༄༅། །ཕྱི་ལོ་ ༢༠༢༢ ཟླ་ ༨ ཚེས་ ༢༤ ཉིན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཨ་རིའི་གཞུང་ཚབ་ཆེན་མོ་ལྕམ་སྐུ་མི་ཤེལ་ཊའི་ལོར་ (Michele Taylor) མཆོག་དང་མཇལ་འཕྲད་ཞུས་གནང་ཡོད།

དེ་ཡང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་གོང་ཚེས་ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཨ་རིའི་གཞུང་ཚབ་ཆེན་མོ་ལྕམ་སྐུ་མི་ཤེལ་ཊའི་ལོར་མཆོག་དང་མཇལ་འཕྲད་ཀྱིས་ཉེ་ཆར་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་མཁས་པ་ཊོ་མོ་ཡཱ་ཨོ་བྷོ་ཀ་ཊ་ (Tomoya Obokata) ལགས་ཀྱིས་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་ལྟར། བོད་ནང་དུའང་བོད་མི་རྣམས་ལ་བཙན་དབང་གིས་ངལ་རྩོལ་བྱེད་དུ་བཅུག་ཡོད་པའི་སྙན་ཐོ་བཏོན་ཡོད་པ་མ་ཟད།  རྒྱ་ནག་གཞུང་གིས་བོད་ནང་གཞི་རྒྱ་ཆེ་བའི་སྒོ་ནས་ངལ་རྩོལ་བསྒྱུར་བཀོད་ཁང་གི་ལས་གཞི་སྤེལ་དང་སྤེལ་བཞིན་པའི་ཁྲོད་གཙོ་བོ་ཞིང་པ་དང་འབྲོག་པ། དེ་བཞིན་གྲོང་གསེབ་ཁག་གི་མི་ཡིན་པ་བརྗོད་ཡོད་པའི་སྐོར་འགྲེལ་བརྗོད་ཞུས་གནང་ཡོད་པ་མ་ཟད། རྒྱ་ནག་གཞུང་གིས་མུ་མཐུད་བོད་ནང་གི་བོད་མིའི་དགོན་སྡེ་ཁག་གི་ནང་དམ་བསྒྲགས་དང་ནང་པའི་སྐུ་བརྙན་སོགས་གཏོར་བཤིག་བཏང་ཡོད་པའི་སྐོར་འབྲེལ་བརྗོད་ཞུས་གནང་ཡོད།སྐབས་དེར་ལྕམ་སྐུ་མི་ཤེལ་ཊའི་ལོར་མཆོག་གིས་བོད་ནང་གི་བོད་མི་རྣམས་ཀྱིས་དཀའ་སྡུག་མྱོང་བཞིན་པར་གདུང་སེམས་མཉམ་སྐྱེ་དང་། ཨ་རིའི་གཞུང་གིས་མུ་མཐུད་བོད་དོན་སླད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད། གཞན་ཡང་ལྕམ་སྐུ་མི་ཤེལ་ཊའི་ལོར་མཆོག་གིས་ཊུ་ཝི་ཊར་བརྒྱུད་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་ལྷན་ཐུག་འཕྲད་གནང་སྟེ་དགའ་ཚོར་བྱུང་བའི་སྐོར་དང་། གནད་དོན་མང་པོའི་ཐོག་གྲོས་བསྡུར་དང་བོད་མིའི་ཆོས་དད་རང་དབང་ཐོག་ཉེན་ཁ་སླེབ་བཞིན་པར་ཨ་རིའི་གཞུང་གི་ངོས་ནས་ཐུགས་འཚབ་ཆེན་པོ་གནང་གི་ཡོད་པའི་སྐོར་འཁོད་འདུག

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ལྕམ་སྐུ་མི་ཤེལ་ཊའི་ལོར་མཆོག་གིས་རྒྱབ་སྐྱོར་གནང་བར་ཐུགས་རྗེ་ལེགས་འབུལ་མཚོན་ཆེད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་བཙན་བྱོལ་ནང་གི་རང་དབང་ (Freedom In Exile) ཞེས་པའི་ཨིན་ཡིག་ཏུ་ཡོད་པའི་དཔེ་དེབ་ཅིག་ཕུལ་བ་དང་འབྲེལ་མུ་མཐུད་ཕྱོགས་གཉིས་ཀས་བོད་དོན་སྐོར་གླེང་མོལ་གནང་རྒྱུའི་ཞལ་བཞེས་གནང་ཡོད་པ་བཅས།།