༄༅། །ཕྱི་ལོ་ ༢༠༢༢ ཟླ་ ༠༨ ཚེས་ ༠༢ ཉིན་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཇ་ནི་ཊ་ར་ཡེ་སི་ (Senator Janet Rice) མཆོག་གིས་ཨོསྟྲེ་ལི་ཡཱའི་གྲོས་ཚོགས་ནང་ཕྱི་ལོ་ ༢༠༢༢ ཟླ་ ༦ ཚེས་ ༢༢ ནས་ ༢༣ བར་ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིན་ཌོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་ཚོགས་པའི་སྐོར་གླེང་སློང་གནང་བ་དང་འབྲེལ་འབྱུང་འགྱུར་ཕྱི་ཟླ་ ༠༩ ནང་བོད་ཀྱི་ཞུ་གཏུག་ཉིན་མོར་བོད་མི་ཁག་གཅིག་ཨོསྟྲེ་ལི་ཡཱའི་གྲོས་ཚོགས་ནང་བོད་དོན་ཞུ་གཏུག་སླད་ཕེབས་གཏན་ཁེལ་ཡོད་པས། དེ་དུས་ཨོསྟྲེ་ལི་ཡཱའི་གྲོས་ཚོགས་འཐུས་མི་རྣམ་པས་བོད་ལ་ཞི་བདེ་དང་དྲང་བདེན་འཐོབ་ཐབས་སུ་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་མཉམ་རུབ་ཀྱིས་བོད་མི་ཞུ་གཏུག་པ་རྣམས་དང་ཐུག་འཕྲད་གནང་དགོས་པའི་འབོད་སྐུལ་ཤུགས་ཆེ་ཞུས་གནང་འདུག
དེ་ཡང་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཇ་ནི་ཊ་ར་ཡེ་སི་མཆོག་གིས་ཨོསྟྲེ་ལི་ཡཱའི་གྲོས་ཚོགས་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་བསྒྲགས་གཏམ་སྐོར་གསུང་དོན། ཕྲན་རང་ཉིད་འདི་ལོའི་ཕྱི་ཟླ་དྲུག་པའི་ནང་ཨ་རིའི་རྒྱལ་ས་ཝ་ཤིན་ཌོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་བཅར་རྒྱུ་བྱུང་བས་སྐལ་བ་བཟང་པོ་བྱུང་ལ། ངས་དོ་དགོང་གཏམ་བཤད་འདིའི་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དང་བོད་ནང་གི་ཛ་དྲག་གནས་སྟངས་སྐོར་ཅི་ཞིག་བཤད་དགོས་པའི་སྐོར་བསམ་བློ་བཏང་བ་ཡིན། མཐའ་མར་ངས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་བསྒྲགས་གཏམ་སྐོར་གཏམ་བཤད་བྱ་རྒྱུའི་ཐག་བཅད་པ་ཡིན།
རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་རྒྱལ་ཁབ་གྲངས་ ༢༨ ཀྱི་གྲོས་ཚོགས་འཐུས་མི་མཉམ་ཞུགས་ཀྱིས་བོད་ནང་གི་གནས་སྟངས་དང་། བོད་རྒྱའི་དཀའ་རྙོག་སེལ་ཐབས་སྐོར་གྲོས་བསྡུར་གནང་ཡོད་པ་དང་། ཕྱི་ལོ་ ༡༩༥༠ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་དབང་བསྒྱུར་བྱས་ཤིང་། དེ་ནས་བཟུང་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཁྲིམས་འགལ་ཐོག་དབང་བསྒྱུར་བྱས་པ་ཞིག་ཆགས་ཡོད། ཅེས་དང་།
ཚོགས་བཅར་བ་ཡོངས་ནས་རྒྱལ་སྤྱིའི་གྲོས་ཚོགས་འཐུས་མི་རྣམས་དང་བོད་མི་མང་སྤྱི་འཐུས་རྣམ་པ་བཅས་མཉམ་འབྲེལ་གྱིས་བོད་དོན་སྐོར་ལས་འགུལ་སྤེལ་རྒྱུའི་ཆོད་སེམས་བརྟན་པོ་ཡོད་པ། རྒྱལ་སྤྱིའི་གྲོས་ཚོགས་འཐུས་མི་རྣམ་པས་བོད་དོན་ཆེད་དུ་གྲོས་གཞི་གྲོས་ཆོད་གཏན་འབེབས་དང་། དེ་བཞིན་ཉན་ཞིབ་དང་རྟོག་ཞིབ་གནང་དགོས་པ། རྒྱལ་སྤྱིའི་གྲོས་ཚོགས་འཐུས་མི་རྣམ་པས་སོ་སོ་རྒྱལ་ཁབ་ཀྱི་གཞུང་ལ་རྒྱལ་སྤྱིའི་ཁྲིམས་གཞིར་བཞག་ཐོག་བོད་མིའི་རང་ཐག་རང་གཅོད་ཀྱི་ཐོབ་ཐང་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ཐོག་བདག་དབང་ཡོད་སྐོར་རྗོད་བཞིན་པར་ངོས་ལེན་གནང་རྒྱུ་མེད་པ། བོད་ནི་རྒྱ་ནག་གིས་དབང་བསྒྱུར་བྱས་པ་ཞིག་ཡིན་པ་ལས་རྒྱ་ནག་གི་ཆ་ཤས་མིན་པ་ངོས་འཛིན་གནང་དུ་འཇུག་དགོས་པ་བཅས་ཀྱི་སྐོར་གསུངས།
ཕྱོགས་མཚུངས་ལྕམ་སྐུ་ཇ་ནི་ཊ་ར་ཡེ་སི་མཆོག་གིས། རྒྱལ་སྤྱིའི་གྲོས་ཚོགས་འཐུས་མི་རྣམ་པས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་བོད་རྒྱའི་དཀའ་རྙོག་སེལ་ཐབས་སུ་མཉམ་རུབ་གནང་དགོས་པའི་སྐོར་དང་། ཚོགས་བཅར་བ་ཡོངས་ནས་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བླ་ཆེན་རྣམ་པའི་མ་འོངས་ཡང་སྲིད་བོད་མི་ནང་པའི་ཚོགས་སྡེ་ཁོ་ནར་འདེམས་སྒྲུག་དང་བསྐོ་བཞག་གནང་དུ་འཇུག་དགོས་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་དང་རྒྱ་ནག་དམར་ཤོག་ཚོགས་པས་ལོ་རྒྱུས་ལ་འཁྱོག་བཤད་ཀྱིས་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཞེས་རྗོད་བཞིན་པར་ངོས་ལེན་གནང་རྒྱུ་མེད་པ། ཚོགས་བཅར་བ་ཡོངས་ནས་མཉམ་རུབ་ཀྱིས་རྒྱ་གཞུང་གིས་བོད་མཐོ་སྒང་གི་ཁོར་ཡུག་ལ་བཤུ་གཞོག་གཏོང་བཞིན་པ་འགོག་ཐབས་དང་མུ་མཐུད་བོད་མིས་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་སེལ་ཐབས་གནང་བཞིན་པར་རྒྱབ་སྐྱོར་གནང་རྒྱུ་ཡིན་པ། ཚོགས་བཅར་བ་ཡོངས་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་བསྒྱུར་འོག་ཡོད་པའི་ཡུ་གུར་དང་ལྷོ་སོག་གི་མི་མང་། དེ་བཞིན་ཧོང་ཀོང་དང་ཐའེ་ཝན་གྱི་མི་མང་། རྒྱ་རིགས་མང་གཙོ་ལས་འགུལ་བ་བཅས་ལ་གདུང་སེམས་མཉམ་སྐྱེའི་རྒྱབ་སྐྱོར་གནང་རྒྱུའི་བསྒྲགས་གཏམ་སྤེལ་ཡོད་པ་སོགས་ཀྱི་སྐོར་གསུང་བཤད་གནང་ཡོད་པ་བཅས།།
