༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༨ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡུམ་ཁུལ་གྱི་ཁ་ཆེའི་ཆོས་གྲོགས་རྣམས་ལ་བཀའ་སློབ་བཀའ་དྲིན་སྩལ་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༨ པའི་ཐོག་མགོན་པོ་གང་ཉིད་མཆོག་གྲུ་འཛིན་ཕོ་བྲང་ནས་དཔལ་ལྡུམ་ཁུལ་གྱི་ཁ་ཆེའི་ཆོས་ར་ཞིག་ཏུ་ཆིབས་སྒྱུར་བསྐྱངས་ཏེ་ཁུལ་དེའི་ཁ་ཆེའི་ཆོས་གྲོགས་ཕོ་མོ་རྣམས་ལ་བཀའ་སློབ་སྩལ་དོན། དེ་རིང་ཟངས་དཀར་གྱི་ཁ་ཆེའི་གྲོགས་པོ་རྒན་གཞོན་ཕོ་མོ་ཚང་མ་ལ་གུས་འདུད་དང་འཚམས་འདྲི་ཞུ་རྒྱུ་ཡིན། ངོས་རང་ནང་པའི་དགེ་སློང་ཞིག་རེད། ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ནའང་ཚང་མས་ཡ་རབས་དང་མི་ལ་ཕན་སེམས་བྱ་རྒྱུ། སྤྱི་ཚོགས་ལ་ཞབས་འདེགས་བསྒྲུབ་རྒྱུའི་སྐོར་གསུང་གི་ཡོད་པ་གཅིག་གྱུར་རེད།དེས་ན་ངོས་ཀྱི་མི་ཚེའི་དམ་བཅའ་གཙོ་བོ་ཞིག་ནི་ཆོས་ལུགས་མཐུན་སྒྲིལ་བཟོ་རྒྱུ་དེ་ཡིན། རིས་སུ་མ་ཆད་པའི་ཆོས་ལུགས་ཚང་མར་ངོས་ཀྱིས་གུས་ཞབས་ཞུ་གི་ཡོད། དེང་དུས་ང་ཚོའི་སྤྱི་ཚོགས་ནང་ཟང་ཟིང་མང་པོ་ཡོད་པའི་ཐོག་ལ་ཆོས་ལུགས་མ་མཐུན་པ་ལ་བརྟེན་ནས་ཤོག་ཁག་འབྱེད་ཀྱི་འདུག དཔེར་ན་ཨཕ་གྷ་ནིསྟཱན་ནང་ལ་ཁ་ཆེའི་ཆོས་ལུགས་གཅིག་གྱུར་ཡིན་ནའང་སུ་ནི་དང་ཤི་ཡ་བར་ཕྲན་བུ་མི་མཐུན་པ་ཡོང་གི་ཡོད། ཆོས་ལུགས་འདྲ་མིན་ཡོད་པ་དེ་དག་མིའི་བསམ་བློ་རྒྱ་ཆུང་ངུ་ཡོད་པ་ཚོས་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་ཕན་ཚུན་འཐེན་ཁྱེར་བྱེད་པ་ང་ཚོས་མཐོང་གསལ་རེད། དེ་ཧ་ལས་པའི་སེམས་སྐྱོ་བོ་རེད་ཅེས་སོགས་དང་།ངོས་ལ་མཚོན་ན་འཛམ་གླིང་ས་ཆ་གང་དུ་སླེབས་ནའང་ཆོས་ལུགས་སོ་སོའི་ལྷ་ཁང་ལ་ཕྱིན་ནས་སྨོན་ལམ་རྒྱག་གི་ཡོད། ཆོས་ལུགས་ཚང་མས་བྱམས་པ་དང་བརྩེ་བའི་སྐོར་གསུང་གི་ཡོད། དེ་མིའི་སྤྱི་ཚོགས་ལ་ཧ་ཅང་དགོས་མཁོ་ཆེ། དེ་རིང་འདིར་ཟངས་དཀར་གྱི་ཁ་ཆེའི་ཆོས་དད་པ་ཁྱེད་རང་ཚོ་ཐུག་པར་ཆེད་མངགས་ཡོང་བ་ཡིན། ཁྱེད་རང་ཚོ་ཚང་མར་འཚམས་འདྲི་དང་གུས་ཞབས་ཡོད།  ཕྱིའི་དངོས་པོ་ཡར་རྒྱས་ཐད་འཛམ་གླིང་ཡོངས་ཀྱིས་བསམ་བློ་གཏོང་གི་ཡོད། ད་ང་ཚོས་གང་ལ་ཤུགས་རྒྱག་དགོས་ཞེ་ན། ཕྱིའི་དངོས་པོ་ཡར་རྒྱས་ཕྱིན་པ་དང་ཆབས་ཅིག་ནང་སེམས་ཀྱི་ཞི་བདེ། བྱམས་བརྩེ། སྙིང་རྗེ་སོགས་ཀྱི་ཐད་དམིགས་བསལ་དོ་སྣང་བྱེད་དགོས་འདུག འཛམ་གླིང་ཤར་ནུབ་ལྷོ་བྱང་ཚང་མས་ཞི་བདེའི་སྐོར་ཤོད་ཀྱི་ཡོད། ཞི་བདེ་ཟེར་བ་དེ་གནམ་ནས་འབབ་རྒྱུ་མེད། འཁྲུགས་པ་ང་ཚོ་མིས་བཟོས་པ་རེད། དེས་ན། ཞི་བདེ་ཞེས་པ་མི་ཕན་ཚུན་མཛའ་མཐུན་དང་གྲོགས་པའི་འདུ་ཤེས་བཅངས་ཏེ་གཅིག་ཕན་གཅིག་གྲོགས་བྱས་ཏེ་བསྐྲུན་དགོས། ངོས་རང་འཛམ་གླིང་ས་ཆ་གང་དུ་ཕྱིན་ཀྱང་ང་ཚོ་མི་གཅིག་གྱུར་ཡིན་པའི་འདུ་ཤེས་གཙོ་བོ་འཇོག་གི་ཡོད། ང་ཚོ་ཚང་མ་མི་གཅིག་པ་རེད། མིག་གཉིས་དང་ཁ་གཅིག་ཡོད་པ་ང་ཚོ་ཚང་མ་གཅིག་རེད་མི་འདུག་གམ། ང་ཚོ་ཚང་མ་ཕན་ཚུན་གཅིག་གིས་གཅིག་ལ་སེམས་ཐག་ཉེ་པོ་བྱུང་ན། འཛུམ་ཤིག་ཤིག་བྱས་ཏེ་བསྡད་རྒྱུ་འོང་། མིའི་ལྷན་སྐྱེས་ཀྱི་གནས་སྟངས་ལ་བལྟས་པ་ཡིན་ན། ང་ཚོ་ཚང་མ་མ་ལས་སྐྱེས་པ་རེད། མའི་ནུ་ཞོ་འཐུང་བཞིན་མའི་བརྩེ་བའི་འོག་ལོངས་པ་རེད། ཕྲུ་གུ་ཆུང་ངུ་རྣམས་ནས་ཁྱེད་ལུང་པ་གང་ནས་ཡིན་ནམ། ཁྱེད་ཆོས་ལུགས་གང་གི་རྗེས་འབྲང་པ་ཡིན་ནམ་ཞེས་པའི་སྐད་ཆ་ཤོད་ཀྱི་མེད། གཅིག་གིས་གཅིག་ལ་བརྩེ་བའི་བློ་ཡོད་ལ་རྩེད་མོ་མཉམ་དུ་རྩེས་ནས་སྡོད་ཀྱི་ཡོད། ང་ཚོ་བྱིས་པ་ཆུང་དུས་སྐབས་མི་གཅིག་གྱུར་གྱི་འདུ་ཤེས་འདུག ངོས་རང་འཛམ་གླིང་གི་ས་ཆ་གང་སར་སླེབས་ཡོད། མི་གཅིག་གྱུར་གྱི་འདུ་ཤེས་བཞག་སྟེ་མི་སུ་ཐུག་པ་ཡིན་ནའང་འཛུམ་ཤིག་གེ་སྡོད་ཀྱི་ཡོད། ཕར་འཛུམ་ཤིག་ཤིག་བྱས་ན་ཚུར་ལའང་དགའ་པོ་དང་སེམས་ཐག་ཉེ་པོའི་རྣམ་འགྱུར་རང་ཤུགས་ཀྱིས་ཐོན་གྱི་འདུག དཔེར་ན་མི་མེད་ལུང་སྟོང་ཞིག་ལ་སོ་སོ་གཅིག་པུ་ལྷག་བསྡད་ཡོད་ན། ཕ་རོལ་ནས་མི་ཞིག་ཚུར་ཡོང་བ་མཐོང་དུས་མི་ཞིག་ཡོང་གི་འདུག་སྙམ་ནས་སེམས་ལ་དགའ་ཚོར་སྐྱེས་ནས་འཁྲིས་སུ་འགྲོ་གི་རེད་མ་གཏོགས་མི་དེ་ལུང་པ་གང་ནས་རེད་དམ། མི་དེ་ཆོས་ལུགས་གང་རེད་དམ། མི་རིགས་གང་རེད་དམ་ཞེས་སོགས་དྲི་གི་མ་རེད། མི་གཅིག་འགྱུར་ཡིན་པ་ཙམ་གྱིས་དེ་ལ་སེམས་ཐག་ཉེ་པོས་འཁྲིས་སུ་འགྲོ་གི་རེད།དངོས་གནས་བྱས་ན་འཛམ་གླིང་གི་མི་ཚང་མ་གཅིག་པ་ཆགས་ཡོད། སྐྱེ་དུས་གཅིག་པ་རེད། འཆི་དུས་ཀྱང་འཆི་སྟངས་གཅིག་པ་རེད། གསོན་པའི་རིང་ལ་ཁྱོད་དང་ང་ཞེས་ཐག་རིང་པོ་བརྩིས་ནས་ཆོས་ལུགས་དང་། མི་རིགས། རྒྱལ་ཁབ་མི་འདྲ་བའི་ཐོག་ནས་གཅིག་གིས་གཅིག་ལ་སེམས་ཐག་ཉེ་པོ་ཡོང་རྒྱུའི་ཚབ་ལ་སེམས་ཐག་རིང་པོ་བྱས་ཏེ་གཙོ་བོ་མི་མཐུན་ཕྱོགས་ལ་བསམ་བློ་གཏོང་གི་ཡོད་པ་ལྟ་བུ་འདུག ཕྲུ་གུ་ཆུང་དུས་དེ་འདྲ་མེད། རིམ་པས་འཚར་ལོངས་བྱུང་དུས་མི་རིགས་དང་ཆོས་ལུགས་མི་འདྲ་བའི་དབྱེན་འབྱེད་དང་། མི་རིགས་གཅིག་པ་ཡིན་ནའང་དབུལ་པོ་དང་ཕྱུག་པོའི་རྣམ་དབྱེ་ཕྱེས་ཏེ་རང་ཕྱོགས་དང་གཞན་ཕྱོགས་ཞེས་པ་ང་ཚོའི་སེམས་སུ་ཤར་གྱི་ཡོད། དེ་རྙོག་གྲྭའི་རྩ་བ་ལྟ་བུ་རེད་འདུག ཚང་མས་འཛམ་གླིང་ཞི་བདེ་ཞེས་བཤད་ཀྱི་ཡོད་ཀྱང་། ཞི་བདེ་དེ་སེམས་ཀྱི་ནང་ནས་མི་ཚང་མ་གཅིག་གྱུར་ཡིན་པའི་འདུ་ཤེས་ཀྱི་ཐོག་ནས་གཅིག་གིས་གཅིག་ལ་བརྩེ་བ་བྱས་ཏེ། ང་ལ་ཞི་བདེ་དགོས་ཀྱི་ཡོད་པ་ལྟར་ངའི་རོགས་པ་ལའང་ཞི་བདེ་དགོས་བསམ་པའི་ཐོག་ནས།་ཐུན་མོང་གི་དམིགས་ཡུལ་དེ་འཛམ་གླིང་ཞི་བདེ་ཡིན་པ་ལྟར། དངོས་གནས་བདེ་སྐྱིད་ལྡན་པའི་འཛམ་གླིང་ཞིག་བཟོ་རྒྱུ་དེ་ང་ཚོ་ཚང་མའི་ལས་འགན་ཡིན།

ངོས་རང་བོད་བྱང་ཕྱོགས་ནས་སྐྱེས་ཏེ། རིམ་པས་བཙན་བྱོལ་བ་ཆགས་ནས་མི་སུ་ལ་ཐུག་ཀྱང་མི་གཅིག་པ་ཡིན་བསམ་པའི་ཐོག་ནས་ཐུག་གི་ཡོད་སྟབས་ཚང་མར་གྲོགས་པོ་ཆགས་ཀྱི་འདུག སྔ་མོ་ནས་ལྷ་སར་ཁ་ཆེའི་ཆོས་ལུགས་བྱེད་མཁན་ཡོད། ཁ་ཆེའི་གྲོགས་པོ་ཚོ་བོད་གཞུང་གིས་ངོས་ལེན་ཡོད་པར་མ་ཟད། ལྷ་སར་ཡོད་པའི་ཁ་ཆེའི་སྐྱིད་སྡུག་ཚང་མ་འཆར་ཅན་བོད་གཞུང་གི་མཛད་སྒོ་གལ་ཆེ་བ་ཚང་མར་ཡོང་གི་རེད། ལྷ་སར་ཁ་ཆེའི་ཚོང་པ་མང་པོ་མེད་ཀྱང་གང་ཙམ་ཡོད། བོད་མི་རྒན་པ་ཚོ་ཁ་ཆེའི་ཚོང་ཁང་ནང་ཕྱིན་ནས་སྐད་ཆ་བཤད་རྒྱུར་ཧ་ཅང་དགའ་པོ་བྱེད་ཀྱི་རེད། ལྷ་སར་ཡོད་པའི་ཁ་ཆེའི་ཚོང་པ་ཚོ་རྒྱ་གར་ལ་ཕྱིན་ནས་ཚུར་བསླེབས་པ་དང་རྒྱ་གར་གྱི་གསར་འགྱུར་ཅི་ཞིག་འདུག གཱནྡྷཱི་ག་རེ་གནང་གི་འདུག་པ་སོགས་ལ་ཉན་རྒྱུར་ཧ་ཅང་དགའ་པོ་ཡོད། ཁ་ཆེའི་ཚོང་པ་ཚོ་ང་ཚོར་གསར་འགྱུར་མཁོ་སྤྲོད་བྱེད་མཁན་ལྟ་བུ་ཆགས་ཡོད།ཧི་མ་ལ་ཡ་རི་རྒྱུད་འདི་ལོ་རྒྱུས་ཐོག་ནས་བོད་དང་ཧ་ཅང་འབྲེལ་བ་ཡོད་སྟབས་གནད་འགག་ཆེན་པོ་ཡིན། ངོས་ཀྱིས་དམ་བཅའ་གཅིག་ནི་བོད་དེ་ཞི་བདེའི་བསྟི་གནས་བཟོ་དགོས་ཞེས་བཤད་ཀྱི་ཡོད། རྒྱ་ནག་གུང་ཁྲན་ཏང་གིས་སྲིད་བྱུས་མཁྲེགས་པོ་བྱས་པ་ལ་བརྟེན་ནས་ངོས་རང་བཙན་བྱོལ་ལ་བསླེབས་པ་ཡིན། འོན་ཀྱང་བོད་མི་དམངས་ཀྱི་བདེ་སྡུག་སྤྱི་དང་། ལྷག་པར་བོད་ལ་རྒྱ་གར་གྱི་ནཱ་ལེནྡྲའི་ཆོས་བརྒྱུད་ཀྱི་རིག་གཞུང་ཡིན་པའི་རིག་གཞུང་གཏིང་ཟབ་ཅིག་ཡོད་པ་དང་། ཆོས་ལུགས་རིས་མེད་ལ་དད་པ་དང་། དགའ་མོས་བྱེད་པའི་མིག་ལྟོས་བཟང་པོ་ཞིག་ཡོད་པ་དེ། མུ་མཐུད་ནས་འཛིན་ཐུབ་པར་ཤུགས་རྒྱག་གི་ཡོད།

བོད་གངས་ཅན་གྱི་ལྗོངས་ཀྱི་རིག་གཞུང་དེ་གནའ་རབས་ཀྱི་རིག་གཞུང་རྙིང་ཁུངས་ཤིག་དང་། ཞི་བདེ་རྩ་བར་ཡོད་པའི་རིག་གཞུང་ཞིག་ཆགས་ཡོད་སྟབས། ཧི་མ་ལ་ཡ་རི་རྒྱུད་དེ་དག་ལ་བོད་ཀྱི་དེ་སྔའི་རིག་གཞུང་གི་གོམས་གཤིས་ཡོད་པ་ལྟར། ཧི་མ་ལ་ཡ་རྒྱུད་ཀྱིས་དེ་ཉར་ཚགས་ཡག་པོ་བྱེད་དགོས། ཆོས་ལུགས་མཐུན་སྒྲིལ་ཡང་གོང་དུ་ཞུས་པ་བཞིན་ལྷ་སར་ཁ་ཆེ་ཆོས་པ་མང་པོ་ཡོད་པ་བཞིན་ཧི་མ་ལ་ཡ་རི་རྒྱུད་ཀྱི་ཟངས་དཀར་ལ་ཆ་བཞག་ནའང་ཆོས་ལུགས་ཚང་མར་གུས་ཞབས་བྱེད་པ་འདི་ཧ་ཅང་མིག་ལྟོས་ཡག་པོ་ཡིན་པས་ཚང་མར་ཐུགས་རྗེ་ཆེ་ཞུ་རྒྱུ་ཡིན། ངོས་རང་དེ་རིང་འདིར་ཆེད་མངགས་ཁ་ཆེའི་གྲོགས་པོ་ཁྱོད་ཚོར་ཐུག་ཏུ་ཡོང་ནས་ཁྱོད་ཚོར་དམིགས་བསལ་གྱིས་འཚམས་འདྲི་དང་གུས་ཞབས་ཡོད།  ཅེས་བཀའ་སློབ་སྩལ་སོང་བ་བཅས།།