༄༅། །ཉེ་ཆར་བོད་ནང་ནད་ཡམས་ཁྱབ་གདལ་ཇེ་ཆེར་འགྲོ་བཞིན་པའི་ཁར། ཆུ་ལོག་དང་ས་ཡོམ་བཅས་རང་བྱུང་གི་གནོད་པ་གཅིག་རྗེས་གཉིས་མཐུད་བྱུང་ཁོངས་ཆུ་ལོག་རྐྱེན་གྱིས་མི་ལྔ་རྐྱེན་ལམ་དུ་ཕྱིན་པའི་ཡིད་སྐྱོའི་གནས་ཚུལ་བྱུང་པར་བོད་མིའི་སྒྲིག་འཛུགས་བཀའ་ཤག་ནས་ཆེས་བློ་ཕམ་དང་སྦྲགས་ཕྱི་ལོ་ ༢༠༢༢ ཟླ་ ༩ ཚེས་ ༠༦ རེས་གཟའ་མིག་དམར་ཉིན་གྱི་ཕྱེད་ཡོལ་ཆུ་ཚོད་ ༣  ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ་དང་། དེ་བཞིན་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་གི་ལས་བྱེད་ཡོངས་ཚང་འཛོམས་ཐོག་གཞུང་འབྲེལ་མཆོད་འབུལ་སྨོན་ལམ་ཚོགས་ཡོད།དེ་ཡང་གཞུང་འབྲེལ་མཆོད་འབུལ་སྨོན་ལམ་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་དོན། ཕྱི་ལོ་ ༢༠༢༢ ཟླ་ ༨ ཚེས་ ༢༡ ཉིན་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་མང་རྫོང་གི་སྟོད་ཕྱོགས་ཀྱི་འབྲོག་ཁུལ་གོང་བ་སྡེ་བ་དང་རུ་མང་སྡེ་བ་གཉིས་ཀྱི་དབྱར་སའི་སྤེན་ཆེན་དང་སྤེན་ཆུང་ཞེས་པའི་ས་གནས་སུ་ཆར་ཞོད་ཆེན་པོ་བབས་ཏེ་ཆུ་ལོག་གི་རྐྱེན་གྱིས་མང་རྫོང་གོང་བ་སྡེ་པའི་མི་ལྔ་རྐྱེན་ལམ་དུ་ཕྱིན་པ་ཀུན་དགའ་རྒྱལ་རང་ལོ་ ༤༣ དང་། གསལ་སྒྲོན་སྐྱིད་རང་ལོ་ ༤༠།  ཚེ་རིང་ལྷ་མོ་ལོ་ ༩།  ཀུན་བཟང་ཡག་རང་ལོ་ ༤༩།  ལྷ་མོ་ཚེ་རིང་ལོ་ ༡༨ བཅས་ཡིན།

གཞན་ཡང་བོད་རིགས་གྲོང་སྡེ་ས་ཁུལ་ནས་ཕྱུགས་ཟོག་ལ་གྱོང་གུད་ཆེན་པོ་ཐེབས་ཡོད་པའི་གནས་ཚུལ་བྱུང་འདུག་ཀྱང་རྒྱ་ནག་གཞུང་གིས་མྱུར་སྐྱོབ་ལེགས་གྲུབ་བྱུང་སྐོར་བཤད་པ་ཙམ་མ་གཏོགས་བོད་མི་ག་ཚོད་འདས་གྲོངས་སུ་ཕྱིན་པ་དང་། འབྲོག་སྡེ་མི་མང་གི་ཕྱུགས་ཟོག་སེམས་ཅན་ལ་གྱོང་གུད་ཇི་ཙམ་ཕྱིན་ཡོད་པ་སོགས་ཀྱི་ཛ་དྲག་གནས་སྟངས་གང་ཡང་དྲིལ་བསྒྲགས་བྱེད་མི་འདུག  ལྷག་པར་རྒྱ་ནག་གཞུང་གི་ས་གནས་སྲིད་གཞུང་གིས་གནམ་གཤིས་སྔོན་བརྡའི་གསལ་བསྒྲགས་སྤེལ་མེད་སྟབས་དེ་འདྲའི་གནས་ཚུལ་ཞིག་བྱུང་བ་རེད། ཉེ་ལམ་ས་ཡོམ་གྱི་ཚད་རིམ་ ༦.༨ རྐྱེན་པས་མི་གང་ཙམ་འདས་གྲོངས་སུ་གྱུར་པའི་ཁོངས་བོད་མི་དང་རྒྱ་མི་ག་ཚོད་འདས་གྲོངས་སུ་གྱུར་ཡོད་མེད་ཀྱི་གནས་སྟངས་ད་ཆ་ཁ་གསལ་པོ་མ་བྱུང་། འོན་ཀྱང་བོད་མི་དང་རྒྱ་རིགས་སུ་ཡིན་ནའང་འདས་གྲོངས་སུ་གྱུར་པ་ཡོངས་ལ་བསྔོ་བ་སྨོན་ལམ་འདེབས་རྒྱུ་དང་། ཏོག་དབྱིབས་གཉན་རིམས་ཀྱི་རྐྱེན་པས་བོད་ནང་གི་ས་ཁུལ་མང་དག་ཅིག་ལ་དམ་བསྒྲགས་ཤུགས་ཆེ་རུ་བཏང་བའི་དབང་གིས་མི་མང་ལ་དཀའ་ངལ་མང་པོ་འཕྲད་བཞིན་ཡོད། ད་བར་ཏོག་དབྱིབས་གཉན་རིམས་ཀྱི་རྐྱེན་པས་མི་མང་འདས་གྲོངས་སུ་ཕྱིན་པའི་གནས་ཚུལ་གསལ་པོ་གང་ཡང་ཧ་གོ་མ་སོང་སྟེ། བོད་ནང་གི་བོད་མི་མང་པོ་ཞིག་ནད་ཀྱིས་མནར་བཞིན་པ་དེ་དག་གང་མགྱོགས་ནད་ལས་གྲོལ་བའི་སྨོན་འདུན་ཞུ་དགོས་པ་དང་། དེ་སྔ་གཞུང་འབྲེལ་ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་བརྒྱུད་ལུང་རྟགས་ཞུས་པ་བརྒྱུད་སྒྲོལ་མའི་གཟུངས་སྔགས་གང་མང་གསོག་དགོས་པ་བཙན་བྱོལ་བོད་མིའི་གཞིས་ཆགས་ཁག་ལ་གསལ་བསྒྲགས་བཏང་ཡོད།

དེ་རིང་དོན་ཚན་གསུམ་འདི་དང་འགྲེལ་ནས་འཛམ་གླིང་སྤྱིའི་ནང་དཀའ་ངལ་འཕྲད་བཞིན་པ་ཚང་མ་དམིགས་འོག་ཏུ་བཅུག་ནས་བསྔོ་བ་སྨོན་ལམ་གནང་རོགས། ཞེས་གསུང་བཤད་གནང་རྗེས་ཕྱི་དྲོ་ཆུ་ཚོད་ ༤ བར་སྨོན་ལམ་གསུང་འདོན་གནང་ཡོད་པ་དང་ཉིན་རྒྱབ་ཆུ་ཚོད་ ༤ ནས་དབུས་ཀྱི་ལས་ཁུངས་ཁག་ལས་སེང་བཞག་ཡོད་པ་བཅས།།