འཛམ་གླིང་མི་ཚང་མ་ཆོས་པ་བྱེད་དགོས་པ་རེད་ཅེས་ནམ་ཡང་བརྗོད་ཐུབ་ཀྱི་མ་རེད། ཆོས་ཁས་ལེན་མིན་དང་ཁས་བླངས་ཚེ་གང་ལེན་མིན་ནི་སོ་སོ་སྒེར་གྱི་རང་དབང་རེད། ང་ཚོའི་འཛམ་གླིང་འདིར་ཁོར་ཡུག་བཟང་པོ་ཡོང་ཐུབ་པ་ཞིག་དང་། འཛམ་གླིང་འདིར་མིས་བཟོས་པའི་དམག་འཁྲུག་མེད་པར་ཞི་བདེའི་བསྟི་གནས་ཤིག་ཡོང་ཐུབ་མིན་ང་ཚོའི་ལག་པར་ཡོད། ང་ཚོའི་དུས་རབས་འདིའི་མགོ་སྟོད་ནས་དམག་འཁྲུག་ཧ་ཅང་མང་པོ་བརྒྱབ་པ་རེད། འཛམ་གླིང་འདིར་དམག་འཁྲུག་མང་པོ་བརྒྱབ་པ་དེར་མི་ཚང་མ་ཡིད་ཐང་ཆད་ཡོད། ངོས་ཀྱི་མི་ཚེ་འདིར་དམག་ཆེན་དང་པོ་དང་གཉིས་པ་ནི་ཡིད་ཐང་ཆད་རྒྱུ་རང་ཆགས་ཡོད། འབྱུང་འགྱུར་ནི་དངོས་གནས་དམག་འཁྲུག་མེད་པར་ཞི་བདེའི་འཛམ་གླིང་ཞིག་ཡོང་ཐུབ་རྒྱུ་ནི་ང་ཚོའི་ལས་འགན་རེད།

མི་སྐྱེས་པའི་ཉིན་མོ་ནས་བཟུང་བྱམས་བརྩེས་འཚོ་བཞིན་པ་ཞིག་རེད།  དུད་འགྲོ་ལ་མཚོན་ནའང་མངལ་སྐྱེས་དང་སྒོང་སྐྱེས་ནི་བརྩེ་བ་ལ་བརྟེན་ནས་འཚོ་བ་ཞིག་རེད། དེར་བརྟེན་མིའི་ལྷན་སྐྱེས་ནི་གཅིག་གིས་གཅིག་ལ་བརྩེ་བ་དང་། མས་བུ་ལ་བརྩེ་བ་ནི་རང་བཞིན་ལྷན་སྐྱེས་ཀྱིས་ཡོད་པ་ཞིག་རེད། ང་ཚོ་ལ་གང་གལ་ཆེན་པོ་རེད་ཅེ་ན། རང་བཞིན་ལྷན་སྐྱེས་ཀྱི་བརྩེ་བ་ཞིག་ཡོད་ཀྱང་དེང་དུས་ཀྱི་ཤེས་ཡོན་སློབ་སྦྱོང་སྤྲོད་པའི་སྐབས་སུ་བརྩེ་བའི་སྐོར་གང་ཡང་བཤད་ཀྱི་མེད། གང་ལྟར་ང་ཚོའི་སློབ་སྦྱོང་གི་འགྲོ་སྟངས་དེ་འཛིན་གྲྭ་བཞི་པ་ལྔ་པ་ཡར་སླེབས་ཡོང་དུས་རྒྱལ་ཁབ་ཕན་ཚུན་དང་ཆོས་ལུགས་ཕན་ཚུན། མི་རིགས་ཕན་ཚུན་སེམས་ལ་ཤུགས་ཆེན་པོ་སླེབས། དེ་ནས་ང་དང་ཁྱོད་ཅེས་པ་ཤུགས་ཆེ་རུ་ཕྱིན་ནས་ང་ཚོ་ཚང་མ་མི་གཅིག་གྱུར་ཡིན་པའི་འདུ་ཤེས་ཤུགས་ཆུང་དུ་འགྲོ་བཞིན་པ་ཞིག་འདུག དངོས་གནས་བསམ་བློ་བཏང་ན་གྲི་དང་མེ་མདའ་འཁྱེར་ནས་གསོད་རེས་བྱེད་པ་ཟེར་བ་ནི་བློ་ཡུལ་དུ་མ་ཤོངས་པ་ཞིག་རེད། ང་ཚོ་སྐྱེས་པའི་སྐབས་སུ་ཨ་མས་གསོ་སྐྱོང་གནང་བ་ཚང་མ་གཅིག་མཚུངས་རེད། འདོད་ན་མ་འདོད་ན་འཛམ་གླིང་འདིར་ང་ཚོ་ཚང་མ་མཉམ་དུ་སྡོད་དགོས་པ་རེད། འཛམ་གླིང་འདིར་ཆོས་ལུགས་མི་འདྲ་བ་དང་མི་རིགས་མི་འདྲ་བ་རྒྱུ་མཚན་དུ་བྱས་ནས་གསོད་རེས་བྱས་ན་དེ་ག་འདྲ་ཞིག་རེད། བསམ་བློ་ཧ་ཅང་མིག་རྒྱང་ཐུང་ཐུང་རེད། བསམ་བློ་གུ་དོག་པོ་རེད། མགོ་ཁྲིད་མཁན་ཚོས་ཀྱང་བློ་ཆུང་གིས་བསམ་བློ་བཏང་ནས་ང་ཚོ་དང་ཁྱོད་ཚོ་ཞེས་མང་པོ་བརྗོད་པའི་དུས་ཚོད་ད་ལྟ་ཡོལ་བ་རེད།

འཛམ་གླིང་འདིའི་སྟེང་གི་མི་ཚང་མ་གཅིག་མཚུངས་རེད། ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་རེད། ང་ཚོ་ཚང་མས་འཛམ་གླིང་འདིར་ཞི་བདེ་མཉམ་གནས་ཡོང་ཐུབ་པ་ཞིག་རེད། དེང་སང་འཛམ་གླིང་འདིར་ཞི་བདེ་དོན་གཉེར་བྱེད་མཁན་ཧ་ཅང་མང་དུ་འགྲོ་བཞིན་འདུག དམག་འཁྲུག་ལ་ངོ་རྒོལ་བྱེད་མཁན་ཤུགས་ཆེ་རུ་འགྲོ་བཞིན་འདུག  ཁྱོད་ཚོ་གཞོན་སྐྱེས་མི་རབས་རྗེས་མ་ཆགས་ཡོད། ཁྱོད་ཚོས་སེམས་ལ་དམ་བཅའ་གཙོ་བོ་ནི་མི་ཚེ་འདིར་ཞི་བདེའི་རང་བཞིན་ཞིག་དང་། ཆོས་ལུགས་དབྱེ་བ་མེད་པར་ཆོས་ལུགས་སྒེར་གྱི་དོན་དག་དང་། མི་ཡིན་པའི་ཆ་ནས་ང་ཚོ་མཉམ་དུ་སྡོད་དགོས་ཀྱི་ཡོད། དེར་བརྟེན་ང་ཚོ་ཚང་མ་འཆམ་མཐུན་ཡ་རབས་ཀྱི་ཐོག་ནས་ལུང་པ་འདི་ཡར་རྒྱས་ཡག་པོ་ཞིག་གཏོང་བ་དང་། དངོས་པོ་ཡར་རྒྱས་ཡོང་བ་དེ་འཁྲུག་པ་ཡོང་བའི་རྒྱུ་རྐྱེན་དུ་མི་འགྲོ་བར་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་རྒྱུ་ལས་འགན་རེད། ལྷག་པར་གཞོན་སྐྱེས་སློབ་ཕྲུག་ཕོ་མོ་ཚོ་ཧ་ཅང་གལ་ཆེན་པོ་རེད།

ཆོས་ནི་སྒེར་གྱི་གནས་ཚུལ་དང་སྤྱི་ཚོགས་བཟང་པོ་ཞིག་དང་འཁྲུག་པ་མེད་པ་ཞིག་ལ་བསམ་བློ་གཏོང་དགོས། ཞེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་གཅིག་ལ་བཀའ་ལན་སྩལ་ཏེ་ཟངས་དཀར་ཁུལ་གྱི་སློབ་ཕྲུག་ལ་བཀའ་སློབ་ཀྱི་མཛད་རིམ་ལེགས་པར་གྲུབ་རྗེས་དད་ལྡན་སེར་སྐྱ་མི་མང་ཡོངས་ཀྱི་ཆེད་དུ་བཅོམ་ལྡན་འདས་ཀྱི་མཚན་སྔགས་དང་འཇམ་པའི་དབྱངས་ཀྱི་མཚན་སྔགས། མི་བརྗེད་པའི་གཟུངས། སྒྲོལ་མའི་གཟུངས་སྔགས། རྣམ་འཛོམས་མའི་གཟུངས་སྔགས་བཅས་ཀྱི་བཟླས་ལུང་སྩལ། །