༄༅། །ཕྱི་ལོ་ ༢༠༢༢ ཟླ་བ་ ༠༩ ཚེས་ ༢༠ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་རྡ་ས་ནོར་བུ་གླིང་ཁར་བོད་རིགས་སྒྱུ་རྩལ་བ་དང་ཉམས་ཞིབ་པའི་ཚོགས་འདུ་དབུ་འཛུགས་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཙམ་ལ་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང་། ཆོས་རིག་དྲུང་འཕར་བདུད་འདུལ་རྡོ་རྗེ་ལགས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བདེ་ཆེན་རྣམ་རྒྱལ་ལགས། དེ་བཞིན་ཉམས་ཞིབ་པ་དང་སྒྱུ་སྩལ་བ་སུམ་ཅུ་ལྷག་ཚང་འཛོམས་ཀྱིས་ཉིན་གསུམ་རིང་གི་བོད་རིགས་སྒྱུ་རྩལ་བ་དང་ཉམས་ཞིབ་པའི་ཚོགས་འདུའི་དབུ་འབྱེད་མཛད་སྒོ་ཚོགས་སོང་བ་དང་། སྐབས་དེར་ཐོག་མར་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་ཀྱིས་ཆོས་རིག་ལས་ཁུངས་ནས་སྤེལ་བཞིན་པའི་བོད་ཀྱི་རིག་གཞུང་དང་འབྲེལ་བའི་ལས་གཞི་ཁག་ངོ་སྤྲོད་དང་། བོད་ཀྱི་རིག་གཞུང་རྒྱུན་འཛིན་གྱི་ལས་འགན་སྒྲིག་འཛུགས་ཁོ་ན་མིན་པར་བོད་རིགས་སྤྱི་དང་། ལྷག་པར་གཞོན་སྐྱེས་རྣམས་ཀྱིས་དོ་ཁུར་ཆེ་བཞེས་གནང་དགོས་པ་སོགས་ཀྱི་སྐོར་གསུངས་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། དེ་རིང་འདིར་ཚོགས་བཅར་བ་སུམ་ཅུ་ཙམ་འཛོམས་ཡོད་ས་རེད། ངས་ནམ་རྒྱུན་ནས་ཞུ་གི་ཡོད། ང་ཚོ་བཙན་བྱོལ་ལ་འབྱོར་ནས་ལོ་ངོ་དྲུག་ཅུ་རེ་གསུམ་ཙམ་འགྲོ་གི་ཡོད་པ་རེད། ཐོག་མར་བྷག་ས་དང་མེ་སི་མེ་རིར་བཟས་བཅུད་དང་གནམ་གཤིས་སོགས་མ་འཕྲོད་པར་བརྟེན་བོད་མི་མང་པོ་ནད་མནར་བྱུང་བ་དང་སྲོག་ཤོར་བ་སོགས་དཀའ་ངལ་ཆེན་པོ་འཕྲད་ཡོད།
༸རྒྱལ་བ་རིན་པོ་ཆེའི་རྗེས་སུ་འབྲང་ནས་ཡོང་མཁན་བོད་མི་གྲངས་ཁྲི་བརྒྱད་ཙམ་ཡོད་པ་དེ་དག་འཚོ་ཐུབ་མིན་གྱི་དཀའ་ངལ་ཞིག་གི་འོག་གནས་སྟངས་ཁག་པོ་ཡོད་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེ་དུས་ནས་མང་གཙོ་ལམ་སྲོལ་གཏོད་རྒྱུ་དང་། བོད་ཀྱི་ཆོས་དང་རིག་གཞུང་སྲུང་སྐྱོབ་གནང་རྒྱུའི་ཐོག་དགོངས་པ་བཞེས་ཡོད་པ་དང་། མགོན་པོ་གང་ཉིད་མཆོག་གི་ཕུགས་རྒྱང་རིང་བའི་དགོངས་པའི་འབྲས་བུ་ད་ལྟ་སྨིན་ཡོད། དེ་ཉིད་ད་ལྟ་བར་དུ་འཁྱོལ་བ་རེད། འཁྱོལ་བ་དེ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ལྷག་པར་རྒན་རབས་ཚོས་དཀའ་ལས་བརྒྱབ་ནས་བྱུང་བ་གསལ་པོ་རེད། ད་ལྟ་ང་ཚོའི་མི་རབས་སྒང་ལ་འབབ་ཀྱི་ཡོད། ང་ལྟ་བུ་ཡིན་ན་ལོ་དྲུག་ཅུ་ཙམ་ཡིན་པ་དང་ངས་རྒྱུན་ལྡན་ནས་ང་ཚོའི་མི་རབས་འདི་མཚམས་སྦྱོར་གྱི་མི་རབས་ཤིག་རེད་ཅེས་ཞུ་གི་ཡོད།
ང་ཚོའི་ཕ་མ་བོད་ནས་ཕེབས་པ་ཡིན་པས་བོད་ནང་གི་གནས་སྟངས་མང་པོ་ཞིག་བཤད་དེ་ང་ཚོ་ཆུང་དུས་དེ་ལྟར་ཉན་ནས་འཚར་ལོངས་བྱུང་ཞིང་། སྐབས་དེར་སོ་སོ་བོད་པ་ཡིན་པའི་འདུ་ཤེས་དང་ལ་རྒྱ་ཡོད་པ་མ་ཟད། བོད་པ་ཡིན་པའི་ཆ་ནས་བོད་པའི་འཐབ་རྩོད་ལ་འཇོན་མིན་ལ་མ་ལྟོས་པར་ཞབས་ཞུ་སྒྲུབ་དགོས་བསམ་པའི་བསམ་བློ་ཡོད་པ་རེད། ང་ཚོའི་མི་རབས་འདིས་མི་རབས་རྗེས་མར་ལོ་རྒྱུས་དང་རིག་གཞུང་སྒྱུ་རྩལ་སོགས་གང་ཅིའི་ཐོག་ནས་རྩིས་སྤྲོད་ཡག་པོ་བྱེད་དགོས། ༸རྒྱལ་བ་རིན་པོ་ཆེས་ཕྱི་ལོ་ ༡༩༥༩ ལོར་ཐོག་མར་མ་སུ་རིར་སློབ་ཕྲུག་ལྔ་བཅུའི་སློབ་གྲྭ་དང་པོ་བཙུགས་པའི་སྐབས་སུ་མ་འོངས་པའི་ང་ཚོའི་མི་རབས་དེ་གནའ་དེང་གི་ཤེས་ཡོན་ལྡན་པ་དགོས་ཞེས་བཀའ་སྩལ་ཡོད། དེ་རིང་ང་ཚོ་འདིར་འཛོམས་རྒྱུ་འདི་གཙོ་བོ་གནའ་རབས་ཀྱི་རིག་གཞུང་ལ་གཞི་བཅོལ་ཡོད་པ་དང་། དེ་ལ་གཞི་བཅོལ་བའི་སྒྱུ་རྩལ་དང་ལག་རྩལ་སྣ་ཚོགས་ཡོད་པ་འདི་དག་འཛམ་གླིང་ནས་མ་ཡལ་བར་མུ་མཐུད་གནས་དགོས་པ་གལ་ཆེན་པོ་ཆགས་ཀྱི་ཡོད་པ་རེད། ཅེས་སོགས་དང་།
དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་གནང་བ་ལྟར་བོད་ཀྱི་ཆོས་དང་རིག་གཞུང་རྒྱུན་འཛིན་བྱས་པ་དེས་བོད་ཀྱི་ཆབ་སྲིད་ཀྱི་འཐབ་རྩོད་ལ་ཕན་གྱི་ཡོད་སྐོར་དང་། བོད་ས་ཤོར་རྗེས་༸གོང་ས་མཆོག་དང་བསྟན་བདག་བླ་ཆེན་རྣམ་པ། མི་རབས་རྒན་པ་རྣམས་ཀྱི་བཀའ་དྲིན་ལ་བརྟེན་ནས་བཙན་བྱོལ་ནང་བོད་ཀྱི་ཆོས་རིག་གི་བསྟི་གནས་ཁག་སླར་གསོ་ཚགས་ཚུད་གནང་ཐུབ་པའི་སྐོར། མི་རབས་དང་སྤྱི་ཚོགས་བརྗེ་འགྱུར་འགྲོ་བཞིན་པའི་སྐབས་གྲ་སྒྲིག་གང་ལེགས་དགོས་སྐོར། ༸གོང་ས་མཆོག་གི་དགོངས་པ་གཞིར་བཟུང་སྤྱི་ཚོགས་ཧྲ་ཏག་ཏག་གནས་ཐབས་སུ་འབད་རྩོལ་གནང་གལ་ཆེ་བ། དེ་བཞིན་བོད་རིགས་ན་གཞོན་རྣམས་ལ་ཆུང་དུས་ནས་རིག་གཞུང་དང་སྒྱུ་རྩལ་གྱི་གཞི་ཚ་གཏིང་གལ་ཆེ་བ་སོགས་ཀྱི་སྐོར་གསུང་བཤད་གནང་ཡོད།
ཐེངས་འདིའི་ཉམས་ཞིབ་པ་དང་སྒྱུ་རྩལ་བའི་ཚོགས་འདུའི་དགོས་དམིགས་གཙོ་བོ་ནི། བོད་ཀྱི་རིག་གཞུང་ཐོག་ཕྱག་ལས་གནང་བཞིན་པའི་བོད་རིགས་གཞོན་སྐྱེས་རྣམས་མི་རབས་གོང་མ་རྣམས་ཀྱི་ཤུལ་འཛིན་དང་མི་རབས་རྗེས་མ་རྣམས་ཀྱི་མིག་དཔེ་ལྟ་ས་ཞིག་ཡིན་སྟབས། བོད་ཀྱི་རྩ་ཆེའི་རིག་གཞུང་སྲུང་སྐྱོབ་ཆེད་གཞོན་སྐྱེས་ཚོས་བོད་ཀྱི་རིག་གཞུང་ལ་ལྟ་སྟངས་དང་བསམ་ཚུལ་ཇི་ཡོད་ཤེས་རྟོགས། དེ་བཞིན་གཞོན་སྐྱེས་ཚོའི་ཁྲོད་བོད་ཀྱི་རིག་གཞུང་ལ་དོ་ཁུར་དང་སྤྲོ་སྣང་གསར་པ་སྐྱེ་ཐབས་ཆེད་ཡིན། གཞོན་སྐྱེས་ཚོགས་འདུ་འདིའི་ནང་ས་གནས་ཁག་བརྒྱད་ཙམ་ནས་ཚོགས་བཅར་བ་གྲངས་ ༣༥ མཉམ་ཞུགས་ཀྱིས་ཉིན་གྲངས་གསུམ་རིང་བོད་ཀྱི་རིག་གཞུང་རྒྱུན་གནས་ཐུབ་ཐབས་སུ་བོད་རིགས་གཞོན་སྐྱེས་ཚོའི་འོས་འགན་ཞེས་པའི་བརྗོད་གཞིའི་ཐོག་བགྲོ་གླེང་གནང་རྒྱུ་ཡིན་འདུག་པ་བཅས།།
