༄༅། །ཕྱི་ལོ་ ༢༠༢༢ ཟླ་ ༨ ཚེས་ ༡༥ ཉིན་ཨོསྟྲེ་ལི་ཡཱར་ཡོད་པའི་རྒྱ་གར་གྱི་གཞུང་ཚབ་ཁང་དང་། ཨོསྟྲེ་ལི་ཡཱའི་ཕྱི་སྲིད་དང་ཚོང་དོན་ལྷན་ཁང་གི་གོ་སྒྲིག་འོག་ཨོསྟྲེ་ལི་ཡཱའི་རྒྱལ་ཡོངས་འགྲེམས་སྟོན་ཁང་དུ་རྒྱ་གར་ལ་རང་བཙན་ཐོབ་ནས་མི་ལོ་ ༧༥ ཧྲིལ་པོ་འཁོར་བའི་དུས་ཆེན་སྲུང་བརྩི་གཟབ་རྒྱས་ཞུས་ཡོད་པ་དང་། དུས་དྲན་སྲུང་བརྩིའི་མཛད་སྒོར་སྐུ་མགྲོན་གཙོ་བོ་ཨོསྟྲེ་ལི་ཡཱའི་གྲོས་ཚོགས་འཐུས་མི་ཇིམ་ཅལ་མར་ (Dr Jim Chalmer) མཆོག་དང་། མིལ་ཊོན་ཌིག་ (Milton Dick) མཆོག ཨན་ཌི་རེའོ་གྷིལ་སི་ (Andrew Giles) མཆོག བྷིལ་ཞོར་ཊན་ (Bill Shorten) མཆོག   ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེང་གེ་ལགས། དེ་བཞིན་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ཁག་གཅིག་དང་། གཞུང་ཚབ་ཆེན་མོ་ཁག་གཅིག གཞུང་འབྲེལ་མི་སྣ། རྒྱ་གར་གྱི་གྲོགས་པོ། མི་སྣ་གྲགས་ཅན་ཁག་གཅིག་བཅས་ཕེབས་འདུགདེ་ཡང་མཛད་སྒོར་རྒྱ་གར་དང་ཨོསྟྲེ་ལི་ཡཱའི་རྒྱལ་གླུ་བཏང་རྗེས་རྒྱ་གར་གྱི་གཞུང་ཚབ་ཆེན་མོ་སྐུ་ཞབས་མཱན་པྲིཏ་ཝོ་རཱ་ (Manpreet Vohra) མཆོག་དང་སྐུ་མགྲོན་གཙོ་བོ་མཆོག་གིས་གསུང་བཤད་དང་། དེ་བཞིན་ཨོསྟྲེ་ལི་ཡཱའི་སྲིད་བློན་སྐུ་ཞབས་ཨན་ཐོ་ནེ་ཨེལ་བྷ་ནེ་སི་ (Anthony Albanese) མཆོག་གིས་བརྙན་ཐུང་བརྒྱུད་གསུང་བཤད་གནང་ཡོད།

མཐར་ཨ་ནུ་ཞི་ཀ་གླུ་གར་སྒྲིག་སྦྱོར་ཁང་ (Anushka Dance Studio) གིས་བཏང་གནང་བའི་རྒྱལ་ཞེན་གྱི་གཞས་ལ་གཞི་བཞག་ནས་ཞབས་བྲོ་འཁྲབ་སྟོན་གཟིགས་འབུལ་ཞུས་ཏེ་མཛད་སྒོ་གྲོལ་ཡོད་པ་བཅས།།