༄༅། །འདི་གར་ཀ་སྦུག་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༩ ཚེས་ ༢༦ རེས་གཟའ་ཟླ་བ་ཉིན་ཀ་སྦུག་ས་གནས་ས་སྐྱའི་ཆོས་གྲྭ་བརྩེ་ཆེན་འཕྲིན་ལས་དར་རྒྱས་གླིང་དགོན་དུ་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དགུང་གྲངས་ ༧༨ ཕེབས་པའི་འཁྲུངས་སྐར་དུས་ཆེན་སྲུང་བརྩི་ཉིན་མོར་སྔ་དྲོའི་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་ས་གནས་འགོ་འཛིན་དང་དགོན་པའི་དབུ་འཛིན་རྒན་པ་མཁན་སྤྲུལ་རིན་པོ་ཆེ་མཆོག་གིས་དབུས་དགེ་འདུན་རྣམ་པ་དང་། ས་གནས་འཐུས་ཚོགས། ས་གནས་རང་བདེན་ཚོགས་གཙོ། ཡན་ལག་སྨན་རྩིས་ཁང་གི་འགན་འཛིན། སློབ་གྲྭའི་སློབ་སྤྱི། ཆོལ་གསུམ་ཚོགས་གཙོ། བུད་མེད་དང་གཞོན་ནུའི་ཚོགས་གཙོ། གངས་ལྗོངས་ཟློས་སྒར་དང་ལྷ་མོ་ཚོགས་པ། དེ་བཞིན་ཕྱི་ནང་སྐུ་མགྲོན་རྣམ་པ་དང་སེར་སྐྱ་མང་ཚོགས་བཞུགས་གྲལ་དུ་འཁོད་མཚམས། ས་གནས་འགོ་འཛིན་དང་དགོན་པའི་དབུ་འཛིན་མཁན་སྤྲུལ་རིན་པོ་ཆེ་མཆོག ས་འཐུས་ཚོགས་གཙོ་དང་དགེ་འདུན་པ་བཅས་ནས་སྤོས་སྣེས་སྔོན་བསུ་དང་འབྲེལ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་ཞུས་གནང་། དགོན་པའི་དབུ་འཛིན་མཁན་སྤྲུལ་རིན་པོ་ཆེ་མཆོག་དང་ས་གནས་འགོ་འཛིན་གཉིས་ནས་མནྜལ་རྟེན་གསུམ་འདེགས་འབུལ་དང་འབྲེལ་སེར་སྐྱ་མང་ཚོགས་ནས་སྐུ་པར་མཐོང་གྲོལ་རིན་པོ་ཆེར་མཇལ་ཁ་དང་མཇལ་དར་བསྒྲོན་རྗེས་ཚང་མས་སྐུ་བཞེངས་ཐོག་སཾ་བྷོ་ཊ་གཏན་ཉིན་སློབ་གྲྭའི་སློབ་ཕྲུག་རྣམས་ནས་འཕགས་བོད་གཉིས་ཀྱི་རྒྱལ་གླུ་བཏང་། དེ་རྗེས་དགོན་པའི་དབུ་འཛིན་མཁན་སྤྲུལ་རིན་པོ་མཆོག་ནས་བྱོན་པ་ལེགས་སོའི་གསུང་བཤད་གནང་། བཤད་གྲྭའི་སློབ་མ་སོ་སོ་ནས་ཨིན་བོད་དང་བལ་སྐད་ཐོག་མཛད་རྣམ་སྙན་སྒྲོན་ཞུས།
ས་གནས་འགོ་འཛིན་ནས་གོང་མ་རིན་པོ་མཆོག་ནི་དཔལ་ལྡན་ས་སྐྱའི་པའི་བསྟན་བདག་བླ་ཆེན་ཡིན་པ་ཙམ་མ་ཟད། བོད་བརྒྱུད་ནང་བསྟན་སྤྱི་ཡོངས་ཀྱི་བསྟན་བདག་བླ་ཆེན་ཡིན་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་བརྩེ་བ་ཧ་ཅང་ཆེན་པོ་གནང་ཡུལ་དང་། བོད་མིའི་སྒྲིག་འཛུགས་ཀྱི་ལས་དོན་མཐའ་དག་ལ་རྒྱབ་སྐྱོར་དང་བོད་བསྟན་སྲིད་མི་རིགས་ལ་བཀའ་དྲིན་ཆེན་པོ་ཡིན་སྐོར་སྙིང་བསྡུས་ཞུས། ཕྱི་ནང་གི་སྐུ་མགྲོན་དང་མང་ཚོགས་ཡོངས་ལ་ཉིན་གུང་གི་གསོལ་ཚིགས་འདེགས་འབུལ་ཞུས། དེ་ནས་ཀ་སྦུག་ལྷ་མོ་ཚོགས་པ། གངས་ལྗོངས་ཟློས་སྒར་དང་སཾ་བྷོ་ཊའི་སློབ་ཕྲུག ས་གནས་ཡུལ་མི་ཤར་པ་དང་ལེབ་ཆ་བཅས་ནས་རིམ་བཞིན་ཁྲབ་སྟོན་གཟིགས་འབུལ་ཞུས་ཡོད་པ་དང་བཅས།།
