༄༅། །ཕྱི་ལོ་ ༢༠༢༢ ཟླ་བ་ ༠༨ ཚེས་ ༣༠ ཉིན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུའི་མཛད་སྒོ་ཞིག་གོ་སྒྲིག་ཞུས་ཡོད།

དེ་ཡང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མས་བོད་དང་བོད་མིར་རྒྱབ་སྐྱོར་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་གུས་བརྩི་ཞུ་སླད་གཞུང་འབྲེལ་གྱི་ཕེབས་བསུའི་མཛད་སྒོ་ཞིག་དང་། དེ་རྗེས་གྲོས་ཚོགས་གོང་མའི་ཚོགས་ཁང་ལྗང་ཁུའི་ནང་དུ་ཚོགས་འདུ་ཚོགས་གནང་ཡོད། སྐབས་དེར་གྲོས་ཚོགས་གོང་མའི་ཚོགས་གཙོ་མི་ལོས་ཝིས་ཀྲི་སིལ་ (Milos Vystrcil) མཆོག་དང་། གྲོས་ཚོགས་ཀྱི་ཚོགས་གཞོན་ཐོག་མ་ཇི་རི་རི་ཛི་ཀ་ (Jiri Ruzicka) མཆོག ཚོགས་གཞོན་ཇི་རི་ཨོ་བར་བལ་ཛར་ (Jiri Oberfalzer) མཆོག ཚོགས་གཞོན་ཇིཀ་ཀ་སིཊ་ཝོ་ལ་ (Jitka Seitlova) མཆོག གྲོས་ཚོགས་ཀྱི་ཡུ་རོབ་མཐུན་ཚོགས་ལས་དོན་ཚོགས་ཆུང་གི་ཚོགས་གཙོ་ཊེ་ཝིཊ་སི་མོ་ལི་ཇག་ (David Smoljak) མཆོག གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་པ་ཝེལ་ཕི་ཤར་ (Pavel Fischer) མཆོག གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་པི་རིམ་སལ་ར་བ་སི་(Premysl Rabas) མཆོག གྲོས་ཚོགས་གོང་མའི་ཚོགས་དྲུང་ལྕམ་ཇ་ན་ཝོ་ར་ལི་ལོ་ཝ་ (Jana Vohralilova) མཆོག་བཅས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུ་གཟབ་རྒྱས་ཞུས་ཡོད།བོད་མིའི་སྐུ་ཚབ་ཁོངས་སུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་གཏན་འཇགས་ཐབས་བྱུས་ཚོགས་ཆུང་གི་སློབ་སྟོན་པ་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་སྐལ་ལྡན་མཚོ་མོ་ལགས་བཅས་ཕེབས་ཡོད། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཅེཀ་གྲོས་ཚོགས་གོང་མའི་ངོས་ནས་ཕེབས་བསུ་གནང་བར་ཐུགས་རྗེ་ལེགས་འབུལ་ཞུས་གནང་པ་དང་སྦྲགས། བོད་ནང་རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་ལག་བསྟར་བྱས་ཏེ་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པའི་སྐོར་དང་། རྒྱལ་སྤྱིའི་མི་མང་ནས་བོད་མིའི་དཀའ་ངལ་ལ་ཉན་འཇོག་མ་བྱས་པའི་རྐྱེན་གྱིས་ད་ལྟའི་ཆར་རྒྱ་ནག་གཞུང་གིས་རྒྱལ་ཁབ་གཞན་ལ་བཙན་འཛུལ་དང་། འཛམ་བུ་གླིང་སྤྱིའི་ཞི་བདེ་དང་བདེ་འཇགས་ལ་དོ་ཕོག་ཆེན་པོ་གཏོང་གི་ཡོད་པ་འགྲེལ་བརྗོད་གནང་ཡོད།དེ་བཞིན་དཔལ་ལྡན་སྲིད་སྐྱོང་མཆོག་གིས་རྒྱ་ནག་དང་དེའི་དབང་བསྒྱུར་འོག་ཡོད་པའི་ས་གནས་ཁག་ཏུ་འགྱུར་བ་ཡོང་སླད་གྲོས་ཚོགས་གོང་མའི་ངོས་ནས་དགོས་ངེས་ལས་དོན་རྩོམ་གནང་ཡོང་བ་དང་། ད་ལྟའི་ཆར་ཡུ་རོབ་མཐུན་ཚོགས་ཀྱི་ཚོགས་གཙོ་ཅེཀ་སྤྱི་མཐུན་རྒྱལ་ཁབ་ཀྱིས་གནང་གི་ཡོད་སྟབས། གྲོས་ཚོགས་གོང་མའི་འཐུས་མི་རྣམས་ཀྱིས་ཡུ་རོབ་མཐུན་ཚོགས་ཀྱི་དམིགས་བསལ་རྒྱ་ནག་ལས་དོན་ཚོགས་མི་རྣམས་ལ་བོད་དོན་ཐོག་ཞུ་སྐུལ་གནང་སྐྱོང་ཡོང་བའི་འབོད་སྐུལ་ཞུས་གནང་ཡོད།

གྲོས་ཚོགས་འཐུས་མི་རྣམས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཞུ་སྐུལ་གནད་དོན་ཁག་གསན་བཞེས་གནང་རྗེས་རྒྱ་ནག་གཞུང་གིས་གོ་ལའི་ཞི་བདེ་དང་བདེ་འཇགས་ལ་གནོད་སྐྱོན་གཏོང་གི་ཡོད་པར་གདོང་ལེན་བྱེད་ཕྱོགས་ཐད་ཆུ་ཚོད་གཅིག་ལྷག་གྲོས་བསྡུར་ལྷུག་པོ་གནང་ཡོད་པ་དང་། དེ་རྗེས་གྲོས་ཚོགས་འཐུས་མི་རྣམ་པས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དབུས་པའི་བོད་མིའི་སྐུ་ཚབ་རྣམས་ལ་ཉིན་གུང་གསོལ་ཚིགས་འདེགས་འབུལ་ཞུས་ཡོད།

ཐེངས་འདིའི་ཚོགས་འདུ་འདི་བརྒྱུད་སྲིད་འཛིན་ཟུར་པ་ཝེ་ཀ་ལབ་ཧ་ཝེལ་ (Vaclav Have) མཆོག་གིས་གནང་བ་སླར་ཡང་ཅེཀ་སྤྱི་མཐུན་རྒྱལ་ཁབ་ཀྱིས་བོད་མིའི་འཚེ་བ་མེད་པའི་རང་དབང་འཐབ་རྩོད་ལ་རྒྱབ་སྐྱོར་བསྐྱར་གནོན་གནང་བ་ཆགས་ཡོད་པ་བཅས། །