༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༨ ཚེས་ ༡༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟངས་དཀར་མི་མང་གིས་གཙོས་དད་ལྡན་ཆོས་བ་ཞུ་སྟོང་ཕྲག་བརྒལ་བར་དཔལ་ལྡུམ་གྱི་གསུང་ཆོས་ར་བར་བྱང་ཆུབ་སེམས་དཔའི་སྡོམ་པ་འབོགས་ཆོག་དང་ཐམས་ཅད་རྣལ་འབྱོར་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་གནང་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་དཔལ་ལྡུམ་གྲུ་འཛིན་ཕོ་བྲང་ནས་གསུང་ཆོས་ར་བར་ཆིབས་སྒྱུར་གྱིས་བཞུགས་ཁྲིར་འཁོད་མཚམས་དད་ལྡན་ཆོས་ཞུ་བ་རྣམས་ལ་བཀའ་སློབ་སྩལ་དོན། དེ་རིང་སྔོན་ལ་སེམས་བསྐྱེད་ཀྱི་ཆོ་ག་བྱ་རྒྱུ་དང་དེའི་རྗེས་སུ་ཐམས་ཅད་རྣལ་འབྱོར་སེམས་བསྐྱེད་རྒྱུ་ཡིན། སེམས་བསྐྱེད་ལ་བླ་མ་རྒྱལ་བ་ཤཱཀྱ་ཐུབ་པའི་ཆ་ལུགས་ལྟར་དུ་བྱས་ཞེས་པ་ཞིག་ཡོད། ངོས་རང་བཅོམ་ལྡན་འདས་ཀྱི་རྗེས་འབྲང་ཞིག་རེད། ཧམ་པ་ལྟ་བུ་ཏོག་ཙམ་བཤད་ན་བཅོམ་ལྡན་འདས་ཀྱི་རྗེས་འབྲང་རྒྱལ་བ་སྲས་དང་བཅས་པས་བློས་འཁེལ་སའི་དགེ་སློང་ཞིག་ཆགས་ཡོད། དེ་ཡང་། སྟོན་དེའི་རྗེས་སུ་རབ་ཏུ་བྱུང་གྱུར་ཞིང་།། རྒྱལ་བ་གསུང་ལ་སྦྱངས་པ་མི་དམན་ཞིང་།། རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག ། དྲང་སྲོང་ཆེན་པོ་དེ་ལ་དེ་ལྟར་གུས།། ཞེས་གསུངས་པ་ལྟར་སྟོན་པ་བཀའ་དྲིན་ཅན་གྱི་གསུང་ལ་སློབ་སྦྱོང་བྱས། དེའང་དབང་རྟུལ་དད་པའི་རྗེས་འབྲང་མིན་པར་དབང་རྣོན་ཆོས་ཀྱི་རྗེས་འབྲང་བྱས་ཏེ་བརྟག་དཔྱད་བྱས་པ་མ་ཟད། དེང་དུས་འཛམ་བུ་གླིང་གི་ཤེས་ཡོན་ལའང་འབྲེལ་བ་བྱས་ཏེ་བསམ་བློ་བཏང་ནས་སངས་རྒྱས་བཅོམ་ལྡན་འདས་ཀྱི་བཀའ་ལ་ཤེས་ནས་དད་པ་ཐོབ་པ་ཞིག་ཆགས་ཡོད།ངོས་རང་ཆུང་དུས་སྐབས་ནས་ལྷ་སའི་གཙུག་ལག་ཁང་གི་རྟེན་གྱི་མཆོག་སྟོན་པ་ཐུབ་པའི་དབང་པོའི་སྐུ་མདུན་ནས་དགེ་བསྙེན་དང་དགེ་ཚུལ་བསྒྲུབས་པ་དང་། བདག་གི་རྩ་བའི་བླ་མ་གལ་ཆེ་ཤོས་ཤིག་ཡིན་པ་གླིང་སྤྲུལ་རྡོ་རྗེ་འཆང་གི་སྐུ་མདུན་ནས་བསྙེན་རྫོགས་བསྒྲུབས་ནས་དུས་ད་ལྟ་བར་དུ་རྨི་ལམ་ཚུན་ཆད་ལ་ངོས་རང་དགེ་སློང་ཡིན་བསམ་པའི་འདུ་ཤེས་ཤུགས་ཆེན་པོ་བསྡད་ཡོད། ལོ་ཆུང་ཆུང་སྐབས་ནས་མངོན་རྟོགས་རྒྱན་དང་དབུ་མ་འཇུག་པ་བློ་ལ་བཟུང་། རིམ་པས་བསྡུས་གྲྭའི་བློ་རིགས་རྟགས་རིགས་སྦྱངས། དེང་སང་ཡིན་ནའང་གཞུང་ཆེན་གྱི་དཔེ་ཆ་དེ་དག་དུས་ཚོད་ཡོད་དུས་ཀློག་གི་ཡོད། ལྷག་པར་དབུ་མ་འཇུག་པ་དང་། འཇུག་པ་རང་འགྲེལ། དབུ་མ་འཇུག་པ་ཆུང་དུས་བློ་ལ་བཟུང་ཡོད། འཇུག་པ་རང་འགྲེལ་ཀློག་བཞིན་ཡོད། ཧ་ཅང་ནུས་པ་ཆེན་པོ་དང་ཡག་པོ་འདུག འཇུག་པ་རང་འགྲེལ་གྱི་བཤད་ལུང་ཞིག་ཀྱང་ཐོབ་ཡོད། ཉིན་རེ་བཞིན་དུ་གཙོ་བོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། ཞོགས་པ་ཡར་ལངས་པ་དང་སྟོན་པའི་བཀའ་དྲིན་དྲན་པའི་སྒོ་ནས་རྟེན་འབྲེལ་བསྟོད་པ་ཞིག་བཏོན། རྟེན་འབྲེལ་བསྟོད་པ་འདོན་དུས་རྟེན་ནས་བཏགས་པའམ་རྟེན་ནས་བྱུང་བ་མ་གཏོགས་ངོ་བོ་ཉིད་ཀྱིས་གྲུབ་པ་མེད་པ་ཐག་བཅད། དེ་ལྟ་བུའི་སྟོང་ཉིད་སྒོམ་དགོས་དོན་ནི་རང་ཉིད་ཐར་པ་ཐོབ་པའི་ཆེད་དུ་མ་ཡིན་པར་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ཆེད། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་འགྱུར་ནས།། འགྲོ་བའི་སྡུག་བསྔལ་སེལ་བར་ཤོག།། ཅེས་པ་འདི་སྨོན་ལམ་བརྒྱབ་སྟེ་འགྲོ་གི་ཡོད།ངོས་རང་ས་གནས་གང་དུ་ཕྱིན་ནའང་སྟོན་པ་བཀའ་དྲིན་ཅན་གྱི་སྐུ་ཚབ་ལྟ་བུ་ཆགས་ཀྱི་ཡོད། ངོས་ཀྱིས་འཇོན་དྲགས་པ་མ་རེད། འོན་ཀྱང་ལོ་རྒྱུས་ཐོག་ནས་དེ་ལྟར་ཆགས་ཀྱི་ཡོད། སྟོན་པའི་བཀའ་དྲིན་རྗེས་སུ་དྲན་པའི་སྒོ་ནས་ངོས་ཀྱིས་ཀྱང་ཉམས་ལེན་ཧུར་ཐག་བྱེད་ཀྱི་ཡོད། སངས་རྒྱས་ཀྱི་ཆོས་ཚུལ་ཐུན་མོང་མ་ཡིན་པ་དད་པ་ཙམ་མ་ཡིན་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་བེད་སྤྱོད་བྱས་ནས་ཆོས་རྣམས་ཀྱི་ཡིན་ལུགས་དཔྱད་པ་བྱས་ན་རང་ངོས་ནས་གྲུབ་མེད་ཅིང་། དེ་ཉིད་བསམ་བློ་བཏང་ནས་དཔྱད་དུས་གསལ་པོ་འདུག རྟེན་ཞེས་ཆོས་ཉིད་མི་འདོར་ལ།། འབྱུང་ཞེས་འཇིག་རྟེན་ཚུལ་ཡང་སྟོན།། རིགས་ཚུལ་ཀུན་ལས་རྒྱལ་པོ་བཞིན།། རྟེན་ཅིང་འབྲེལ་འབྱུང་ཚད་མའི་བཀའ།། རྟེན་འབྱུང་ཞེས་པའི་ཚིག་གཉིས་པོ་དེས། དངོས་གནས་རང་བཞིན་གྱིས་སྟོང་པ་དེ་ལྟར་ནའང་། ཐ་སྙད་དུ་བྱ་བྱེད་ཐམས་ཅད་འཐད་པའི་སྣང་སྟོང་གཉིས་ཚོགས་དང་། སྟོང་ཉིད་ཀྱི་ལྟ་བ་ལ་བསམ་བློ་ཅི་ཐུབ་ཐུབ་གཏོང་གི་ཡོད། གང་ལ་གང་ཙམ་གྱིས་སྒྱུ་མ་ལྟ་བུའི་སྣང་བ་འཆར་ཡོང་གི་ཡོད་ངེས་ལྟ་བུ་ཞིག་འདུག བྱང་ཆུབ་ཀྱི་སེམས་ཀྱི་སྐོར་ལ་ངོས་ཀྱིས་སྤྱོད་འཇུག་ཡང་ཡང་ཀློག་གི་ཡོད། དེ་ཡང་སྤྱོད་འཇུག་ལས། བདག་བདེ་གཞན་གྱི་སྡུག་བསྔལ་དག།། ཡང་དག་བརྗེ་བར་མ་བྱས་ན།། སངས་རྒྱས་ཉིད་དུ་མི་གྲུབ་ཅིང་།། འཁོར་བ་ན་ཡང་བདེ་བ་མེད།། དེ་བས་སྐྱོ་ངལ་ཀུན་སེལ་བའི།། བྱང་ཆུབ་སེམས་ཀྱི་རྟ་གཞོན་ནས།། བདེ་ནས་བདེ་བར་འགྲོ་བ་ལ།། སེམས་ཤེས་སུ་ཞིག་སྒྱིད་ལུག་གྱུར།། ཞེས་གསུངས་པ་ལྟར་རང་དོན་བསྒྲུབ་ནའང་བྱང་ཆུབ་ཀྱི་སེམས། གཞན་དོན་བསྒྲུབ་ནའང་བྱང་ཆུབ་ཀྱི་སེམས། འཕྲལ་དུ་བདེ་བའང་བྱང་ཆུབ་ཀྱི་སེམས། བྱང་ཆུབ་ཀྱི་སེམས་ལ་བརྟེན་ནས་ཚོགས་བདེ་བླག་ཏུ་རྫོགས། གྲིབ་པ་སྦྱངས། ས་ལམ་བགྲོད་དེ་རྣམ་མཁྱེན་རྒྱལ་བའི་གོ་འཕང་ཐོབ་ཐུབ་སྙམ་པའི་གདེང་ཚོད་གང་ཙམ་ཡོང་བ་ཞིག་འདུག ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཉམས་ལེན་ག་ཚོད་ཐུབ་ཐུབ་བྱེད་ཀྱི་ཡོད། དེ་ལ་བསམ་བློ་བཏང་ནས་ལོ་མང་པོ་ཕྱིན་པ་རེད། བསམ་བློ་བཏང་བའི་ལག་རྗེས་སུ་སེམས་ཀྱི་ནང་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བའི་ཚོར་བ་ཤུགས་ཆེན་པོ་ཡོང་གི་འདུག ངོས་རང་རྩ་ཆེན་པོ་རེད་ཟེར་གྱི་མེད། ང་ཚོ་ཚང་མར་མིའི་ལུས་རྟེན་ཐོབ་ཡོད། མིའི་ཀླད་པ་ཡོད། སངས་རྒྱས་ཀྱི་བསྟན་པ་མཇལ་བ་ཡིན་སྟབས་བསམ་བློ་བཏང་ན་སེམས་ལ་འགྱུར་བ་ཐེབས་རྒྱུ་ཡོད་པ་ངོས་ཀྱི་ཉམས་མྱོང་གིས་གྲུབ་ཡོད། བཅོམ་ལྡན་འདས་ཀྱི་རྗེས་འབྲང་པ་ཚོའི་དམིགས་ཡུལ་ནི་ནམ་མཁའི་མཐས་གཏུགས་པའི་སེམས་ཅན་མཐའ་དག་གི་དོན་དུ་རང་ཉིད་ཀྱིས་བློ་སྦྱངས་ནས། བཅོམ་ལྡན་འདས་ནང་བཞིན་ཞིག་བྱེད་རྒྱུ་ཡིན་བསམ་པ་སྟེ། ཇི་སྲིད་ནམ་མཁའ་མ་ཟད་ཀྱི་བར་ལ། འགྲོ་བའི་དོན་ལ་གཅིག་ཏུ་བརྩོན་བསམ་པའི་བློ་སྦྱོང་དགོས། དེ་ལྟར་བློ་སྦྱང་ཡོང་བ་ན། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། བྱང་ཆུབ་མཆོག་གི་སེམས་ནི་བསྐྱེད་བགྱིས་ནས།། སེམས་ཅན་ཐམས་ཅད་བདག་གི་མགྲོན་དུ་གཉེར།། བྱང་ཆུབ་སྤྱོད་མཆོག་ཡིད་འོང་སྤྱད་བགྱི།། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག། ཅེས་པའི་ཚིག་འདི་ཧ་ཅང་ནུས་པ་ཆེན་པོ་འདུག ཉིན་རེ་བཞིན་དུ་བྱང་ཆུབ་སེམས་དཔའི་སྡོམ་པ་ལེན་གྱི་ཡོད་པས། བསམ་བློ་དེ་ལྟར་བཏང་བས་སེམས་ལ་སྙིང་སྟོབས་དང་། སྤྲོ་བ་སླེབས་ཡོང་གི་འདུགསྟོང་ཉིད་ཀྱི་ལྟ་བ་ནི་ད་ཅི་ཞུས་པ་བཞིན། རྟེན་ཞེས་ཆོས་ཉིད་མི་འདོར་ལ། ། འབྱུང་ཞེས་འཇིག་རྟེན་ཚུལ་ཡང་སྟོན། །རིགས་ཚུལ་ཀུན་ལས་རྒྱལ་པོ་བཞིན། ། རྟེན་ཅིང་འབྲེལ་འབྱུང་ཚད་མའི་བཀའ། །ཞེས་གསུངས་པ་ལ་བསམ་བློ་བཏང་ནས། ངོས་རང་དགེ་སློང་འདུལ་བ་འཛིན་པ་ཆུང་དུས་ནས་སངས་རྒྱས་པའི་ཆོས་ལ་སློབ་སྦྱོང་གང་ལ་གང་འཚམ་བྱས་ནས་སེམས་ལ་གོ་རྟོགས་ངེས་ཅན་ཡོད། ངོས་ཀྱི་ལས་འགན་ནི་ངའི་གོ་རྟོགས་དང་ཉམས་མྱོང་ཡོད་པ་རྣམས་ངོས་ལ་དགའ་པོ་བྱེད་མཁན་མི་མང་ཚོར་འགྲེལ་བཤད་བརྒྱབ་རྒྱུ་དེ་རེད། ཁྱེད་རང་ཚོ་༸རྒྱལ་བ་རིན་པོ་ཆེ་ལ་དད་པ་དང་ཡིད་ཆེས་བྱེད་མཁན་ཚོས་ཀྱང་༸རྒྱལ་བ་རིན་པོ་ཆེ་ལ་སྐྱབས་སུ་མཆི་ཟེར་རྒྱུ་ཙམ་མ་ཡིན་པར་༸རྒྱལ་བ་རིན་པོ་ཆེས་སློབ་སྦྱོང་ཇི་ལྟར་བྱས་པ། སྒོམ་ཇི་ལྟར་རྒྱག་གི་ཡོད་པ། དེ་ལ་བརྟེན་ནས་སེམས་ལ་འགྱུར་བ་ཇི་ལྟར་འགྲོ་གི་ཡོད་པ་རྣམས་ངོས་ཀྱིས་འགྲེལ་བརྗོད་བྱས་པ་ལྟར་ཁྱེད་ཚོས་ལག་ལེན་ལ་བཀལ་དགོས། དེ་ལྟར་བྱུང་ན་བླ་མ་དང་སློབ་མའི་མཚན་ཉིད་ཚང་བ་རེད། ངོས་ཀྱིས་འགྲེལ་བཤད་རྒྱག་དུས་༸རྒྱལ་བ་རིན་པོ་ཆེས་མང་པོ་ཞིག་གསུངས་སོང་། ངས་གང་ཡང་མི་ཤེས། སྐྱབས་སུ་མཆི་ཞེས་བརྗོད་པ་ཡིན་པ་དབང་པོ་རྟུལ་པོའི་འགྲོ་སྟངས་་ཡིན་པས། ངེས་པར་དུ་བསམ་བློ་གཏོང་དགོས། སངས་རྒྱས་པའི་ཆོས་ལ་རིགས་རུས་ཀྱི་དབྱེ་བ་མེད། ལུས་རྟེན་སྐྱེས་པ་དང་བུད་མེད་ཀྱི་ཁྱད་པར་མེད། ང་ཚོར་མིའི་ཀླད་པས་བསམ་བློ་གཏོང་རྒྱུ་ཡོད་པ་ཞིག་ཡོད་ཕྱིན་ཆད་ཚང་མར་སངས་རྒྱས་པའི་ཆོས་ལ་བསམ་བློ་གཏོང་རྒྱུའི་ནུས་པ་ཡོད། སོ་སོར་མོས་པ་ཡོད་མེད་སོ་སོའི་བསམ་བློ་གཏོང་ཕྱོགས་རེད། མི་ལུས་ཐོབ་ནས་མིའི་ཀླད་པ་འདི་ལྟ་བུ་ཞིག་ཡོད་དུས་ཀླད་པས་ཚེ་འདིའི་འཕྲུལ་ཆས་དང་ཚན་རིག་ཡར་རྒྱས་གཅིག་པུར་བསམ་བློ་བཏང་ན་སྒོ་ལྔའི་ཤེས་པ་གཅིག་པུ་བེད་སྤྱོད་བྱས་པ་ལྟ་བུ་རེད། ཡིད་བློའི་ཐོག་ནས་བསམ་བློ་ཡུན་རིང་པོ་གཏོང་རྒྱུ་དེས་སྒོ་ལྔའི་ཤེས་པར་འགན་ཧ་ཅང་མ་སྤྲད་པར་གཙོ་བོ་ཡིད་བློར་འགན་སྤྲད་ནས་བསམ་བློ་གཏོང་རྒྱུ་དེ་རེད། ང་ཚོར་སྐྱོན་ཡོང་བ་དེ་ཡིད་བློའི་སྒང་ནས་ཡོང་གི་ཡོད། སངས་རྒྱས་བཅོམ་ལྡན་འདས་ཀྱི་ཐུགས་རྒྱུད་ཀྱི་སྐྱོན་སེལ་བའི་གཉེན་པོ་ སྐུ་གསུང་ཐུགས་ཀྱི་ཡོན་ཏན་ཇི་བཞིན་ཞིག་ང་ཚོའི་ཡིད་བློའི་སྒང་ནས་འགྲུབ་ཐུབ་པའི་ནུས་པ་ཡོད་པ་དེར་བསམ་བློ་གཏོང་དགོས། ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པ་དང་། ད་ལྟ་སེམས་བསྐྱེད་ཞུ་བའི་སྐབས་སུ་མདུན་གྱི་ནམ་མཁའ་ལ་སྟོན་པ་ཐུབ་པའི་དབང་པོ་ཡོད་བསམ་པ་བྱོས། ང་དགེ་སློང་འདུལ་བ་འཛིན་པ། བཅོམ་ལྡན་འདས་ཀྱི་རྗེས་འབྲང་རྣལ་མ་ཞིག་ཆགས་ཡོད་པས། ངའི་མགོའི་སྒང་ལ་སྟོན་པ་ཤཱཀྱ་ཐུབ་པ་གསུང་གི་འཕྲིན་ལས་ལ་འཛད་པ་མེད་པ། ནམ་མཁའ་ཇི་སྲིད་ཀྱི་བར་ལ་སེམས་ཅན་གྱི་དོན་མཛད་མཁན་གྱི་སྟོན་པ་ཐུབ་པའི་དབང་པོ་ཡོད་བསམ། དེའི་མཐའ་སྐོར་ལ་སྐྱབས་སུ་བཟུང་བའི་བླ་མ། ཡི་དམ། ཆོས་སྐྱོང་སྲུང་མ་ཚང་མ་ཡོད་བསམ། དེ་དག་སེམས་བསྐྱེད་ཞུ་སའི་སྐྱབས་ཡིན།

དེ་ནས་ཐམས་ཅད་རྣལ་འབྱོར་སེམས་བསྐྱེད་ཀྱི་ངོ་སྤྲོད་གནང་དོན། ནམ་མཁའི་མཐས་གཏུགས་པའི་སེམས་ཅན་ཐམས་ཅད་ཀྱི་དོན་དུ་ཇི་སྲིད་ནམ་མཁའ་མི་སྟོང་གི་བར་དུ་སེམས་ཅན་གྱི་དོན་ལ་མཐའ་གཅིག་ཏུ་བརྩོན་གྱི་ཡིན་བསམ་པའི་སེམས་ཤུགས་སྐྱེས། དེ་རིང་འདིར་ལས་སླ་བ་ཡོང་ཆེད། ཁྱེད་རང་ཚོར་ཁ་མར་སློག་ནས་འགྲེལ་བཤད་རྒྱག་མཁན་གྱི་༸རྒྱལ་བ་རིན་པོ་ཆེས་བྱང་ཆུབ་ཀྱི་སེམས་ཇི་ལྟར་སྒོམ་པ་ནང་བཞིན་དེ་ལྟར་ངས་ཀྱང་བྱང་ཆུབ་ཀྱི་སེམས་སྒོམ་གྱི་ཡིན་བསམ་པའི་སེམས་ཐག་བཅད་ནས་དེ་ལྟ་བུའི་བྱང་ཆུབ་ཀྱི་སེམས་དེ་རང་གི་སྙིང་ཁར་ཟླ་བའི་དཀྱིལ་འཁོར་ལྟ་བུའི་འོད་དཀར་སྒོར་དབྱིབས་ཅན་ཞིག་ལ་གྱུར་སོང་སྙམ་ནས་སྔོན་ལ་བྱང་ཆུབ་ཀྱི་སེམས་ལ་བསམ་བློ་ཏོག་ཙམ་བཏང་། དབུ་མ་འཇུག་པའི་ནང་། གལ་ཏེ་རང་གི་མཚན་ཉིད་བརྟེན་འགྱུར་ན། །དེ་ལ་སྐུར་བས་དངོས་པོ་འཇིག་པའི་ཕྱིར། །སྟོང་ཉིད་དངོས་པོ་འཇིག་པའི་རྒྱུར་འགྱུར་ན། །དེ་ནི་རིགས་མིན་དེ་ཕྱིར་དངོས་ཡོད་མིན། །ཞེས་གསུངས་པ་བཞིན། རྒྱུ་ལ་དཔྱོད་པ་རྡོ་རྗེ་གཟེགས་མའི་གཏན་ཚིགས། ངོ་བོ་ལ་དཔྱོད་པ་གཅིག་དུ་བྲལ་གྱི་གཏན་ཚིགས། འབྲས་བུ་ལ་དཔྱོད་པ་ཡོད་མེད་སྐྱེ་འགོག་གི་གཏན་ཚིགས་སོགས་ལ་བརྟེན་ནས་རྒྱུ། འབྲས་བུ། ངོ་བོ་གང་ལའང་མཛུབ་མོ་བཙུག་ས་མི་འདུག་སྙམ་པའི་བསམ་བློ་གཏོང་རྒྱུ་འདུག ང་ཚོའི་བློར་སྣང་བ་ནང་བཞིན་མཛུབ་མོ་བཙུག་ས་མི་འདུག་བསམ་པའི་བསམ་བློ་འཁོར་བ་དང་། འོ་ན་ཡོད་ཚུལ་ཅི་འདྲ་ཞིག་ཏུ་ཡོད་དམ་ཞེ་ན། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་ཏུ། །གནས་རྙེད་མ་ཡིན་དེ་ཕྱིར་འཇིག་རྟེན་གྱི། །ཐ་སྙད་བདེན་ལ་རྣམ་པར་དཔྱད་མི་བྱ། །དེ་ཉིད་སྐབས་སུ་རིགས་པ་གང་ཞིག་གིས། །བདག་དང་གཞན་ལས་སྐྱེ་བ་རིགས་མིན་པ། །རིགས་དེས་ཐ་སྙད་དུཡང་རིགས་མིན་པ། །ཁྱོད་ཀྱི་སྐྱེ་བ་གང་གིས་ཡིན་པར་འགྱུར། །ཞེས་སྐྱེ་འགག་དེ་དག་མེད་དམ་ཞེ་ན། མེད་པའང་མིན་པར། དངོས་པོ་སྟོང་པ་གཟུགས་བརྙན་ལ་སོགས་པ། །ཚོགས་ལ་ལྟོས་རྣམས་མ་གྲགས་པ་ཡང་མིན། །ཇི་ལྟར་དེར་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པར་སྐྱེ་འགྱུར་ལྟར། །དེ་བཞིན་དངོས་པོ་ཐམས་ཅད་སྟོང་ན་ཡང་། །སྟོང་ཉིད་དག་ལས་རབ་ཏུ་སྐྱེ་བར་འགྱུར། །ཞེས་གསུངས་པའི་ཚིག་འདི་ཧ་ཅང་ནུས་པ་ཆེན་པོ་ཡིན། ངོས་ཀྱིས་ཚིག་འདི་ཉིན་ལྟར་སྐྱོར་ནས་བསམ་བློ་གཏོང་གི་ཡོད། གང་ལྟར་ང་ཚོའི་བློ་ལ་མཐོང་། ཐོས། དྲན། རེག་ཅི་འདྲ་སྣང་ཡང་དོན་གྱི་སྟེང་ནས་ཡོད་པ་ཞིག་སྣང་གི་ཡོད་ཀྱང་། དོན་སྟེང་ནས་ཡོད་པ་ཞིག་སྣང་བ་ནང་བཞིན་དོན་སྟེང་ནས་ཡོད་ན། བཙལ་ན་ཇེ་གསལ་དུ་འགྲོ་དགོས་ཀྱང་དེ་ལྟར་མི་འདུག མ་བརྟག་མ་དཔྱད་པའི་ངང་ནས་དོན་གྱི་ངོས་ནས་ཡོད་པ་ཞིག་སྣང་བ་དེའི་རྒྱུ། འབྲས་བུ། ངོ་བོ་གསུམ་ལ་བརྟག་དཔྱད་བྱས་ནས་བསམ་བློ་གང་ཙམ་བཏང་ན་མཛུབ་མོ་བཙུག་ས་ཁྱོན་ནས་མེད་པར་མཐའ་མའི་སྡོམ་ལ་མིང་གི་དབང་གིས་ཡོད་ཙམ་ཞིག་མ་གཏོགས། དོན་རང་ཚན་ཞིག་རྩ་བ་ནས་མེད་བསམ་པའི་བློ་ཐག་ཆོད་ཡོང་གི་འདུགངོས་ལ་ཆ་བཞག་ན་བྱང་ཆུབ་ཀྱི་སེམས་ཉམས་ལེན་བྱས་ཏེ་ཁ་ཡོད་ལག་ཡོད་ཀྱི་ཉམས་མྱོང་གང་ལ་གང་འཚམ་སྐྱེ་ཡི་འདུག་ལ། སྟོང་ཉིད་ཀྱི་ལྟ་བར་བསམ་བློ་བཏང་བ་དེས་ཀྱང་གང་ལ་གང་འཚམ་གྱིས་སྟོང་ཉིད་ཀྱི་གོ་བ་དང་ཚོར་བ་ཞིག་ཡོང་གི་འདུག དེར་བརྟེན་ཁྱེད་རང་ཚོས་སྟོང་ཉིད་ཀྱི་སྐོར་ལ་བསམ་བློ་བཏང་སྟེ་ཆོས་ཐམས་ཅད་མིང་བརྡའི་བཞག་ཙམ་མ་གཏོགས་དོན་རང་གི་ངོ་བོའི་སྒོ་ནས་སྣང་བ་ལྟར་དུ་ཡོད་པ་ཞིག་གཏན་ནས་མེད་བསམ་པའི་སེམས་ཐག་ཆོད་པ་ཞིག་བསམ་བློ་བཏང་ནས་དེ་ལྟ་བུའི་དེ་ཁོ་ན་ཉིད་ལ་རྩེ་གཅིག་ཏུ་བསམ་བློ་གཏང་བའི་བློ་དེ་ཉིད་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་རྣམ་པ་ཞིག་ཏུ་གྱུར་སོང་སྙམ།དཔེར་ན། བསམ་བློ་ལས་སླ་བོ་ཞིག་བཏང་ན། ང་ཚོ་ལ་ང་ཟེར་བ་ཞིག་ཡོད་པ་དང་། ང་དེ་མེད་པའང་མིན་པར་ངའི་ལུས། ངའི་ལག་པ། ངའི་སེམས་ཞེས་ཟེར་གྱི་ཡོད་ཀྱང་། སེམས་དེ་ངའི་ཡིན་ཟེར་བའི་ང་དེ་གང་དུ་འདུག ལུས་དང་སེམས་ལ་མཛུབ་མོ་བཙུག་ས་ཞིག་ཡོད་ཀྱང་། ང་དེ་གང་དུ་འདུག་བརྟག་ན་ལག་པ་དེ་ཡང་ང་མིན། སེམས་དེ་ཡང་ང་མིན། དེ་དག་ལ་བདག་པོ་རྒྱག་མཁན་དང་ དབང་བསྒྱུར་མཁན་གྱི་ང་ཞིག་ཡོད་པ་དེ་གང་དུ་འདུག་བསམ་བློ་ཐོངས་དང་། མཛུབ་མོ་བཙུག་ས་ཁྱོན་ནས་མི་འདུག

འདི་ནི་ངའི་ལུས་རེད། འདི་ནི་ངའི་སེམས་རེད་ཅེས་པའི་ང་དེ་གང་དུ་འདུག་གམ་ཞེ་ན། མཛུབ་མོ་བཙུག་ས་ཁྱོན་ནས་མི་འདུག མེད་པའང་མིན་པར་ད་ལྟའི་ང་དེ་རིམ་པས་ཡར་ཕྱིན་ནས་སངས་རྒྱས་ཀྱི་ཐུགས་རྒྱུད་ཀྱི་བདག་དེ་ཆགས་ཀྱི་ཡོད་སྟབས། ཆོས་ལོངས་སྤྲུལ་གསུམ་ཞེས་བཤད་ཡོད། དེར་བརྟེན་ང་མེད་པ་ནི་མིན། ང་མེད་ཅེས་ན་ཆད་ལྟ་ཡིན། བློ་ལ་ང་ཞེས་ལུས་སེམས་ལ་དབང་བསྒྱུར་མཁན་གྱི་ང་རང་མཚན་པ་ཞིག་ཡོད་པར་འཆར་བ་དེ་གཏན་ནས་མེད། ང་མེད་པའང་མིན་པ་དང་། མིང་རྐྱང་བཏགས་ཡོད་ཙམ་མ་གཏོགས་མེད་པ་ལ་བསམ་བློ་བཏང་ནས་དེར་མཉམ་པར་ཞོག ང་ཟེར་བ་ཞིག་ཡོད་ཀྱང་མཛུབ་མོ་བཙུག་ས་ཞིག་ཁྱོན་ནས་མི་འདུག་སྙམ་དུ་སེམས་ཐག་ཆོད་པའི་བསམ་བློ་ཞིག་ཐོངས། གོང་དུ་བྱང་ཆུབ་སེམས་ཟླ་བའི་དཀྱིལ་འཁོར་འོད་དཀར་པོ་སྒོར་སྒོར་ཞིག་ཏུ་བསམ་བློ་བཏང་ནས་ཡོད་པ་དེའི་སྒང་ལ། ཡར་སངས་རྒྱས་ཞེས་མཛུབ་མོ་བཙུག་ས་མི་འདུག མར་སེམས་ཅན་ཞེས་ཀྱང་མཛུབ་མོ་བཙུག་ས་མི་འདུག གཞན་ཞེས་ཀྱང་མཛུབ་མོ་བཙུག་ས་མི་འདུག རང་ཞེས་ཀྱང་མཛུབ་མོ་བཙུག་ས་མི་འདུག་པར། མིང་བརྡས་བཞག་ཙམ་ཞིག་མ་གཏོགས་དོན་གྱི་ངོ་བོའི་སྒོ་ནས་ཡོད་པ་ཞིག་གཏན་ནས་མི་འདུག་བསམ་པ་བློ་ཐག་ཆོད་པར་བྱས་ནས་དེ་ལྟ་བུའི་བློ་དེ་རྡོ་རྗེ་དཀར་པོ་རྩེ་ལྔ་པའི་རྣམ་པ་ཞིག་ཏུ་གྱུར་ནས་ཀུན་རྫོབ་བྱུང་ཆུབ་ཀྱི་སེམས་ཀྱི་རང་བཞིན་ཟླ་བའི་དཀྱིལ་འཁོར་ཞིག་ཏུ་བསམ་ཡོད་པ་དེའི་སྒང་ལ་ལངས་སྟབས་སུ་ཡོད་པར་བསམ་པ་དེ་ལ་ཐམས་ཅད་རྣལ་འབྱོར་དུ་སེམས་བསྐྱེད་པ་ཟེར། ཅུང་ཙམ་སྒོམས་ཤིག་ཨང་།

ང་ཚོས་ནམ་རྒྱུན་ཉམས་ལེན་ཟེར་དུས་ལྷ་བསྒོམ་རྒྱུ་དང་སྔགས་བགྲང་རྒྱུ་ལྟ་བུར་རྩི་གི་ཡོད། དེ་ཡང་བསྒོམ་བྱ་རེད། འོན་ཀྱང་བསྒོམ་བྱ་གཙོ་བོ་ནི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དེ་གཉིས་རེད། གང་ཡིན་ཟེར་ན་ང་ཚོའི་དམིགས་ཡུལ་མཐར་ཐུག་དེ་སངས་རྒྱས་ཀྱི་གོ་འཕང་རེད། དེ་ཆོས་སྐུ་དམ་པ་དང་གཟུགས་སྐུ་དམ་པ་ཞེས་དམ་པ་གཉིས་ལྡན་གྱི་སྐུ་རེད། དེ་བསྒྲུབ་པའི་རྒྱུ་ཚང་ལ་མ་ནོར་བ་དེ་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་གཉིས་རེད། དེ་ང་ཚོས་ཉིན་རེ་བཞིན་དུ་བསམ་བློ་གཏོང་དགོས། ཐམས་ཅད་རྣལ་འབྱོར་གྱི་སེམས་བསྐྱེད་ཅེས་པ་དེ་རེད། དེ་ངོས་ཀྱིས་ཉིན་ལྟར་བསམ་བློ་གཏོང་གི་ཡོད། ཁྱེད་རང་ཚོ་ངོས་ལ་དད་པ་ཡིད་ཆེས་བྱེད་མཁན་སློབ་མ་ཚོས་དེ་དེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉིན་རེ་བཞིན་དུ་སྒོམས་ཤིག་ཨང་། མགོན་པོ་ཀླུ་སྒྲུབ་ཀྱིས་རྩ་བ་ཤེས་རབ་ཏུ། ལས་དང་ཉོན་མོངས་ཟད་པས་ཐར།། ལས་དང་ཉོན་མོངས་རྣམ་རྟོག་ལས།། དེ་དག་སྤྲོས་ལས་སྤྲོས་པ་ནི།། སྟོང་པ་ཉིད་ཀྱིས་འགག་པར་འགྱུར།། ཞེས་གསུངས་པ་ལྟར་ཡིན། ད་རེས་ཀྱི་ཆོས་འབྲེལ་དེ་སེམས་བསྐྱེད་མཆོད་པ་དང་། ཐམས་ཅད་རྣལ་འབྱོར་དུ་སེམས་བསྐྱེད་པ་དེ་ཡིན་སྟབས། ཚང་མས་དུས་རྟག་ཏུ་ཉམས་ལེན་བྱེད་རྒྱུ་ཧ་ཅང་གལ་ཆེན་པོ་ཡིན། ྋརྒྱལ་བ་རིན་པོ་ཆེ་མཇལ་སོང་། གསུང་ཐོས་སོང་བསམ་པ་ཙམ་མིན་པར་དོན་དག་ལ་བསམ་བློ་ཐོངས། ངོས་ཀྱིས་ཀྱང་སྟོན་པ་བཅོམ་ལྡན་འདས་ནས་བཟུང་སྟེ་རང་གི་རྩ་བའི་བླ་མའི་བར་དུ་རྒྱུན་མ་ཆད་པར་གསུངས་པའི་གདམས་ངག་དེ་དག་སྒོམ་ནས་ཉམས་ལེན་བྱེད་ཀྱི་ཡོད། ཁྱོད་ཚོས་ཀྱང་ངོས་ཀྱི་རྩ་ནས་ཆོས་ཞུས་པའི་སྙིང་པོ་དེ་སྐབས་སུ་བབ་པ་བྱང་ཆུབ་ཀྱི་སེམས་དང་སྟོང་ཉིད་གཉིས་ཡིན་པས། ྋརྒྱལ་བ་རིན་པོ་ཆེ་ལ་དད་པ་བྱེད་མཁན་དང་། ཡིད་ཆེས་བྱེད་མཁན་ཞིག་ཡིན་ཕྱིན་ཆད་ཚང་མས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཉིས་སྒོམ་དགོས།ད་ལྟ་ཟངས་དཀར་གྱི་གནས་འདིར་ཆོས་བཤད་པའི་གོ་སྐབས་བྱུང་བར་ངོས་རང་ཧ་ཅང་སྐལ་བ་བཟང་པོ་བྱུང་ལ། འདི་གར་ཡོད་པའི་ལྷ་ཀླུ་གཞི་བདག་དེ་དག་ཚང་མ་ཡང་སེམས་དགའ་ནས་བསྡད་ཡོད་པ་ངོས་ཀྱིས་ཚོར་གྱི་འདུག ཤེས་སོང་ངམ།