༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༨ ཚེས་ ༢༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་དགོན་ཚོགས་ཀྱི་ཚོགས་ཁང་ཆོས་ཀྱི་བསྟི་གནས་ཞེས་པར་ཆིབས་སྒྱུར་གྱིས་དད་ལྡན་མང་ཚོགས་ལ་བཀའ་སློབ་བཀའ་དྲིན་སྩལ་གནང་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པ་ཙམ་ལ་མགོན་པོ་གང་ཉིད་མཆོག་ལ་དྭགས་ཞི་བའི་ཚལ་ཕོ་བྲང་ནས་ལྕོག་ལམ་སར་དུ་ཆགས་པའི་ལ་དྭགས་དགོན་ཚོགས་ཀྱི་ཚོགས་ཁང་ཆོས་ཀྱི་བསྟི་གནས་ཞེས་པར་ཆིབས་སྒྱུར་བསྐྱངས་ཏེ་དེར་འདུས་སེར་སྐྱ་མང་ཚོགས་ལ་བཀའ་སློབ་སྩལ་དོན། ཁྱེད་རང་ཚོ་ལ་དྭགས་མི་མང་གིས་ངོས་ལ་དད་པ་གཡོ་བ་མེད་པ་ཡོད་སྟབས་ཁྱེད་རང་ཚོ་ཐུག་འདོད་བྱུང་། མི་མང་གིས་བློ་རྩེ་གཅིག་ཏུ་དད་པ་དང་དགའ་པོ་བྱེད་དུས་དེ་བརྟན་བཞུགས་ལྟ་བུ་ཡོང་གི་འདུག དེ་ལྟར་བྱེད་དུས་ང་མི་ཚེ་རིང་པོ་སྡོད་དགོས་འདུག་བསམ་པ་དྲན་གྱི་འདུག དེས་བརྟན་བཞུགས་ལའང་ཕན་པ་རེད། མི་མང་ཚོའང་སངས་རྒྱས་པའི་ཆོས་ལ་དད་མོས་ཡོད་པའི་ཐོག་ངོས་རང་ཐུག་ནས་ངོས་ཀྱིས་ནང་ཆོས་ངོ་སྤྲོད་ཕྲན་བུ་རེ་བརྒྱབ་ཀྱི་ཡོད། དེའང་ཁྱེད་ཚོས་དད་པ་ཙམ་མ་ཡིན་པར་རྒྱུ་མཚན་མཐོང་བའི་སྒོ་ནས་དད་པ་སྐྱེས་པ་ཞིག་དགོས། སངས་རྒྱས་པའི་བསྟན་པ་ཤེས་ནས་དད་པ་ཐོབ་པ་ཞིག་ཡོང་བར་ངོས་ཀྱི་ཁྱེད་རང་ཚོར་ཕན་ཐོགས་གང་འཚམ་བྱེད་ཐུབ་ཀྱི་ཡོད་པ་རེད། ངོས་རང་ཡང་སྤྲོ་བ་ཞེ་དྲག་ཡོད། བསྟན་པའི་ཞབས་འདེགས་རེད། དེ་བཞིན་ས་གནས་ལ་ཁ་ཆེའི་ཆོས་པ་མང་པོ་ཡོད། ཚང་མས་ཧ་ཅང་དགའ་པོ་བྱེད་ཀྱི་འདུག ངོས་ཀྱི་ལས་འགན་གཅིག་ནི་ཆོས་ལུགས་ཚང་མ་མཐུན་སྒྲིལ་ཡོང་ཐབས་དེ་ཡིན། ཆོས་ལུགས་ཚང་མའི་བསླབ་བྱ་སེམས་པ་བཟང་པོ་བྱ་རྒྱུ་དེ་གཅིག་གྱུར་ཡིན་དུས་ང་ཚོ་ཚང་མས་མཐུན་པོ་བྱས་ནས་གཞན་ཕན་སྒྲུབ་དགོས། ལ་དྭགས་ནས་མོན་བར་གྱི་ཧི་མ་ལ་ཡ་ས་ཁུལ་ཚང་མ་བོད་དང་ས་འབྲེལ་རེད། ས་གནས་དེ་དག་ཏུ་བོད་ཀྱི་ཆོས་དང་རིག་གཞུང་དར་ཁྱབ་བྱུང་ཡོད་པ་མ་ཟད། ལོ་བརྒྱ་ཕྲག་མང་པོའི་རིང་ལ་བོད་ཀྱི་སངས་རྒྱས་པའི་ཆོས་ལ་ཁྱེད་རང་ཚོས་དོ་སྣང་དང་དད་མོས་བྱེད་ཀྱི་ཡོད། བོད་ཀྱི་སངས་རྒྱས་པའི་ཆོས་ལ་ངོས་ཀྱིས་ངོ་སྤྲོད་ཕྲན་བུ་བྱེད་ཀྱི་ཡོད་པས་དེ་ལ་ཤེས་ནས་དད་པ་ཐོབ་པ་ཞིག་བྱུང་ན་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་མི་ཉམས་གོང་འཕེལ་ཡོང་བར་ཕན་ཐོགས་ཀྱི་ཡོད། བོད་རྒྱ་ཆེ་མི་མང་ཚོས་ཀྱང་༸རྒྱལ་བ་རིན་པོ་ཆེ་ཟངས་དཀར་དང་ལ་དྭགས་ལ་འབྱོར་དུས་ཡུལ་པ་ཚོས་དད་པ་རྩེ་གཅིག་ཏུ་བྱེད་ཅིང་། ༸རྒྱལ་བ་རིན་པོ་ཆེའང་འཛུམ་ཤིག་ཤིག་ངང་བསྡད་ཡོད་པའི་སྐད་ཆ་གོ་དུས་ཁོང་ཚོས་ངོས་ལ་བློ་གཏད་བཅོལ་ནས་བསྡད་ཡོད་སྟབས། ཁོང་ཚོའི་ཡིད་ཆེས་བརྟན་དུ་འགྲོ་བ་མ་ཟད། སེམས་གཏིང་ནས་གདེངས་ཁེལ་བ་ཡོང་ངེས་རེད།བོད་ཀྱི་ཆོས་དང་རིག་གཞུང་རྒྱ་གུང་ཁྲན་གྱིས་ཐབས་ཤེས་ཡོད་དགུ་རྩལ་སྤྲུག་གིས་མེད་པ་བཟོ་རྒྱུའི་ཐབས་ཤེས་བྱས་པ་རེད། འོན་ཀྱང་དེ་ཕམ་ཉེས་ཕྱིན་པ་རེད། བོད་རྒྱ་ཆེ་མི་མང་གི་དད་པ་དང་དམ་ཚིག་གཡོ་བ་མེད་པ་ཡོད་པ་དེ་བོད་ནང་གི་མི་མང་གིས་མཐོང་དུས་སེམས་ལ་སེམས་ཤུགས་སྐྱེ་རྒྱུར་ཕན་ཐོགས་ཡོད་པ་ཏན་ཏན་རེད་འདུག སངས་རྒྱས་པའི་ཆོས་ཀྱི་ནང་ནས་བོད་ནང་ཡོད་པའི་སངས་རྒྱས་པའི་ཆོས་དེ་དཔལ་ནཱ་ལེནྡྲའི་མཁས་པའི་དབང་པོ་ཚོས་བསྲེག་བཅད་བརྡར་གསུམ་གནང་བའི་ཧ་ཅང་ཡག་པོ་ཞིག་ཆགས་ཡོད། དཔལ་ནཱ་ལེནྡྲ་མཁས་པའི་དབང་པོ་ཚོས་བསྲེག་བཅད་བརྡར་གསུམ་ཐོག་ནས་སངས་རྒྱས་པའི་ཆོས་གཏན་ལ་ཕབ་པ་འདི་རིགས་པ་དང་ལྡན་པ་ཞིག་རེད། ག་ཚོད་བསམ་བློ་གཏང་བ་ཡིན་ནའང་རིགས་པའི་ངེས་པ་ཇི་ཆེར་འགྲོ་རྒྱུ་མ་གཏོགས་རིགས་པས་དཔྱད་དུས་འདི་ཇི་ལྟར་ཡིན་ནམ་སྙམ་པའི་ཐེ་ཚོམ་སྐྱེ་རྒྱུའི་གཞི་ཁྱོན་ནས་མེད་པ་ཞིག་རེད་འདུག

སྤྱིར་ཆོས་ལུགས་ཚང་མས་བྱམས་བརྩེའི་སྐོར་གསུང་གི་ཡོད། ཧ་ཅང་ཡག་པོ་རེད། འོན་ཀྱང་བོད་ནང་ཡོད་པའི་ནཱ་ལེནྡྲའི་ཆོས་དེ་བསྲེག་བཅད་བརྡར་གསུམ་རིགས་པའི་ལམ་ནས་དཔྱད་པ་བྱས་ཏེ་གཏན་ལ་ཕབ་པ་ཞིག་ཡིན་པས། ཇི་ཙམ་གྱིས་རིགས་པ་དཔྱད་པ་བྱེད་ན་དེ་ཚོད་ཀྱིས་སེམས་ལ་ངེས་པ་འཐོབ་རྒྱུ་ཡོད་པ་ཞིག་ཆགས་ཡོད། ས་གནས་འདི་བོད་དང་ས་འབྲེལ་ཡིན་སྟབས་བོད་ནང་གི་བོད་མི་ཚོས་ཀྱང་དངོས་བརྒྱུད་གཉིས་ཀྱི་ཐོག་ནས་གནས་ཚུལ་གོ་ཐུབ་ཀྱི་ཡོད་པས་ཆབ་སྲིད་ཟེར་ནའང་འདྲ་གང་ལྟར་མི་རིགས་ཀྱི་དོན་དག་བཤད་ན། ཕྱོགས་གཅིག་ནས་རྒྱ་མི་གུང་ཁྲན་གྱིས་ཏཱ་ལའི་ལོག་སྤྱོད་པ་ཞེས་བཤད་ཀྱི་ཡོད། ཏཱ་ལའི་ལོག་སྤྱོད་པ་དེ་ད་ལྟ་ཧྲ་ཏག་ཏག་བྱས་ན་བསྡད་འདུག་བསམ་པ་དྲན་དུས་བོད་ནང་གི་བོད་མི་ཚོར་སེམས་ཤུགས་སྐྱེ་རྒྱུར་ཕན་གྱི་རེད། རྒྱ་མི་གུང་ཁྲན་བསམ་བློ་གུ་དོག་པོ་གྲས་ཚོའི་བསམ་བློའི་ནང་ལ་ཧི་མ་ལ་ཡ་རི་རྒྱུད་ནང་ཏཱ་ལའི་བླ་མ་ལ་ཁ་ཞེ་གཉིས་མེད་ཐོག་ནས་དད་མོས་བྱེད་མཁན་ཤུགས་ཆེན་པོ་ཡོད་པ་མཐོང་དུས་དེ་ལའང་གནད་འགག་ཅིག་ཡོད། རྒྱ་མི་གུང་ཁྲན་དངོས་ཡོད་གནས་ཚུལ་མི་ཤེས་པ་གང་ཞིག་ཆོས་ཟེར་དུས་ཧ་ཅང་སྡུག་པོ་ཞིག་ལ་བརྩི་མཁན་ཚོས་ངོས་རང་འདི་གར་ཕྱིན་པའི་སྐབས་སུ་ཧི་མ་ལ་ཡའི་མི་རྨོངས་དད་ཅན་ཚོར་ཏཱ་ལའི་བླ་མས་མགོ་སྐོར་གཏོང་གི་འདུག་ཅེས་སེམས་ཀྱི་ཡོད། ད་དུས་ཚོད་ཡོལ་ཟིན་པ་རེད་མ་གཏོགས་མའོ་ཙེ་ཏུང་གིས་ངོས་ལ་ནང་ཚགས་དང་ཧ་ཅང་དགའ་པོ་བྱེད་ཀྱི་ཡོད། ཉིན་ཞིག་ཐུག་དུས་མའོ་ཙེ་ཏུང་གིས་དགའ་པོ་བྱས་ཏེ་ཁྱེད་ཀྱི་བསམ་བློ་དེ་ཚན་རིག་དང་མཐུན་པའི་བསམ་བློ་རེད་འདུག ཆོས་དེ་དུག་རེད་ཅེས་བཤད་བྱུང་། གལ་ཏེ་དེང་སང་མའོ་ཙེ་ཏུང་ཡོད་ན་ཆོས་དུག་རེེད་ཟེར་བའི་སྐད་ཆ་དེ་ཕྱིར་འཐེན་བྱེད་པའི་དུས་ལ་སླེབས་ཡོད། སྤྱིར་འཛམ་གླིང་འདིར་ཡོད་པའི་རིས་སུ་མ་ཆད་པའི་ཆོས་ལུགས་ཁག་ལ་ལྟ་གྲུབ་མི་འདྲ་བ་ཡོད། ཁ་ཤས་ཀྱིས་འཇིག་རྟེན་བཀོད་པ་པོ་འདོད་པ་དང་། ཁ་ཤས་ཀྱིས་འཇིག་རྟེན་བཀོད་པ་པོ་མི་འདོད་པ་བཅས་ལྟ་གྲུབ་མི་འད་བ་ཡོད་ནའང་སེམས་པ་བཟང་པོ་བྱེད་དགོས་པ་དང་། མི་ལ་ཕན་ཐོགས་དགོས་པ་བསླབ་བྱ་གཅིག་མཚུངས་ཡིན། ངོས་རང་འཛམ་གླིང་ས་ཕྱོགས་འདྲ་མིན་ལ་སླེབས་སྐབས་ཁ་ཆེའི་ལྷ་ཁང་ལའང་འགྲོ་གི་ཡོད་པ་མ་ཟད། བསམ་པ་རྣམ་དག་གིས་ཁ་ཆེའི་དཀོན་མཆོག་ལ་གསོལ་བ་བཏབ་པའི་གྲུབ་དོན་ལ། སེམས་ཡག་པོ་བྱེད་པ་ཞིག་ཡོང་གི་ཡོད་སྟབས། ངོས་ཀྱིས་ཀྱང་དེར་སྨོན་ལམ་རྒྱག་གི་ཡོད།  དེ་བཞིན་ཧིན་དུའི་ལྷ་ཁང་དང་། གཅེར་བུ་བའི་ལྷ་ཁང་སོགས་ག་འདྲ་ཞིག་ལ་བསླེབས་ཀྱང་སོ་སོའི་ལྟ་གྲུབ་བཤད་སྟངས་མི་འདྲ་བ་ཡིན་ནའང་ཚང་མའི་བསླབ་བྱ་གཅིག་མཚུངས་ཡིན་པར་བརྟེན་མི་མང་པོར་ཕན་ཐོགས་པར་ཤོག་ཅེས་སྨོན་ལམ་རྒྱག་གི་ཡོད། 

ངོས་རང་ཟི་ལིང་པའི་བྱིས་པ་ལྷ་མོ་དོན་གྲུབ་༸རྒྱལ་བའི་ཡང་སྲིད་དུ་བརྩད་གཅོད་བྱེད་སྐབས་ལྷ་མོའི་བླ་མཚོ་མཇལ་དུ་འགྲོ་བའི་ཁོངས་རྭ་སྒྲེང་རིན་པོ་ཆེ་མཆོག་དང་། ཀེའུ་ཚང་རིན་པོ་ཆེ་མཆོག་སོགས་ཕེབས་ཡོད། ལྷ་མོའི་བླ་མཚོའི་ནང་ལ་ཨ་ཀ་མ་ཞེས་ཡིག་འབྲུ་གསུམ་ཧ་ཅང་གསལ་པོ་ཤར་འདུག་པ་མ་ཟད། མཐར་ངོས་རང་སྐྱེ་སའི་གྲོང་གསེབ་དེ་ཡང་ཧ་ཅང་གསལ་པོ་བསྟན་འདུག ཀེའུ་ཚང་རིན་པོ་ཆེ་མཆོག་ལྷ་མོ་བླ་མཚོར་གཟིགས་མཁན་གྱི་གྲས་ཡིན་པས་ངོས་རང་སྐྱེས་སའི་གྲོང་གསེབ་དེར་ཕེབས་འབྱོར་སྐབས་འདི་རྒྱུས་ཡོད་ཡིན། ལྷ་མོ་བླ་མཚོའི་ནང་ཧ་ཅང་གསལ་པོ་མཐོང་སོང་ཞེས་གསུངས་འདུག ཀེའུ་ཚང་རིན་པོ་ཆེ་མཆོག་སོགས་ང་ཚོའི་གྲོང་གསེབ་ཏུ་ཕེབས་ཀྱི་ཡོད་པ་སུ་གཅིག་གིས་ཤེས་མེད་ཀྱང་ངོས་རང་ཉིན་དེའི་ཞོགས་པ་སྔ་པོ་ནས་ཧ་ཅང་བྲེལ་བ་བྱས་པ་དང་། ཀེའུ་ཚང་རིན་པོ་ཆེ་མཆོག་སོགས་ཕེབས་སྐབས་ངོས་ཀྱིས་ཀེའུ་ཚང་རིན་པོ་ཆེ་མཆོག་ངོ་ཤེས་ཏེ་ཕར་རྒྱུག་ནས་སེ་རའི་ཨ་ཀ་ཞེས་ཧ་ཅང་དགའ་པོ་བྱས་འདུག ངོས་ཀྱིས་ཀེའུ་ཚང་རིན་པོ་ཆེའི་མགུལ་དུ་སྐུ་གོང་མས་གནང་བའི་ཕྱག་ཕྲེང་ཞིག་ཡོད་པ་དེར་འཇུས་ནས་འདི་ངོས་ཀྱི་ཡིན། ངོས་ལ་དགོས་ཞེས་བརྗོད་འདུག ངོས་རང་འདིར་བསླེབས་པ་དེ་ཡང་ལྷ་མོའི་བླ་མཚོ་ནས་ལུང་བསྟན་པ་ལྟར། མཐའ་འཁོབ་ཟི་ལིང་གི་བྱིས་པ་ཞིག་ཕྱིས་སུ་༸རྒྱལ་བ་རིན་པོ་ཆེ་ཆགས་པ་དང་། ལྷ་སར་བསླེབས་ནས་ལྷ་སའི་ཇོ་བོ་རིན་པོ་ཆེའི་སྐུ་མདུན་ནས་དགེ་བསྙེན་དང་། དགེ་ཚུལ། དགེ་སླེང་བཅས་བསྒྲུབས། གཙོ་ཆེ་ཤོས་ཡོངས་འཛིན་རྣམ་པ་ཚོའི་ཐུགས་རྗེ་བཀའ་དྲིན་ལ་བརྟེན་ནས་དཔེ་ཆ་གང་ཙམ་བལྟས་པ་ཡིན། རྟགས་གསལ་གཏོང་བ་དེ་བོད་ཀྱི་ཕྱྭ་བ་ཆོས་སེང་གིས་སྲོལ་གཏོད་འདུག དེ་ཡིན་ན། དེ་ཡིན་པས་ཁྱབ་པར་ཐལ། ཡིན་པའི་ཕྱིར་ཞེས་རྟགས་གསལ་ཧ་ལས་པ་ཞིག་གཏོང་སྐབས། བཅོམ་ལྡན་འདས་ཀྱི་བཀའ་ལུང་དྲངས་ན་གུས་ཞབས་བྱས་ཏེ་ཞྭ་མོ་ཕུད། མགོ་སྒུར་ནས་ལུང་ཉན་པའི་རྗེས་སུ་མ་ཁྱབ་པ་མ་བྱུང་ཞེས་བཅོམ་ལྡན་འདས་ཀྱི་བཀའ་ཡིན་ནའང་ལུང་གི་འགྲེལ་བ་མི་འདྲ་བ་ཞིག་བརྒྱབས་ནས་ཐུབ་པའི་བཀའ་ཡིན་ཡང་རིགས་པས་དཔྱད་ནས་འགྲོ་བས། སྔ་མོ་ལམ་རིམ་དང་བློ་སྦྱོང་གི་དཔེ་ཆའི་ནང་དུ། རྟོག་གེ་མགོ་མཁྲེགས་ལ་སྐྱེས་ན། །སངས་རྒྱས་དངོས་ཀྱིས་ཀྱང་གདུལ་དཀའ། ཞེས་པ་དེ་ཆགས་པ་རེད། 

ནཱ་ལེནྡྲའི་མཁས་པས་སྟོན་པའི་བཀའ་ལའང་དངོས་གནས་དྲང་གནས་རིགས་པའི་ལམ་ནས་དཔྱད་པ་གནང་སྟེ་རིགས་པའི་སྒྲུབ་བྱེད་ཀྱི་ཐོག་ནས་ཡིན་པ་དང་མིན་པ། ཁས་བླང་རུང་བ་དང་མི་རུང་བ་སོགས་རིགས་པའི་ལམ་ནས་དཔྱད་དེ་འགྲོ་གི་ཡོད་པ་རེད། བོད་གངས་ཅན་ལྗོངས་ཀྱི་ནང་པ་ཚོ་ནཱ་ལེནྡྲའི་ཆོས་བརྒྱུད་འཛིན་མཁན་ཆགས་ཡོད་པ་དང་། མང་ཚོགས་ཀྱི་བྱིས་པ་ཆུང་ངུ་ཚོས་ཀྱང་ཆུང་ཆུང་སྐབས་ནས་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཞེས་སྐྱབས་འགྲོ་དང་མ་ཎི་བགྲང་གི་ཡོད། དཔེ་ཆ་ཤེས་ཀྱི་མེད་པ་མ་ཟད། དཔེ་ཆ་སློབ་མཁན་ཡང་མེད། འོན་ཀྱང་རིམ་པས་སློབ་གཉེར་ཁང་ཁག་ལ་ཞུགས་ཏེ་དཔེ་ཆར་བལྟས་ཡོང་བ་ན། བོད་ཀྱི་སངས་རྒྱས་པའི་ཆོས་དེ་རྒྱུ་མཚན་དང་ལྡན་པ་ཞིག་དང་། དེ་ལ་དད་པ་བྱེད་པར་རྒྱུ་མཚན་ཡང་ཡོད། རྒྱུ་མཚན་ཤེས་པའི་ཐོག་ནས་དད་པ་བྱེད་པའམ་ཤེས་ནས་དད་པ་ཐོབ་པ་དེ་ཧ་ཅང་བརྟན་པོ་རེད། 

དེང་སྐབས་འཛམ་གླིང་འདིའི་སྟེང་ནང་པའི་ཡུལ་གྲུ་མང་པོ་ཡོད་ནའང་བོད་ཀྱི་ནཱ་ལེནྡྲའི་ཆོས་བརྒྱུད་ནི་རིགས་པའི་ལམ་ནས་དཔྱད་པ་དཔྱིས་ཕྱིན་པ་བྱས་ནས་རྒྱུ་མཚན་མཐོང་བའི་སྒོ་ནས་སངས་རྒྱས་ཀྱི་གསུང་ལ་ཡིད་ཆེས་སླེབས་པའི་ཆོས་བརྒྱུད་ཅིག་ཆགས་ཡོད། ངོས་ལ་ཆ་བཞག་ཀྱང་གཙོ་བོ་ཡོངས་འཛིན་རྡོ་རྗེ་འཆང་རྣམ་པའི་ཐུགས་རྗེ་བཀའ་དྲིན་ལ་དཔེ་ཆར་གང་ཙམ་བལྟས་ཡོད་སྟབས། ནང་པའི་ཆོས་གྲོགས་གཞག་དང་ཆོས་ལུགས་འདྲ་མིན་གྱི་མི་ཐུག་སྐབས་ཨ་མདོ་ཟི་ལིང་གི་བྱིས་པ་དེ་ཁ་བདེ་པོ་བྱས་ནས་སྡོད་ཀྱི་ཡོད།  རྗེ་རིན་པོ་ཆེས་མཛད་པའི་རྟེན་འབྲེལ་བསྟོད་པའི་མཇུག་དེར། སྟོན་དེའི་རྗེས་སུ་རབ་ཏུ་འབྱུང་འགྱུར་ཞིང་། །རྒྱལ་བའི་གསུང་ལ་སྦྱང་པ་མི་དམན་ཞིང་། །རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག། །དྲང་སྲོང་ཆེན་པོ་དེ་ལ་དེ་ལྟར་གུས། །ཞེས་གསུངས་པ་ལྟར་ངོས་རང་ཡང་དེ་ལྟར་ཆགས་ཡོད། ཕ་ཡུལ་ནས་ལྷ་སར་ཡོང་། བླ་མ་རྣམ་པ་ཚོའི་བཀའ་དྲིན་དང་། ལྷ་སའི་ཇོ་བོའི་མདུན་ནས་དགེ་བསྙེན་དང་དགེ་ཚུལ། དགེ་སློང་བཅས་བསྒྲུབས། རྒྱལ་བའི་གསུང་ལ་སྦྱང་པ་མི་དམན་ཞིང་། །ཞེས་གསུངས་པ་ལྟར་ལོ་ངོ་ལྔ་དྲུག་ནས་དཔེ་ཆ་བལྟས། དབུ་ཕར་གཙོ་བོར་གྱུར་པའི་རྣམ་འགྲེལ་གང་ལ་གང་འཚམ་བལྟས་ཡོད། སློབ་དཔོན་དབྱིག་གཉེན་གྱི་མངོན་པ་མཛོད་ནང་རི་རབ་དང་གླིང་བཞི་གླིང་ཕྲན་སྐོར་གསུང་གི་ཡོད་དུས་དེ་ལྟར་བཞག་ན་འགྲིག་གི་འདུག་བསམ་ནས་དེ་ལྟར་འཇོག་གི་ཡོད། ཟླ་བ་གྲགས་པས། དེ་ཉིད་བཤད་ཟིན་ཟབ་མོ་འཇིགས་རུང་འདི་ནི་སྔོན་གོམས་ཉིད་ལས་སྐྱེ་བོ་ཡིས། །ངེས་པར་རྟོགས་འགྱུར་འདི་ནི་གསན་རྒྱ་ཆེ་ཡང་གཞན་གྱི་ཐུགས་སུ་ཆུད་མི་འགྱུར། །ཞེས་གསུངས་པའི་ཐད་ཀྱི་འཇུག་པ་རང་འགྲེལ་གྱི་ནང་དུ་གནས་བརྟན་དབྱིག་གཉེན་དང་ཕྱོགས་གླང་སོགས་ཀྱིས་གསུངས་པ་སྒྲ་ཇི་བཞིན་དུ་ཁས་བླང་ན་མི་འགྲིག ། རིགས་པ་དང་འགལ་གྱི་འདུག་གསུངས་པ་དེ་བདེན་པ་རེད། ནཱ་ལེནྡྲའི་འགྲོ་སྟངས་དེ་འདྲ་རེད། དབྱིག་གཉེན་དང་ཕྱོགས་གླང་སོགས་བླ་མ་ཧ་ཅང་རྩ་ཆེན་པོ་རེད་ཅེས་དེ་ཙམ་ལ་ཆ་མ་བཞག་པར་ཁོང་ཚོའི་གསུང་ལ་བརྟག་དཔྱད་བྱས་ནས་དེ་དག་གིས་མིང་གི་ཐ་སྙད་དབང་གིས་ཡོད་པ་དེ་ཐུགས་ལ་ཆུབ་མེད་སྟབས། སྐྱབས་སུ་མཆི་ཞེས་པར་བཞག་པ་དེ་རིགས་པ་རང་གིས་དཔྱད་ནས་འགྲོ་བ་ཡིན་པས་ཧ་ཅང་ཡག་པོ་འདུག  

སེམས་ཁམས་རིག་པ་ནུབ་ཕྱོགས་པའི་ཤེས་ཡོན་ནང་མེད་པར་རྒྱ་གར་གྱི་སེས་ཡོན་ཞིག་ཡིན། གཞུང་པོ་ཏི་ལྔ་ཞིབ་ཚགས་པོ་བྱས་ནས་བལྟས་ན། ཟླ་བ་གྲགས་པའི་གསུང་དེ་དག་ཡག་ཤོས་ཡིན་སྟབས། སེམས་ཁམས་རིག་པའི་སྐོར་སྤྱིར་ནང་པའི་གཞུང་དང་། དེང་སྐབས་ནུབ་ཕྱོགས་ཀྱི་སེམས་ཁམས་རིག་པ་སྨྲ་བ་མང་པོས་ཧ་ཅང་དགའ་མོས་བྱེད་ཀྱི་འདུག སོ་སོས་དད་པ་བྱེད་སའི་ཆོས་དེ་གནས་ཚུལ་ཐ་དད་ཡིན། གང་ལྟར་རྣམ་དཔྱོད་ཀྱི་ཐོག་ནས་དཔྱད་པ་བྱེད་པར་དེང་སང་གི་ཚན་རིག་པ་ཚོས་ཧ་ཅང་དགའ་མོས་བྱེད་ཀྱི་འདུག 

ད་རེས་སྐབས་སུ་བབ་པ་ངོས་རང་ཧི་མ་ལ་ཡ་རི་རྒྱུད་དུ་ཡོང་བར་མི་མང་གིས་ཧ་ཅང་དགའ་པོ་བྱེད་པ་འདིས་བོད་ནང་ལའང་ཤུགས་རྐྱེན་ཐེབས་པ་ཙམ་དུ་མ་ཟད། རྒྱ་མི་བློ་གཟུ་བོར་གནས་པ་མང་པོ་ཞིག་ཐེ་ཚོམ་སྐྱེས་ནས་སེམས་ནང་ང་ཚོས་ནམ་རྒྱུན་ཆོས་ནི་རྨོངས་དད་རེད ཏཱ་ལའི་ལོག་སྤྱོད་པ་རེད་ཅེས་བཤད་ཀྱི་ཡོད་ནའང་མི་མང་པོས་ཧ་ཅང་དགའ་པོ་བྱེད་པར་བལྟས་ན་ང་ཚོས་བཤད་པ་དེ་འདྲ་རང་ཨེ་ཡིན་ནམ་དྲན་གྱི་རེད། ངོས་རང་འདིར་ཡོང་ནས་ཁྱེད་ཚོ་མི་མང་རྣམས་ལ་ཐུག་པ་དང་། མི་མང་ཚོས་ཀྱང་ཧ་ཅང་དགའ་པོ་བྱེད་པ་འདིས་བོད་ཀྱི་སངས་རྒྱས་པའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་ཡོང་བར་སོགས་ལ་གང་ལ་གང་ཙམ་གྱིས་ཤུགས་རྐྱེན་ཐེབས་ཀྱི་ཡོད། 

སྤྱིར་དེང་སྐབས་རྒྱ་ནག་ནང་དུ་ནང་ཆོས་ལ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག་པ་མ་ཟད། ནཱ་ལེནྡྲའི་ཆོས་བརྒྱུད་བོད་ལ་ཡོད་པ་འདི་ཚན་རིག་དང་མཐུན་པ་འདུག་ཅེས་རྒྱ་མི་ཁ་ཤས་ཀྱིས་བརྗོད་ཀྱི་འདུག རྒྱ་ནག་ནང་དུའང་ནང་པའི་ཆོས་ལ་དད་པ་བྱེད་མཁན་ཇེ་མང་དུ་འགྲོ་གི་འདུག ཟི་ལིང་ནས་ཡོང་བའི་ཨ་མདོ་ལྷ་མོ་དོན་གྲུབ་ཧ་ཅང་གྲུང་པོ་འདུག་ཅེས་རྒྱ་མིས་དེ་འདྲ་ཞིག་མཐོང་བཞིན་ཡོད། 

ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པའི་ངོས་ནས་ཉིན་རེ་བཞིན་དུ་སྟོན་པའི་གསུང་གི་གཙོ་བོ་ལྟ་གྲུབ་དང་བྱང་ཆུབ་སེམས་སྐོར་ལ་བསམ་བློ་གཏོང་གི་ཡོད། སེམས་པ་བཟང་པོ་བྱེད་དགོས་རྒྱུ་དེ་བཅོམ་ལྡན་འདས་ཀྱི་བསླབ་བྱ་གཙོ་བོ་ཡིན། ངོས་ཀྱིས་ཀྱང་སེམས་པ་བཟང་པོ་བྱ་རྒྱུ་དང་བྱང་ཆུབ་ཀྱི་སེམས་ཉམས་ལེན་བྱེད་ཀྱི་ཡོད་ལ། མི་ཐུག་ཚད་ལ་སེམས་པ་བཟང་པོ་བྱེད་དགོས། ང་རང་ཚོ་མིའི་སྤྱི་ཚོགས་ཆགས་ཡོད། མི་ཚང་མ་གཅིག་མཚུངས་རེད། ཚང་མར་འཆམ་པོ་བྱེད། བརྩེ་བ་བྱེད་རོགས་ཞེས་བརྗོད་ཀྱི་ཡོད། ཅེས་བཀའ་སློབ་སྩལ་རྗེས་དགའ་ལྡན་ཁྲི་ཟུར་༧སྐྱབས་རྗེ་རི་རྫོང་རིན་པོ་ཆེ་མཆོག་གི་གཟིམ་ཤག་ཏུ་ཆིབས་སྒྱུར་གྱིས་རིན་པོ་ཆེ་དང་མཇལ་འཕྲད་གནང་ཡོད་པ་བཅས།།