ་བཤེས་ནམ་མཁའ་ལགས་དང་ཉི་ཧོང་བོད་རིགས་ཚོགས་པའི་ཀརྨ་ལགས་གཉིས་ནས་ཚོགས་བཅར་བ་རྣམས་ལ་འཚམས་འདྲི་དང་འབྲེལ་བོད་མིའི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུ་དང་། བོད་མིའི་ཆིག་སྒྲིལ་གྱི་གལ་གནད། ལྷག་པར་དུས་ཆེན་ཁག་ལ་བོད་མི་རྣམས་མཉམ་འཛོམས་བྱ་རྒྱུ་གལ་ཆེན་པོ་ཡིན་སྐོར་གསུངས་འདུག དེ་བཞིན་ཉི་ཧོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་བོད་མིའི་སྒྲིག་འཛུགས་ཀྱི་ལམ་སྟོན་བཀོད་ཁྱབ་ཇི་ཡོད་ངོ་སྤྲོད་དང་། དང་བླངས་དཔྱ་དངུལ་བསྡུ་ཕྱོགས། བཙན་བྱོལ་བོད་མིའི་མི་འབོར་གྲངས་བཤེར་སྐོར་ངོ་སྤྲོད་གནང་འདུག

ཚོོགས་འདུའི་མཇུག་ཏུ་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བརྩམས་པའི་དཔེ་དེབ་འབྲུག་གི་དུག་རླངས་ལ་ཁ་གཏད་ཅེས་པ་དབུ་འབྱེད་དང་། རྩོམ་པ་པོས་དཔེ་དེབ་སྐོར་ངོ་སྤྲོད་མདོར་བསྡུས་གནང་རྗེས་ཚོགས་བཅར་བ་རྣམས་ལ་དཔེ་དེབ་འགྲེམས་སྤེལ་གནང་འདུག་པ་བཅས།།